କଟକ: ଜଣେ ମହିଳାଙ୍କୁ ଦୁର୍ବ୍ୟବହାର ଅଭିଯୋଗରେ କଟକ ପୁରୀଘାଟ ଥାନାରେ କେନ୍ଦ୍ରାପଡା ସାଂସଦ ଅନୁଭବ ମହାନ୍ତିଙ୍କ ନାଁରେ ମାମଲା ରୁଜ୍ଜୁ ହୋଇଛି। ସୂଚନା ଅନୁଯାୟୀ, ଅଭିଯୋଗକାରିଣୀ ମହିଳାଙ୍କୁ ଅନୁଭବଙ୍କ ଭାଇ ଅନୁପ୍ରାସ ମହାନ୍ତି ଅନେକ ଦିନ ହେବ ଖରାପ ଇଙ୍ଗିତ କରିବା ସହ ବାଟରେ ହଇରାଣ ହରକତ କରୁଥିଲେ। ଶେଷରେ ସେ ଅତିଷ୍ଠ ହୋଇ ଏ ସମ୍ପର୍କରେ ସାଂସଦ ଅନୁଭବ ମହାନ୍ତିଙ୍କୁ ଜଣାଇବାକୁ ତାଙ୍କ ଘରକୁ ଯାଇଥିଲେ। ସେ ପୁରୀଘାଟ ଥାନାରେ ରୁଜ୍ଜୁ କରିଥିବା ଏତଲାରେ ଦର୍ଶାଇଛନ୍ତି ଯେ, ଉଭୟ ଅନୁଭବ ଓ ତାଙ୍କ ପତ୍ନୀ ବର୍ଷା ତାଙ୍କୁ ଦୁର୍ବ୍ୟବହାର କରିବା ସହ ଅନୁଭବ ତାଙ୍କ ଉପରକୁ ଛେପ ପକାଇଥିଲେ।
ଇତି ମଧ୍ୟରେ ପୁରୀଘାଟ ଥାନା ଏଫଆଇଆର ସଂଖ୍ୟା ୧୧୮/୨୦୧୯ ରେ ଦଫା ୨୯୪, ୩୫୪(କ), ୩୨୩ ଓ ଆଇପିସି ୩୪ରେ ମାମଲା ରୁଜ୍ଜୁ କରିଛନ୍ତି। ଦୁର୍ବ୍ୟବହାର ଅଭିଯୋଗ ଆଣିଥିବା ମହିଳା ଜଣକ ପୂର୍ବରୁ ସାମ୍ବାଦିକା ଭାବେ କାର୍ଯ୍ୟ କରୁଥିଲେ ବୋଲି ଜଣାପଡିଛି, ତେବେ ସେ କେଉଁ ଗଣମାଧ୍ୟମରେ କାର୍ଯ୍ୟ କରୁଥିଲେ ତାହା ସ୍ପଷ୍ଟ ହୋଇନି।
ସାଂସଦ ଅନୁଭବ ମହାନ୍ତି ତାଙ୍କ ପ୍ରତିକ୍ରିୟାରେ କହିଛନ୍ତି, ଜୁନ ୧୨ ରାତିରେ ଅଭିଯୋଗକାରିଣୀ ମହିଳା ତାଙ୍କ ଘର ସାମ୍ନାରେ ଖରାପ ଭାଷାରେ ଗାଳିମନ୍ଦ କରିଥିଲେ ଓ ସେ ଓ ତାଙ୍କ ପତ୍ନୀ ତାଙ୍କୁ ବୁଝେଇବାକୁ ଯାଇ ବିଫଳ ହେବ ପରେ ପିସିଆରକୁ ଖବର ଦେଇଥିଲେ। ପିସିଆର ସମ୍ପୃକ୍ତ ମହିଳାଙ୍କୁ ସେଠାରୁ ନେଇଥିଲା। ତାଙ୍କୁ ବଦନାମ କରିବାକୁ ଏହା ଷଡଯନ୍ତ୍ର ବୋଲି ଅନୁଭବ କହିଛନ୍ତି।
