ନୀଳଗିରି: ବାଲେଶ୍ୱର ଜିଲାର ନୀଳଗିରିରେ ରହିଛି କୁଲଡିହା ଅଭୟାରଣ୍ୟ । ଏହା ଭିତରେ ରହିଛନ୍ତି ହାତୀ, ବାଘ, ଭାଲୁ, ହରିଣ, ଗୟଳ ପ୍ରଭୃତି ବନ୍ୟଜନ୍ତୁ । ସବୁଜିମା ଭରା ଏହି ଅଭୟାରଣ୍ୟରେ ରହିଛି ସଂଖ୍ୟାଧିକ ଔଷଧିୟ ବୃକ୍ଷ ଆଉ ବହୁ ପୁରୁଣା ଗଛ । କିନ୍ତୁ କାଠମାଫିଆ ଓ ପଥର ମାଫିଆଙ୍କ ଲୋଲୁପ ଦୃଷ୍ଟିକୁ ପ୍ରତିହତ କରିପାରୁନି ବନବିଭାଗ । ଯାହାର ନଜିର ଦେଖିବାକୁ ମିଳିଛି ଅଭୟାରଣ୍ୟର ଅଢ଼େଇ କିଲୋମିଟର ଦୂରରେ । ସଜନାଗଡ଼ରୁ କାଳିଝାଟୀ ଗାଁ ଦେଇ ଜଙ୍ଗଲକୁ କାଟିବା ପରେ ଦୀର୍ଘ ଅଢ଼େଇ କିମି ପର୍ଯ୍ୟନ୍ତ ରାସ୍ତା ତିଆରି କରିଛନ୍ତି ମାଫିଆ । ଅଭୟାରଣ୍ୟ ଭିତରେ ଚାଲିଛି ବେଆଇନ ଗଛକଟା ଓ ପଥର ଖାଦାନ । ଖାଦାନରେ ବିସ୍ଫୋରଣ କରାଯାଇ ପଥର ଉତ୍ତୋଳନ କରାଯାଉଛି ଆଉ ବାହାରକୁ ଚାଲାଣ କରାଯାଉଛି ।
ଜଙ୍ଗଲରୁ କୁଟା କି କାଠି ଖଣ୍ଡେ ଉଠାଇଲେ ବନବିଭାଗ ସେମାନଙ୍କୁ କୋର୍ଟ ଚାଲାଣ କରୁଛି । ହେଲେ ବର୍ଷ ବର୍ଷ ଧରି ଏଭଳି ବେଆଇନ ପଥର ଖାଦାନକୁ କେମିତି ବନବିଭାଗ ଦେଖି ପାରୁନାହିଁ, ତାହା ସମ୍ପ୍ରତି ବିଭାଗର ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି । ସେପଟେ ଜଙ୍ଗଲରେ ଗଛକଟା ଓ ପଥର ଖାଦାନ ଯୋଗୁ ବନ୍ୟଜନ୍ତୁମାନେ ଭୟଭୀତ ହୋଇ ଜନବସତିକୁ ଦୌଡ଼ି ପଳାଉଛନ୍ତି । ସେମାନଙ୍କ ଆକ୍ରମଣର ଶିକାର ହେଉଛନ୍ତି ଲୋକେ । ଏସବୁ ସତ୍ତ୍ୱେ ବନବିଭାଗ ଅଧିକାରୀମାନେ ସଫେଇ ଦେଉଛନ୍ତି ଅଭୟାରଣ୍ୟ ସୁରକ୍ଷିତ ଅଛି, କୌଣସି ବେଆଇନ କାର୍ଯ୍ୟ ହେଉନି । ରାଜ୍ୟ ପ୍ରଧାନ ମୁଖ୍ୟ ବନ୍ୟ ସଂରକ୍ଷକ(ପିସିସିଏଫ) ଏଥିପ୍ରତି ଦୃଷ୍ଟି ନଦେଲେ ବାଲେଶ୍ୱର ଜିଲାର ଏକମାତ୍ର ଅଭୟାରଣ୍ୟ କୁହାଯାଉଥିବା କୁଲଡିହା ଜଙ୍ଗଲ ଶେଷରେ ଶ୍ରୀହୀନ ହେବା ସୁନିଶ୍ଚିତ ବୋଲି ସାଧାରଣରେ ମତପ୍ରକାଶ ପାଇଛି । ବାଲେଶ୍ୱର ଜିଲା ନୀଳଗିରିରୁ ଅଶେଷ ସ’ଙ୍କ ରିପୋର୍ଟ ସମାଜ ଲାଇଭ୍ ।
