ଗୁରୁଡିଝାଟିଆ : ମହାନଦୀର ବନ୍ୟାଜଳରେ କୃଷକମାନେ ନିଜର ଡେରିଥିବା ସବୁଜ ପନିପରିବା ଓ ଧାନକ୍ଷେତ ବୁଡିରହିଥିବାରୁ ମୁଣ୍ଡରେ ହାତଦେଇ ବସିଛନ୍ତି । ଚାଷକ୍ଷେତରେ ୭ଫୁଟ ଉଚ୍ଚର ବନ୍ୟାଜଳ ରହିଅଛି। ସାପୁଆର ରମ୍ପାଘାଇ ଦେଇ ପୁରୁଣା କଟକ-ସମ୍ବଲପୁର ରାସ୍ତାର ନିଧିପୁର ଠାରେ ବନ୍ୟାଜଳ ଆସିବା ଓ ପାଇକରାପୁର ଓ ଭୂୟାଁଯୋର ଦେଇ ମହାନଦୀର ବନ୍ୟାଜଳ ପ୍ରବେଶ କରିବା ପରେ ମହାକାଳବସ୍ତ, ଘଣ୍ଟିଖାଲ, ଧୁରୁଷିଆ, କଖଡି ଓ ମଞ୍ଚେଶ୍ୱର ପଞ୍ଚାୟତର ଶହଶହ ଏକର ପରିବା ଓ ଧାନକ୍ଷେତ ଉଜୁଡିଯିବା ଅବସ୍ଥାରେ ରହିଛି । ଯଦିଓ ମହାନଦୀର ବନ୍ୟାସ୍ତର ହ୍ରାସ ପାଇଛି ତଥାପି ରମ୍ପାଘାଇ ଦେଇ ବନ୍ୟାଜଳ ପ୍ରବାହିତ ହେଉଥିବାରୁ ୪-୫ ଦିନ ଭିତରେ ଯଦି ଚାଷକ୍ଷେତରୁ ବନ୍ୟାଜଳ ନିଷ୍କାସିତ ନହୁଏ ତାହାଲେ ଗତବର୍ଷ ଭଳି ଚଳିତବର୍ଷ ମଧ୍ୟ କୃଷକ ପରିବାର ଉଚ୍ଛନ୍ନ ହୋଇଯିବେ।
ପୁରୁଣା କଟକ-ସମ୍ବଲପୁର ରାସ୍ତାର ନିଧିପୁର ଠାରେ ୩ଫୁଟର ବନ୍ୟାଜଳ ପ୍ରବାହିତ
ମହାନଦୀର ଉପନଦୀ ସାପୁଆ କୂଳ ଲଂଘିବା ପରେ ଜେନାପୁରର ରମ୍ପା ଠାରେ ପୂର୍ବବର୍ଷଠାରୁ ଥିବା ୩୦ ଫୁଟ୍ ମୁକୁଳା ଘାଇରେ ଏବେ ବି ବନ୍ୟାଜଳ ପ୍ରବାହିତ ହେଉଥିବାରୁ ପୁରୁଣା କଟକ-ସମ୍ବଲପୁର ରାସ୍ତାର ନିଧିପୁର ଠାରେ ଏବେବି ୩ଫୁଟର ବନ୍ୟାଜଳ ପ୍ରବାହିତ ହେଉଛି । ଯଦିଓ ଗତକାଲି ଅପେକ୍ଷା ଆଜି ମହାନଦୀର ଜଳସ୍ତର ହ୍ରାସ ପାଇଛି । ସେହିଭଳି ଭାବରେ କଖଡି-କପୁରସିଂହ ରାସ୍ତାରେ ବିଷ୍ଣୁପୁରର ପାଟୁଳିଗାଡିଆ, କଖଡିର ଦଣ୍ଡା ନିକଟରେ ବନ୍ୟାଜଳ ପ୍ରବାହିତ ହେଉଥିବାରୁ କଖଡିରୁ କପୁରସିଂହ ଯାତାୟାତ ସଂପୂର୍ଣ୍ଣ ବନ୍ଦ ହୋଇଛି । ଏବେବି ନିଧିପୁର ଠାରେ ବନ୍ୟାଜଳ ପ୍ରବାହିତ ହେଉଥିବାରୁ କୌଣସି ଯାନବାହାନ ଯାତାୟାତ କରିପାରୁନାହିଁ। ତେଣୁ କଟକରୁ ଧବଳେଶ୍ୱର କଖଡି ଦେଇ ଢେଙ୍କାନାଳ, ଅନୁଗୁଳ, ସମ୍ବଲପୁର ଏପରିକି ଆଠଗଡକୁ ଯାତାୟାତ ସମ୍ଭବ ହୋଇପାରୁନଥିବାରୁ ୫୫ନଂ ଜାତୀୟ ରାଜପଥ ଦେଇ ଯାନବାହାନ ଚଳାଚଳ କରୁଛି।
