ଆଡପ ମଣ୍ଡପକୁ ବିଜେ କଲେ ଚତୁର୍ଦ୍ଧାମୂର୍ତ୍ତି

ପୁରୀ : ପାରମ୍ପରିକ ନୀତିକାନ୍ତି ସହ ଶୁକ୍ରବାର ଶରଧାବାଲିରୁ ଗୁଣ୍ଡିଚା ମନ୍ଦିରର ଆଡପ ମଣ୍ଡପକୁ ଦାରୁଦିଅଁ ବିଜେ କରିଛନ୍ତି । ସନ୍ଧ୍ୟାଧୂପ ସରିବା ପରେ  ବିଜେ କାହାଳୀ ବାଜିଥିଲା। ଏହା ପରେ ଚତୁର୍ଦ୍ଧା ବିଗ୍ରହ ଗୋଟି ପହଣ୍ଡିରେ ଯାଇ ଜନ୍ମବେଦି ଅବା ଆଡପମଣ୍ଡପରେ ବିଜେ କରିଛନ୍ତି। ପ୍ରତିକୂଳ ପାଗ ସତ୍ତ୍ବେ ପହଣ୍ଡି ଦେଖିବା ପାଇଁ ପ୍ରବଳ ଜନ ସମାଗମ ହୋଇଥିଲା। ଶନିବାର ଠାରୁ ଆଡପ ଅଭଡା ମହାପ୍ରଭୁଙ୍କ ପାଖରେ ଲାଗିହେବ ଓ ଭକ୍ତମାନଙ୍କୁ ମିଳିବ।

ଅନୁକୂଳ ପାଗ ଓ ସଅଳ ନୀତିକାନ୍ତି ଯୋଗୁଁ ଗୁରୁବାର ନିର୍ଦ୍ଧାରିତ ସମୟ ପୂର୍ବରୁ ଶରଧାବାଲିରେ ତିନି ରଥ ପହଞ୍ଚିଥିଲେ । ଗତକାଲି ସାରା ରାତି ରଥ ଉପରେ ଭକ୍ତଙ୍କୁ ଦର୍ଶନ ଦେଇଥିଲେ। ଆଜି ମଧ୍ୟ ରଥ ଉପରେ ଠାକୁରଙ୍କ ଦର୍ଶନ ପାଇଁ ପ୍ରବଳ ଭିଡ ଦେଖିବାକୁ ମିଳିଥିଲା।