ଲମତାପୁଟ: କୋରାପୁଟ ଜିଲା ମାଛକୁଣ୍ଡ ପୁଲିସ ଜଣେ ଗଞ୍ଜେଇ ବ୍ୟବସାୟୀଙ୍କ ଘରୁ ବିପୁଳ ପରିମାଣରେ ଗଞ୍ଜେଇ ଜବତ କରିବା ସହ ତାଙ୍କୁ ଗିରଫ କରିଛି। ଗିରଫ ବ୍ୟକ୍ତିଜଣକ ମାଛକୁଣ୍ଡ ଥାନା ଅନ୍ତର୍ଗତ ସାନକିଚବ ଗାଁର ଧନ ମାଣ୍ଡି। ସେ ବାହାର ରାଜ୍ୟକୁ ଗଞ୍ଜେଇ ଚାଲାଣ କରିବା ନେଇ ଲାଗି ନିଜ ଘର ଭିତରେ ବିପୁଳ ଗଞ୍ଜେଇ ଗଛିତ ରଖିଥିଲେ।
ଖବର ପାଇ ମାଛକୁଣ୍ଡ ପୁଲିସ ଧନ ମାଣ୍ଡିଙ୍କ ଘରେ ଚଢ଼ଉ କରିଥିଲା। ଚଢ଼ଉବେଳେ ଘର ଭିତରର ବସ୍ତା ବସ୍ତା ଗଞ୍ଜେଇ ରଖାଯାଇଥିବା ଦେଖିବାକୁ ମିଳିଥିଲା। ପରେ ମାଛକୁଣ୍ଡ ଅତିରିକ୍ତ ତହସିଲଦାର ତଥା ମାଜିଷ୍ଟ୍ରେଟ ଉଦ୍ଧବ ଶବରଙ୍କ ଉପସ୍ଥିତିରେ ଜବତ ୯୩୩ କିଲୋ ଗଞ୍ଜେଇ ଓଜନ କରାଯାଇଥିଲା, ଯାହାର ଆନୁମାନିକ ମୂଲ୍ୟ ପ୍ରାୟ ୫୦ଲକ୍ଷ ଟଙ୍କା ହେବ। ଏହି ଘଟଣାରେ ମାଛକୁଣ୍ଡ ପୁଲିସ ଘର ମାଲିକ ତଥା ଗଞ୍ଜେଇ ମାଫିଆ ଧନଙ୍କୁ ଗିରଫ କରି ଅଦାଲତ ଚାଲାଣ କରିଛି।
