ନୂଆଦିଲ୍ଲୀ: ଅଧିକ ବେତନ ଦେବା ନେଇ ଆଇଟି ସେକ୍ଟର ସର୍ବଦା ଚର୍ଚ୍ଚାରେ ରହିଥାଏ। ଗତ ବର୍ଷ ସର୍ବାଧିକ ବେତନ ପ୍ରାପ୍ତ ୧୦ଜଣ ସିଇଓଙ୍କ ମଧ୍ୟରେ ୭ ଜଣ ଆଇଟି କ୍ଷେତ୍ରରୁ ଥିଲେ। ତେବେ କ’ଣ ଆପଣ ଜାଣନ୍ତି ଯେ, ଭାରତରେ ଆଇଟି ସେକ୍ଟରେ ସବୁଠାରୁ ଅଧିକ ବେତନ କାହାକୁ ମିଳିଥାଏ? ଏହାର ଉତ୍ତର ପ୍ରାୟତଃ ଖୁବ୍ ଲୋକଙ୍କୁ ଜଣାଥିବ। ଭାରତରେ ସର୍ବାଧିକ ବେତନ ପ୍ରାପ୍ତ ଆଇଟି ସିଇଓ ହେଉଛନ୍ତି ଥିଏରୀ ଡେଲାପୋର୍ଟେ। ସେ ହେଉଛନ୍ତି ୱିପ୍ରୋର ମୁଖ୍ୟ କର୍ଯ୍ୟନିର୍ବାହୀ ଅଧିକାରୀ(ସିଇଓ)। କିନ୍ତୁ କୌତୁହଳର ବିଷୟ ହେଉଛି, ସେ ଭାରତୀୟ ନୁହଁନ୍ତି। ସେ ଫ୍ରାନ୍ସର ନାଗରିକ ଏବଂ ୨୦୨୦ରେ ୱିପ୍ରୋରେ ଯୋଗ ଦେଇଥିଲେ। ଥିଏରୀ ଡେଲାପୋର୍ଟେ ୱିପ୍ରୋର ପରିଚାଳନା ନିର୍ଦେଶକ(ଏମ୍ଡି) ମଧ୍ୟ ଅଛନ୍ତି।
ଥିଏରୀ ଡେଲାପୋର୍ଟେଙ୍କୁ ଆର୍ଥିକ ବର୍ଷ ୨୩ରେ ୮୨ କୋଟି ଟଙ୍କାର ପ୍ୟାକେଜ୍ ମିଳିଥିଲା। ଏଥିରେ ତାଙ୍କ ଦରମା, ବୋନସ୍, ଭତ୍ତା, କମିସନ୍ ଏବଂ ଅନ୍ୟାନ୍ୟ ସୁବିଧା ଅନ୍ତର୍ଭୁକ୍ତ। ବିଶ୍ବ ଆଇଟି କ୍ଷେତ୍ରରେ ତାଙ୍କର ୩୦ ବର୍ଷର ଅଭିଜ୍ଞତା ଅଛି। ୱିପ୍ରୋରେ ଯୋଗଦେବା ପୂର୍ବରୁ ସେ କ୍ୟାପଜେମିନିର ସିଇଓ ଥିଲେ। ଏହା ଫ୍ରାନ୍ସର ଏକ ଆଇଟି କମ୍ପାନୀ। ଜୁଲାଇ ୨୦୨୦ରେ ସେ ୱିପ୍ରୋର ଏମଡି ତଥା ସିଇଓ ଭାବେ ନିଯୁକ୍ତ ହୋଇଥିଲେ।
ସମସ୍ତ ସେକ୍ଟରକୁ ମିଶାଇ କହିଲେ, ସର୍ବାଧିକ ବେତନ ପାଉଥିବା ସିଇଓ ତଥା ଏମଡି ହେଉଛନ୍ତି ହିରୋ ମୋଟୋକର୍ପର ପୱନ ମୁଞ୍ଜାଲ। ବ୍ଲୁମବର୍ଗ ତଥ୍ୟ ଅନୁଯାୟୀ, ୨୦୨୨-୨୩ ମସିହାରେ ତାଙ୍କ ପ୍ୟାକେଜ୍ ୯୯ କୋଟି ଟଙ୍କା ଥିଲା। ଏହି ପରିପ୍ରେକ୍ଷୀରେ କୌଣସି କ୍ଷେତ୍ରରେ ସର୍ବାଧିକ ବେତନ ନେଉଥିବା ଲୋକଙ୍କ ତାଲିକାରେ ଥିଏରୀ ଦ୍ୱିତୀୟ ସ୍ଥାନରେ ଅଛନ୍ତି।
