ରେଙ୍ଗାଲିକ୍ୟାମ୍ପ: କେନ୍ଦ୍ର ସରକାରଙ୍କଠାରୁ ରାଜ୍ୟ ସରକାର ପର୍ଯ୍ୟନ୍ତ ସମସ୍ତେ ସ୍ୱଚ୍ଛତା ଉପରେ ଗୁରୁତ୍ୱାରୋପ କରି ସ୍ୱଚ୍ଛ ପରିବେଶ ସୃଷ୍ଟି ପାଇଁ ବିଭିନ୍ନ ଜନସଚେତନତା କାର୍ଯ୍ୟକ୍ରମମାନ କରୁଛନ୍ତି। ଏଥିପାଇଁ ଗାଁ ଗାଁରେ ବେଶ୍ ପ୍ରଚାର ପ୍ରସାର ମଧ୍ୟ ହେଉଛି ଅଶିକ୍ଷିତ ଲୋକଙ୍କୁ ସଚେତନ କରିବା ପାଇଁ। ହେଲେ ଅଶିକ୍ଷିତ ଗାଉଁଲି ଲୋକମାନଙ୍କ ଅପେକ୍ଷା ଶିକ୍ଷିତ ଭଦ୍ର ମଣିଷମାନଙ୍କ ମଧ୍ୟରେ ସଚେତନତାର ଅଧିକ ଅଭାବ ଦେଖାଦେଉଛି। ସ୍ବଚ୍ଛତା ଅଭିଯାନର ଆବଶ୍ୟକତା ଗ୍ରାମାଞ୍ଚଳ ଅପେକ୍ଷା ସହରମାନଙ୍କରେ ଅଧିକ ରହୁଥିବା ମନେ ହୁଏ। କାରଣ ଶିକ୍ଷିତ ସମାଜରେ ଏହାକୁ ଅଣଦେଖା କରାଯାଇଛି। ଏହିପରି ଏକ ଦୃଶ୍ୟ ଦେଖିବାକୁ ମିଳିଛି ଅତାବିରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ। ସ୍ବାସ୍ଥ୍ୟକେନ୍ଦ୍ରର ଭିତର ଚକାଚକ୍, ହେଲେ ବାହାର ପରିବେଶ ଦାନ୍ତ ଦେଖାଉଛି ସ୍ୱଚ୍ଛ ଭାରତ ଅଭିଯାନକୁ। ସ୍ବାସ୍ଥ୍ୟକେନ୍ଦ୍ରର ବାହାରେ ଲାଗିଛି ଏକ ସ୍ୱଚ୍ଛ ଓ ସୁସ୍ଥ ପରିବେଶ ସଚେତନତାର ବାର୍ତ୍ତା ଦେଉଥିବା ହୋର୍ଡିଂ। କିନ୍ତୁ ତାର ଚାରିପଟେ ଜମି ରହିଛି କୁଢ଼ କୁଢ଼ ମଇଳା ଆବର୍ଜନା। ଏହି ଦୃଶ୍ୟ ଲୋକଙ୍କୁ କି ବାର୍ତ୍ତା ଦେବ ନିଜେ ତ ଅଣନିଃଶ୍ୱାସୀ ହୋଇପଡ଼ିଛି। ସ୍ବାସ୍ଥ୍ୟକେନ୍ଦ୍ରର ଭିତରେ ମଧ୍ୟ ଆବର୍ଜନା ଗଦା ଗଦା। ମଶା ମାଛିଙ୍କ ପ୍ରାଦୁର୍ଭାବ ବଢ଼ି ଚାଲିଛି। ସ୍ବାସ୍ଥ୍ୟକେନ୍ଦ୍ରର ସମସ୍ତ ସ୍ବାସ୍ଥ୍ୟ ଅଧିକାରୀ ତଥା ଏନଏସିର କର୍ତ୍ତୃପକ୍ଷ ପ୍ରତିଦିନ ଏହି ରାସ୍ତା ଦେଇ ଯାଉଛନ୍ତି। ହେଲେ ଏହା ଉପରେ କାହାରି ନଜର ପଡ଼ୁନାହିଁ।
Popular Categories
Previous article
Next article