ଇଟାନଗର : ନିର୍ବାଚନର ଠିକ ପୂର୍ବରୁ ବିଜେପିକୁ ଅରୁଣାଚଳପ୍ରଦେଶରେ ବଡ଼ ଝଟକା ଲାଗିଛି। ଅରୁଣାଚଳପ୍ରଦେଶରେ ଆସନ୍ତା ମାସରେ ବିଧାନସଭା ନିର୍ବାଚନ ହେବାକୁ ଥିବାବେଳେ ବିଜେପିର ୨ ଜଣ ମନ୍ତ୍ରୀ ଏବଂ ୧୨ ଜଣ ବିଧାୟକ ଦଳ ତ୍ୟାଗ କରି ମେଘାଳୟ ମୁଖ୍ୟମନ୍ତ୍ରୀ କେ.ଏମ୍ ସାଂଗମାଙ୍କ ଦ୍ୱାରା ଗଠିତ ନ୍ୟାସନାଲ ପିପୁଲ୍ସ ପାର୍ଟି (ଏନ୍ପିପି)ରେ ଯୋଗ ଦେଇଛନ୍ତି।
ସୂଚନା ଅନୁସାରେ ରାଜ୍ୟ ଗୃହ ମନ୍ତ୍ରୀ କୁମାର ୱାଇ ଏବଂ ପର୍ଯ୍ୟଟନ ମନ୍ତ୍ରୀ ଜାରକାର ଗାମଲିନ ଏବଂ ଅନ୍ୟ ବିଧାୟକଙ୍କୁ ବିଜେପି ଟକେଟ୍ ଦେବାକୁ ମନା କରିଦେଇଥିଲା। ଏହାପରେ ମନ୍ତ୍ରୀ ଓ ବିଧାୟକମାନେ ବିଦ୍ରୋହକୁ ଓହ୍ଲାଇଥିଲେ। ୱାଇ ଅଭିଯୋଗ କରିଥିଲେ ଯେ ବିଜେପି ମିଥ୍ୟା ପ୍ରତିଶ୍ରୁତି ଦେଉଛି। ଲୋକଙ୍କ ମନରେ ବିଜେପି ପାଇଁ ଆଉ ସମ୍ମାନ ନାହିଁ ଓ ବିଜେପି ତାର ପ୍ରତିଷ୍ଠା ହରାଇ ସାରିଲାଣି। କେବଳ ନିର୍ବାଚନ ଲଢିବେ ନାହିଁ ବରଂ ଅରୁଣାଚଳରେ ସେ ଏନ୍ପିପି ସରକାର ଗଠନ କରି ଦେଖାଇବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି। ପିପୁଲ୍ସ ପାର୍ଟି ଅଫ ଅରୁଣାଚଳ (ପିପିଏ)ର ଜଣେ ବିଧାୟକ ଏବଂ ବିଜେପିର ଅନ୍ୟ ୧୯ ନେତା ଏନ୍ପିପିରେ ସାମିଲ ହୋଇଛନ୍ତି।
