ମୋ ଜୀବନ ମୋତେ ବହୁତ ଥର ତଳେ ପକାଇବାକୁ ଚେଷ୍ଟା କରିଛି। ମୁଁ ପୁଣି ଥରେ ଠିଆ ହୋଇଛି: ବର୍ଷା ପ୍ରିୟଦର୍ଶିନୀ
ଭୁବନେଶ୍ୱର: ରମାଦେବୀ ମହିଳା ବିଶ୍ୱବିଦ୍ୟାଳୟ ପକ୍ଷରୁ ‘ବସନ୍ତ ଉତ୍ସବ’ର ଅଷ୍ଟମ ସଂସ୍କରଣ ଆଜିଠାରୁ ଆରମ୍ଭ କରିଛି। ଉତ୍ସବରେ ପ୍ରଖ୍ୟାତ ସାହିତ୍ୟିକା ଡକ୍ଟର ଗାୟତ୍ରୀବାଳା ପଣ୍ଡା ମୁଖ୍ୟଅତିଥି ଭାବେ ଯୋଗଦେଇ ‘ବସନ୍ତ ଉତ୍ସବ’କୁ ଉଦଘାଟନ କରିଛନ୍ତି। ଅନ୍ୟମାନଙ୍କ ମଧ୍ୟରେ ଭୁବନେଶ୍ବର ମେୟର ସୁଲୋଚନା ଦାସ ଏବଂ ଅଭିନେତ୍ରୀ ବର୍ଷା ପ୍ରିୟଦର୍ଶିନୀ ଅତିଥି ଭାବେ ଯୋଗଦେଇଥିଲେ।
ଏହି ଅବସରରେ ପ୍ରଖ୍ୟାତ ସାହିତ୍ୟିକା ଗାୟତ୍ରୀବାଳା ପଣ୍ଡା ରମାଦେବୀ ମହିଳା ବିଶ୍ବବିଦ୍ୟାଳୟରେ ପାଠ ପଢୁଥିବା ଛାତ୍ରୀମାନଙ୍କ ମଧ୍ୟରେ ନିବିଡ ବନ୍ଧନ ସୃଷ୍ଟି କରିବା ସହ ଉତ୍ସାହ ଭରିବା ପାଇଁ ଏଭଳି ବସନ୍ତ ଉତ୍ସବ ଆୟୋଜନ କରାଯାଇଛି ବୋଲି ପ୍ରକାଶ କରିଥିଲେ। ଏହି ଅବସରରେ ଛାତ୍ରୀମାନେ ସେମାନଙ୍କ ନିଜ କ୍ୟାରିୟର ପ୍ରତି ଧ୍ୟାନ ଦେବା ଆବଶ୍ୟକ ବୋଲି ସେ ପରାମର୍ଶ ଦେଇଥିଲେ।
କାର୍ଯ୍ୟକ୍ରମରେ ଯୋଗଦେଇ ଜୀବନରେ ଝଡ଼ଝଞ୍ଜା ନେଇ ମଞ୍ଚରେ ବର୍ଷା ପ୍ରିୟଦର୍ଶିନୀଙ୍କ ମନ୍ତବ୍ୟ ରଖିଥିଲେ। ଛାତ୍ରୀଙ୍କ ସାମ୍ନାରେ ନିଜ ଜୀବନର କାହାଣୀ ବଖାଣି କହିଥିଲେ ଯେ ମୋ ଜୀବନ ମୋତେ ବହୁତ ଥର ତଳେ ପକାଇବାକୁ ଚେଷ୍ଟା କରିଛି। ମୁଁ ପୁଣି ଥରେ ଠିଆ ହୋଇଛି। ବହୁଲୋକ ଅନ୍ୟର ଗୋଡ଼ ଟାଣନ୍ତି। ମୋ ନାଁରେ ବି ଅପପ୍ରଚାର ହୋଇଛି। ସାମାଜିକ ଗଣମାଧ୍ୟମଠାରୁ ଦୂରେଇ ରହିବା ସହିତ ଏହାର ସଦୁପଯୋଗ ବ୍ୟବହାର କରିବାକୁ ଅଭିନେତ୍ରୀ ବର୍ଷା ପ୍ରିୟଦର୍ଶିନୀ ଛାତ୍ରୀମାନଙ୍କୁ ଆହ୍ବାନ ଦେଇଥିଲେ।
ଅନ୍ୟମାନଙ୍କ ମଧ୍ୟରେ କୁଳପତି ପ୍ରଫେସର ଅପରାଜିତା ଚୌଧୁରୀ, ପିଜି କାଉନସିଲ ଅଧ୍ୟକ୍ଷ ଉପସ୍ଥିତ ଥିଲେ।
୫ ଦିନ ଧରି ଚାଲିବାକୁ ଥିବା ଏହି ବସନ୍ତ ଉତ୍ସବରେ ଛାତ୍ରୀମାନଙ୍କ ମଧ୍ୟରେ ବିଭିନ୍ନ ପ୍ରତିଯୋଗୀତା ଅନୁଷ୍ଠିତ ହେବ। ଶେଷ ଦିନରେ ବିଶ୍ବବିଦ୍ୟାଳୟର ସମସ୍ତ ଛାତ୍ରୀମାନେ ହୋଲି ଖେଳିବେ।
