କଲ୍ୟାଣସିଂହପୁର: ରାୟଗଡା ଜିଲା କଲ୍ୟାଣସିଂହପୁର ବ୍ଲକ ନାରାୟଣପୁର ପଞ୍ଚାୟତର ଡେଙ୍ଗିଶିଳା ଗ୍ରାମର ବଦିଳି କାଡ୍ରାକା(୭୦)ଙ୍କ ଦୁଇ ତୋଳା ସୁନା କାନର ଦୁର୍ବୃତ୍ତ ଝିଙ୍କି ନେଇଥିବା ଅଭିଯୋଗ ହୋଇଛି । ନାତୁଣୀ ସୁନ୍ଦାରୀ ହିକକାଙ୍କ କହିବା ଅନୁଯାୟୀ, ସବୁଦିନ ପରି ଆଜି ମଧ୍ୟ ସକାଳ ୭ଟା ବେଳେ ଡେଙ୍ଗିଶିଳା ଗ୍ରାମଠାରୁ ପ୍ରାୟ ୨ କିମି ଦୂର ନିଜ ବାଡ଼ିକୁ ଆଈ ବଦିଳି କାଡ୍ରାକା ଯାଇଥିଲେ । ଏହି ସମୟରେ ଜଣେ ମୁଖା ପିନ୍ଧା ଲୋକ ପିଛା କରି ଗୁଡ଼ିଆ ନିକଟକୁ ଯାଇ ବୃଦ୍ଧାଙ୍କ କାନ ଝିଙ୍କିଥିଲା । ଗୋଟିଏ କାନଫୁଲ ବାହାରିବା ପରେ ଅନ୍ୟ କାନଫୁଲଟି ଝିଙ୍କିଥିଲା । ତାହା ନ ବାହାରିବାରୁ ବୃଦ୍ଧାଙ୍କ ମୁଣ୍ଡର ପଛ ଭାଗରେ ଏକ ଶକ୍ତ ବିଧା ମାରି ଚୁଟି ଝିଙ୍କି କାନଫୁଲ ଝିଙ୍କିବାରୁ କାନ ଛିଣ୍ଡି ଯାଇ ସୁନା କାନଫୁଲ ବାହାରି ପଡିଥିଲା । ଏହା ପରେ ନାକଫୁଲ ଝିଙ୍କିବାବେଳେ ନିକଟ ବିଲରେ କାମ କରୁଥିବା ଦୁଇ ଜଣ ଲୋକେ ଧାଇଁ ଆସିବାରୁ ଦୁର୍ବୃତ୍ତ ଫେରାର ହୋଇଯାଇଥିଲା । ଚୋରକୁ ଲୋକେ ଗୋଡ଼ାଇଥିଲେ ସୁଦ୍ଧା ଧରିପାରି ନଥିଲେ । ଥାନାରେ ଅଭିଯୋଗ କରିବା ପରେ ଥାନା ଅଧିକାରୀ ନୀଳକଣ୍ଠ ବେହେରା ଘଟଣା ସ୍ଥଳରେ ପହଞ୍ଚି ତଦନ୍ତ ଚଳାଇଛନ୍ତି । ଥାନା ଅଧିକାରୀ ଶ୍ରୀ ବେହେରାଙ୍କୁ ପଚାରିବାରୁ ସେ କହିଛନ୍ତି, ବର୍ତ୍ତମାନ ଦୁର୍ବୃତ୍ତର କୌଣସି ଅନୁସନ୍ଧାନ ମିଳିନି । ସେ ବାହାର ଲୋକ ନୁହେଁ ଏହି ଅଞ୍ଚଳର ଲୋକ ହୋଇଥିବା ସନ୍ଦେହ କରାଯାଉଛି। ବର୍ତ୍ତମାନ ଖୋଜା ଚାଲିଛି । ତୁରନ୍ତ ଚୋରକୁ ଗିରଫ କରାଯିବ ବୋଲି ସେ କହିଛନ୍ତି ।
Comments are closed.