ବଲାଙ୍ଗିର :ଦୀର୍ଘ ୮ ବର୍ଷ ଧରି ପୁଅର ଖୋଜ ଖବର ମିଳୁ ନଥିଲା । ବାପା-ମା’ ନୟାନ୍ତ ହୋଇ ପୁଅକୁ ଫେରି ପାଇବାର ଆଶା ଛାଡି ଦେଇଥିଲେ । କିନ୍ତୁ ଅଚାନକ ପୁଅ ଘରେ ପହଞ୍ଚିଲା । ହଠାତ ପୁଅକୁ ଦେଖି ପରିବାର ଲୋକେ ସ୍ତମ୍ଭୀଭୁତ ହୋଇଗଲେ । ବାପା-ମା’ ପୁଅକୁ ଦେଖି ଖୁସିରେ ବିଭୋର । ଏଭଳି ଏକ ଖବର ଅସିଛି ଲାଠୋର ଥାନା ଟଙ୍କପାଣି ଗାଁରୁ ।
ଟଙ୍କପାଣି ଗାଁର ସୁନ୍ଦର ହିଆଲଙ୍କ ସାନ ପୁଅ ଜିତେନ୍ଦ୍ର । ୨୦୧୪ ଅଗଷ୍ଟ ମାସରେ ଜିତେନ୍ଦ୍ର ଟଙ୍କପାଣିରୁ ଲାଠୋର ବଜାରକୁ ଯାଇଥିଲେ । ତା’ପରେ ସେ ଫେରି ନଥିଲେ । ପରିବାର ଲୋକେ ବହୁତ ଖୋଜାଖୋଜି କରିଥିଲେ । ନିଖୋଜ ଜିତେନ୍ଦ୍ରଙ୍କର କୌଣସି ଖୋଜଖବର ପାଇ ପାରି ନଥିଲେ । ତେବେ ସୁନୀଲ ଦାସ ନାମକ ଜଣେ ସମାଜସେବୀ ଜିତେନ୍ଦ୍ରଙ୍କୁ ଠାବ କରିଥିଲେ । ତାଙ୍କୁ ପଚରା ଉଚୁରା କରି ଘର ଠିକଣା ପାଇଥିଲେ । ଜିତେନ୍ଦ୍ରଙ୍କୁ ଗାଡିରେ ଆଣି ପରିବାର ପାଖରେ ପହଞ୍ଚାଇଥିଲେ । ତଥ୍ୟ ଅନୁସାରେ, ପୂର୍ବରୁ ଜିତେନ୍ଦ୍ରଙ୍କୁ ମହାରାଷ୍ଟ୍ରର ଅହମଦନଗର ସହରର ବସଷ୍ଟାଣ୍ଡରୁ ଉଦ୍ଧାର କରାଯାଇଥିଲା । ସେ ମାନସିକ ରୋଗରେ ପୀଡ଼ିତ ଥିଲେ । ଏକ ଘରୋଇ ସ୍ୱେଚ୍ଛାସେବୀ ସଂସ୍ଥା ସହାୟତାରେ ଜିତେନ୍ଦ୍ରଙ୍କୁ ରଖାଯାଇ ଚିକିତ୍ସା କରାଯାଇଥିଲା । ସେ ସୁସ୍ଥ ହେବା ପରେ ତାଙ୍କୁ ଗାଁରେ ସମାଜସେବୀ ଶ୍ରୀ ଦାସ ଛାଡିଛନ୍ତି ।
