ପ୍ରତିରକ୍ଷା ବଜେଟ୍‍ ୩ ଲକ୍ଷ କୋଟି ଟପିଲା

ଭାରତର ବଜେଟ୍‍ ଇତିହାସରେ ପ୍ରଥମ ଥର ପାଇଁ ପ୍ରତିରକ୍ଷା ବ୍ୟୟବରାଦ ୩ ଲକ୍ଷ କୋଟି ଟଙ୍କା ଟପିଥିବା କାମଚଳା ଅର୍ଥମନ୍ତ୍ରୀ ପୀୟୂଷ ଗୋୟଲ ସୂଚନା ଦେଇଛନ୍ତି। ଗତ ବର୍ଷ ପ୍ରତିରକ୍ଷା ବଜେଟ୍‍ ପରିମାଣ ଥିଲା ୨, ୯୫, ୫୧୧ କୋଟି ଟଙ୍କା। ‘ଆମ ସୈନିକମାନେ ଆମର ଗର୍ବ। ସେମାନେ ଦିନରାତି ଆମ ଦେଶର ସୀମା ଓ ଆମକୁ ରକ୍ଷା କରୁଛନ୍ତି। ତେଣୁ ସେମାନଙ୍କ ପାଇଁ ଆବଶ୍ୟକ ହେଲେ ଆହୁରି ଅଧିକ ବ୍ୟୟ ବରାଦ କରାଯିବ’ ବୋଲି ସେ କହିଛନ୍ତି। ‘ୱାନ ର୍ୟାଙ୍କ ୱାନ ପେନ୍‍ସନ୍‍’ ଯୋଜନା ୪୦ ବର୍ଷ ଧରି କାର୍ଯ୍ୟକାରୀ ହୋଇପାରିନଥିଲା। ପୂର୍ବ ସରକାର ବଜେଟ୍‍ରେ ଏହାକୁ ସାମିଲ କରିଥିଲେ ହେଁ ଲାଗୁ କରିପାରିନଥିଲେ। କିନ୍ତୁ ମୋଦୀଙ୍କ ନେତୃତ୍ୱାଧୀନ ସରକାର ଏହାକୁ କରି ଦେଖାଇଲେ। ଏ ପର୍ଯ୍ୟନ୍ତ ୩୫ ହଜାର କୋଟି ଟଙ୍କା ଏହି ଯୋଜନାରେ ଦିଆଯାଇଛି ବୋଲି ସେ କହିଛନ୍ତି।