ନୂଆଦିଲ୍ଲୀ : ପହଲଗାମ ଆକ୍ରମଣ ମାମଲାରେ ମୋଦୀ ସରକାରଙ୍କ ଉପରେ ପ୍ରଶ୍ନ ଉଠାଇଥିବା କଂଗ୍ରେସର ପ୍ରଦେଶ ଅଧ୍ୟକ୍ଷ ଅଜୟ ରାୟଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଖେଳନାରେ ଲେମ୍ବୁ, ଲଙ୍କା ଟଙ୍ଗାଇ ରାଫେଲକୁ ନେଇ ବୟାନବାଜି କରିଥିବା କଂଗ୍ରେସର ପ୍ରଦେଶ ଅଧ୍ୟକ୍ଷ ଅଜୟ ରାୟଙ୍କ ବିରୁଦ୍ଧରେ ବାରଣାସୀ ଜିଲାର ଚେତଗଞ୍ଜ ଥାନାରେ ମାମଲା ରୁଜୁ ହୋଇଛି । ଅଜୟ ରାୟ ଜାତୀୟ ଏକତାକୁ କ୍ଷତି ପହଞ୍ଚାଇଛନ୍ତି ଏବଂ ଭୁଲ ବୟାନବାଜି କରି ଗୁଜବ ସୃଷ୍ଟି କରିଥିବା ଧାରା ଲଗାଯାଇଛି । କ୍ୟାଣ୍ଟ ନିବାସୀ ତଥା ରାଷ୍ଟ୍ରବାଦୀ ହିନ୍ଦୁ ଶକ୍ତି ବାହିନୀର ଜାତୀୟ ଅଧ୍ୟକ୍ଷ ପ୍ରଦୀପ କୁମାର ଗୁପ୍ତାଙ୍କ ଅଭିଯୋଗ ପରେ ଏହି ମାମଲା ରୁଜୁ ହୋଇଛି ।
କହିରଖୁଛୁ ପହଲଗାମ ଆତଙ୍କୀ ଆକ୍ରମଣ ପରେ ଅଜୟ ରାୟ ଏକ ଖେଳନା ଜାହାଜରେ ଲେମ୍ବୁ, ଲଙ୍କା ଲଟକାଇ ଏହାକୁ ଭାରତର ରାଫେଲ ସହ ତୁଳନା କରିଥିଲେ । ରାଫେଲ ଲଢୁଆ ବିମାନକୁ ବେକାର କରି ଭାରତୀୟ ସେନାର ମଜା ଉଡାଇବା ସହ ଦେଶର ପ୍ରତିରକ୍ଷା ବ୍ୟବସ୍ଥାକୁ ଅପମାନ କରିଥିଲେ । ସାମାଜିକ ଗଣମାଧ୍ୟମରେ ତାଙ୍କର ଏହି ଭିଡିଓ ଭାଇରାଲ ହୋଇଥିଲା ।
