ଭୁବନେଶ୍ବର: ପବିତ୍ର ରଥଯାତ୍ରା ଅବସରରେ ଭୁବନେଶ୍ବର ଉପକଣ୍ଠ ସୁନ୍ଦରପଦାସ୍ଥିତ ଛବିଘର(ଶିଶୁ ଚିତ୍ରଶିଳ୍ପୀଙ୍କ ଅଗ୍ରଣୀ ଅନୁଷ୍ଠାନ)ର ନିଜସ୍ଵ ପ୍ରଦର୍ଶନୀ କକ୍ଷରେ ଅନନ୍ୟ ଜାତୀୟ ଶିଶୁ ଚିତ୍ରକଳା ପ୍ରଦର୍ଶନୀ ‘ଚିତ୍ର ଉତ୍ସବ’ ଉଦ୍ଘାଟିତ ହୋଇଯାଇଛି। ଏହି ଅବସରରେ ଓଡ଼ିଶାର ସୁନାମଧନ୍ୟ ତଥା ବରେଣ୍ୟ ଚିତ୍ରଶିଳ୍ପୀ ବଳଦେବ ମହାରଥା ମୁଖ୍ୟ ଅତିଥି, ଓଡ଼ିଶା ପ୍ରଶାସନିକ ଅଧିକାରୀ ସନ୍ୟାସୀ ବେହେରା, କେନ୍ଦ୍ରୀୟ ବିଦ୍ୟାଳୟ ନଂ-୨ର ଅଧ୍ୟକ୍ଷ ଡଃ ଅଞ୍ଜନ କୁମାର ଖଟୁଆ ଏବଂ ଗୁରୁମା ସବିତାରାଣୀ ମିଶ୍ର ପ୍ରମୁଖ ଯୋଗଦାନ ପୂର୍ବକ ପ୍ରଦୀପ ପ୍ରଜ୍ବଳନ କରି ଶିଶୁ ଚିତ୍ରଶିଳ୍ପୀମାନଙ୍କୁ ଆଶୀର୍ବଚନ ପ୍ରଦାନ କରିଥିଲେ। କେବଳ ଯେ ପାଠପଢ଼ା ନୁହଁ, ଆଜିର ଜାତୀୟ ଶିକ୍ଷା ନୀତି ନିୟମ ଅନୁଯାୟୀ ପ୍ରତ୍ୟେକ ଛାତ୍ରଛାତ୍ରୀ ଚିତ୍ର, ନୃତ୍ୟ, ସଙ୍ଗୀତ ଓ ଅଭିନୟ ପ୍ରତି ମନନିଯୋଗ କରିବା ପାଇଁ ବରେଣ୍ୟ ଅତିଥିବୃନ୍ଦ ମତ ପ୍ରକାଶ କରିଥିଲେ। ଏହି ଜାତୀୟ ଶିଶୁ ଚିତ୍ରକଳା ପ୍ରଦର୍ଶନୀ ‘ଚିତ୍ର ଉତ୍ସବ’ରେ ଭୁବନେଶ୍ବର ସମେତ ଆମ ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ପ୍ରତିଷ୍ଠିତ ବିଦ୍ୟାଳୟର ଶତାଧିକ ଛାତ୍ରଛାତ୍ରୀମାନଙ୍କ ସୃଜନାତ୍ମକ ଶୈଳୀରେ ଅଙ୍କିତ ଚିତ୍ରକଳା ସ୍ଥାନିତ ହୋଇଛି। ଏହି ପ୍ରଦର୍ଶନୀ ଆସନ୍ତା ମାସ ଜୁଲାଇ ୨୦ ତାରିଖ ପର୍ଯ୍ୟନ୍ତ ଶିଶୁ ଚିତ୍ରଶିଳ୍ପୀ, କଳାନୁରାଗି, ଛାତ୍ରଛାତ୍ରୀ ତଥା ଅଭିଭାବକମାନେ ଦେଖିବାର ସୁଯୋଗ ନେବା ସହ ଅଂଶଗ୍ରହଣକାରୀ ଶିଶୁ ଚିତ୍ରଶିଳ୍ପୀମାନଙ୍କୁ ଉତ୍ସାହିତ କରିବା ପାଇଁ ଅନୁଷ୍ଠାନର ପ୍ରତିଷ୍ଠାତା ଅତସୀ ବସୁ ଜେନା ସୂଚନା ଦେଇଛନ୍ତି। ଚିତ୍ରଶିଳ୍ପୀ ଅମର କୁମାର ଜେନାଙ୍କ ସଂଯୋଜନାରେ ଆୟୋଜିତ ଆଶୀର୍ବଚନ କାର୍ଯ୍ୟକ୍ରମ ଏବଂ ଚିତ୍ରକଳା ପ୍ରଦର୍ଶନୀକୁ କଳାଶିକ୍ଷକ ରବୀନ୍ଦ୍ର କୁମାର ମହାରଣା, ଜଗନ୍ନାଥ ଦାସ, ରବିନାରାୟଣ ବନିକ, ତନୁଶ୍ରୀ ବୋଷ, ଅମର କୁମାର ଜେନା, ମୌସୁମୀ ମିଶ୍ର ପ୍ରମୁଖ ପରିଚାଳନା କରିଥିଲେ। ଶେଷରେ ଶିଶୁ ନୃତ୍ୟଶିଳ୍ପୀ ତମନ୍ନା ଦାସ ଓ ଦିପ୍ରନ୍ବୀତା ଦଳାଇଙ୍କ ଓଡ଼ିଶୀ ନୃତ୍ୟ ଦର୍ଶକମାନଙ୍କୁ ମନ୍ତ୍ରମୁଗ୍ଧ କରିଥିଲା। ସର୍ବଶେଷରେ କଳାଶିକ୍ଷକ ରବୀନ୍ଦ୍ର କୁମାର ମହାରଣା ଧନ୍ୟବାଦ ଅର୍ପଣ କରିଥିଲେ।
ପ୍ରକାଶ ଥାଉକି, ଦୀର୍ଘ ୨୫ ବର୍ଷ ଧରି ଶିଶୁ ଚିତ୍ରଶିଳ୍ପୀଙ୍କ ଚିତ୍ରକଳାକୁ ନେଇ ବିଭିନ୍ନ କାର୍ଯ୍ୟକ୍ରମ କରିଆସୁଥିବା ଅନୁଷ୍ଠାନ ‘ଛବିଘର’ ମହାମାରୀ କରୋନା ସମୟରେ ଆଭାସୀ ମାଧ୍ୟମରେ ବିଭିନ୍ନ ଚିତ୍ରକଳା ସମନ୍ଧୀୟ ପ୍ରତିଯୋଗିତା, ଆଲୋଚନାଚକ୍ର, କର୍ମଶାଳା କରି ଶିଶୁ ଚିତ୍ରଶିଳ୍ପୀଙ୍କ ଲୁକାୟିତ ପ୍ରତିଭାକୁ ଲୋକଲୋଚନକୁ ଆଣିବାର ପ୍ରୟାସ କରି ଅଗ୍ରଣୀ ତଥା ପ୍ରମୁଖ ଶିଶୁ ଚିତ୍ରଶିଳ୍ପୀ ଅନୁଷ୍ଠାନ ଭାବେ ସାରା ରାଜ୍ୟରେ ପରିଚିତ ହୋଇପାରିଛି।
