ଅହମଦାବାଦ: ଗୁଜରାଟର ଅହମଦାବାଦରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ଏଠାରେ ଜଣେ ୭୮ ବର୍ଷ ବୟସ୍କ ବୃଦ୍ଧଙ୍କୁ ଏସବିଆଇ ପକ୍ଷରୁ ସୂଚନା ମିଳିଲା ଯେ, ତାଙ୍କ ଆକାଉଣ୍ଟରୁ ଟିଡିଏସ୍ ରାଶି କଟାଯାଇଛି। ଅଜବ କଥା ହେଉଛି, ବୃଦ୍ଧଙ୍କର ସେହି ବ୍ୟାଙ୍କରେ କୌଣସି ଆକାଉଣ୍ଟ ହିଁ ନାହିଁ।
ବ୍ୟାଙ୍କ ପକ୍ଷରୁ ବୃଦ୍ଧଙ୍କ ନିକଟକୁ ପଠାଯାଇଥିବା ପତ୍ରରେ ଲେଖାଯାଇଛି ଯେ, ଆପଣଙ୍କ ଆକାଉଣ୍ଟରେ ୨୪ ଲକ୍ଷ ଟଙ୍କା ଅଛି, ଯେଉଁଥିରୁ ଟିଡିଏସ ରାଶି ୫୦ ହଜାର ଟଙ୍କା କଟାଯାଇଛି। ଯେତେବେଳେ ବୃଦ୍ଧ ଜଣକ ବ୍ୟାଙ୍କରେ ପହଞ୍ଚି ମ୍ୟାନେଜରଙ୍କୁ ସମ୍ପୂର୍ଣ୍ଣ ଘଟଣା ଜଣାଇଲେ, ସେତେବେଳେ ମ୍ୟାନେଜର ମଧ୍ୟ ଏହାକୁ ବିଶ୍ୱାସ କରି ନଥିଲେ। ଅପରପକ୍ଷେ ଆୟକର ବିଭାଗ ମଧ୍ୟ ବୃଦ୍ଧଙ୍କୁ ନୋଟିସ୍ ପଠାଇଛି।
ହର୍ଷଦ ଛୋଟେଲାଲ ମେହେତା ବ୍ୟାଙ୍କ ମ୍ୟାନେଜରଙ୍କୁ କହିଥିଲେ ଯେ, ଏସବିଆଇରେ ତାଙ୍କର କୌଣସି ଆକାଉଣ୍ଟ ନାହିଁ। ଏହାପରେ ବ୍ୟାଙ୍କ ତାଙ୍କୁ କେୱାଇସିରେ ଦିଆଯାଇଥିବା ପ୍ୟାନ କାର୍ଡର ଫଟୋ ଦେଖାଇଥିଲା, ଯେଉଁଥିରେ ତାଙ୍କ ନାମ ଏବଂ ଫଟୋ ଥିଲା। ଏହାପରେ ହର୍ଷଦ ମେହେତା ଆୟକର ବିଭାଗର ଓପନ୍ ହାଉସ୍ରେ ପହଞ୍ଚି ବ୍ୟାଙ୍କରେ ଯାଞ୍ଚ କରିବାକୁ ନିବେଦନ କରିଥିଲେ। ଏହାପରେ ଜଣାପଡ଼ିଥିଲା ଏହି ଭୁଲ୍ ବିଷୟରେ।
ହର୍ଷଦ ମେହେତାଙ୍କ କହିବାକଥା, ଯେତେବେଳେ ଏସବିଆଇରେ ତାଙ୍କର କୌଣସି ଆକାଉଣ୍ଟ ହିଁ ନାହିଁ, ତେବେ ତାଙ୍କ ପାନ୍ କାର୍ଡର ବିବରଣୀ ବ୍ୟାଙ୍କ ପାଖରେ କେମିତି ପହଞ୍ଚିଲା? ତାପରେ ଯେତେବେଳେ ଏହି ଘଟଣାର ତଦନ୍ତ କରାଗଲା, ସେତେବେଳେ ଜଣାପଡ଼ିଥିଲା ଯେ, ଏହି ଆକାଉଣ୍ଟ ହର୍ଷଦ ରାୟ ଚୁନିଲାଲ ମେହେତା ନାମକ ଜଣେ ବ୍ୟକ୍ତିଙ୍କର, ଯାହା ୧୯୭୭ ମସିହାରୁ ଚାଲୁଛି। ଆଶ୍ଚର୍ଯ୍ୟକର ବିଷୟ ହେଉଛି, ଏବେ ଏହି ବ୍ୟକ୍ତିଙ୍କର କୌଣସି ଚିହ୍ନ ବର୍ଣ୍ଣ ନାହିଁ।
