ମାଲକାନଗିରି: ମାଓ ଅଧ୍ୟୁଷିତ ମାଲକାନଗିରି ଓ ଚିତ୍ରକୋଣ୍ଡା ବିଧାନସଭା ନିର୍ବାଚନ ମଣ୍ଡଳୀରେ ସ୍ୱଚ୍ଛ, ମୁକ୍ତ ଓ ଅବାଧ ନିର୍ବାଚନ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ରଣକୌଶଳ ଆରମ୍ଭ ହୋଇଛି। ଦୁଇଟି ଯାକ ନିର୍ବାଚନ ମଣ୍ଡଳୀର ବିଭିନ୍ନ ବୁଥରେ ସ୍ୱତନ୍ତ୍ର ଭାବେ ପୁଲିସ ଓ ବିଏସଏଫ ଜବାନଙ୍କର କଡ଼ା ସୁରକ୍ଷା ବ୍ୟବସ୍ଥା ରହିଛି। ଏହାସହ ନିର୍ବାଚନ କାର୍ଯ୍ୟରେ ହେଲିକଫ୍ଟର ନିୟୋଜିତ କରିବା ପାଇଁ ମଧ୍ୟ ନିଷ୍ପତ୍ତି ହୋଇଛି। ମାଓପ୍ରବଣ ବିଚ୍ଛିନ୍ନାଞ୍ଚଳର ୯ଟି ପଞ୍ଚାୟତରେ ପ୍ରାୟ ୬୦ରୁ ଉର୍ଦ୍ଧ୍ୱ ଭୋଟ ଗ୍ରହଣ କେନ୍ଦ୍ର ରହିଛି। ମାଓବାଦୀଙ୍କ ହିଂସାକାଣ୍ଡ ଘଟାଇବା ସମ୍ଭାବନା ଥିବାରୁ ଗ୍ରାମାଞ୍ଚଳରେ ଭୋଟ କେନ୍ଦ୍ର କରା ନଯାଇ ସୁରକ୍ଷା ଦୃଷ୍ଟିରୁ କିଛି ପରିବର୍ତ୍ତନ କରାଯାଇଛି। ବିଶେଷ କରି ସ୍ୱାଭିମାନ ଅଞ୍ଚଳ ଯୋଡ଼ାମ୍ବଠାରେ କଡ଼ାପୁଲିସ ସୁରକ୍ଷା ମଧ୍ୟରେ ଗୋଟିଏ ସ୍ଥାନରେ ୧୦ଟି ବୁଥ ହେବ। ସେହି ବୁଥରେ ମାଓପ୍ରବଣ ଅଞ୍ଚଳର ଭୋଟରମାନେ ସୁରକ୍ଷିତ ଭାବେ ନିଜ ନିଜର ଭୋଟ ଦେବେ। ସେହିପରି ମାଥିଲି ବ୍ଲକସ୍ଥ ମହୁପଦରଠାରେ ସୁରକ୍ଷା ଦୃଷ୍ଟିରୁ ଗୋଟିଏ ସ୍ଥାନରେ ୧୦ଟି ଭୋଟ କେନ୍ଦ୍ର କରାଯିବା ପାଇଁ ନିଷ୍ପତ୍ତି ନିଆଯାଇଛି। ସୂଚନା ଅନୁଯାୟୀ ଏହି ଅଞ୍ଚଳଟି ଛତିଶଗଡ଼ ସୀମାନ୍ତକୁ ଲାଗିଥିବାରୁ ଛତିଶଗଡ଼ ଦରଭା, ବସ୍ତର ଡ଼ିଭିଜନର ମାଓବାଦୀମାନେ ଏହି ସବୁ ଅଞ୍ଚଳରେ ସକ୍ରିୟ ଥାଆନ୍ତି। ଗତ ନିର୍ବାଚନରେ ବୁଥ ଲୁଟ, ଟ୍ରକ ପୋଡ଼ି ଦେଇଥିବାରୁ ପୁଲିସର କଡ଼ା ସୁରକ୍ଷା ମଧ୍ୟରେ ମହୁପଦର ଠାରେ ଗୋଟିଏ ସ୍ଥାନରେ ୧୦ଟି ବୁଥ କରାଯିବ। ସୂଚନା ଯୋଗ୍ୟ ଯେ, ସୁରକ୍ଷା ଦୃଷ୍ଟିରୁ ରାଜ୍ୟ ନିର୍ବାଚନ ଅଧିକାରୀ ଚିତ୍ରକୋଣ୍ଡା ବ୍ଲକରେ ୨୦୧୭ ମସିହାରେ ପଞ୍ଚାୟତ ନିର୍ବାଚନ ବନ୍ଦ ରଖିଥିଲେ।
