ପୁରୀ: ଶ୍ରୀମନ୍ଦିର ସେବାୟତ କୃଷ୍ଣ ପ୍ରତିହାରୀ ହତ୍ୟା ମାମଲା । ଘଟଣାକୁ ନେଇ ଆଜି ସାମ୍ବାଦିକ ସମ୍ମିଳନୀ କରି ପ୍ରତିକ୍ରିୟା ରଖିଛନ୍ତି ପୁରୀ ଏସପି । ଏହି ହତ୍ୟା ଘଟଣାରେ ଆଉ ୪ଜଣଙ୍କୁ ଗିରଫ କରାଯାଇଥିବା ପୁରୀ ଏସପି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ତାହା ସହ ଏତଲାରେ ନାମ ଥିବା ୩ଜଣଙ୍କ ସହ ଆଉ ଜଣେ ମଧ୍ୟ ଗିରଫ ହୋଇଥିବା ଏସପି କହିଛନ୍ତି । ଗିରଫ ହୋଇଥିବା ଅଭିଯୁକ୍ତ ମାନେ ହେଲେ କୁନମୁନ ସୁଆର, ଟୁଟୁ ମହାପାତ୍ର, ହରି ପଣ୍ଡା ଓ ଜଗନ ଖଟେଇ ବୋଲି ପୁଲିସ ସୂଚନା ଦେଇଛି ।
ସମସ୍ତ ଅଭିଯୁକ୍ତଙ୍କୁ ପୁଲିସ କୋରାପୁଟରୁ ଗିରଫ କରାଯାଇଥିବା ସୂଚନା ଦିଆଯାଇଛି । ଏସପିଙ୍କ ସୂଚନା ଅନୁସାରେ ହତ୍ୟା ପରେ ଅଭିଯୁକ୍ତ ମାନେ ବାଇକ ଯୋଗେ ସାତପଡ଼ା ଚାଲିଯାଇଥିଲେ । ସେଠାରେ ଚିଲିକାକୁ ଯାଇ ଗୋଟିଏ ବୋଟରେ ଦୁଇ ରାତି କଟାଇଥିଲେ । ପରେ ସେଠାରୁ ରାଜ୍ୟ ବାହାରକୁ ଯିବାକୁ ପ୍ରୟାସ କରୁଥିବା ବେଳେ ପୁଲିସ ସେମାନଙ୍କୁ ଧରିଛି ବୋଲି ଏସପି ସୂଚନା ଦେଇଛନ୍ତି । ତାହା ସହ ଏସପି ଆହୁରି କହିଛନ୍ତି ଗିରଫ ହୋଇଥିବା ଏହି ୪ ଅଭିଯୁକ୍ତଙ୍କୁ ରିମାଣ୍ଡରେ ଅଣାଯିବ । ରିମାଣ୍ଡରେ ଆଣିବା ପରେ ପ୍ରଥମେ କ୍ରାଇମ୍ ସିନ୍ ରିକ୍ରିଏଟ କରାଯିବ । ଅଭିଯୁକ୍ତ ଧରାପଡ଼ିଛନ୍ତି ଆଗକୁ ତଦନ୍ତ ଆହୁରି ହେବ ବୋଲି ସାମ୍ବାଦିକ ସମ୍ମିଳନୀରେ ପୁରି ଏସପି କନୱର ବିଶାଲ ସିଂ କହିଛନ୍ତି ।
