ବାଲେଶ୍ଵର ଓ ତିର୍ତ୍ତୋଲ ବିଧାନସଭା କ୍ଷେତ୍ର ଉପନିର୍ବାଚନ ପୂର୍ବରୁ ଉଭୟ ଅଞ୍ଚଳରୁ ଜବତ ହୋଇଛି ୧୧୨୦୫ ଲିଟର ମଦ । ଏହାର ଆନୁମାନିକ ମୂଲ୍ୟ ୧୭ ଲକ୍ଷ ଟଙ୍କା ହେବ । ଏହି ସୂଚନା ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ । କେବଳ ସେତିକି ନୁହେଁ, ଉଭୟ ସ୍ଥାନରେ ନିୟମ ଉଲ୍ଲଙ୍ଘନ ନେଇ ୫୨ଟି ମାମଲା ରୁଜୁ ହୋଇଥିବା ସେ କହିଛନ୍ତି ।
ଏହା ସହିତ ନିର୍ବାଚନକୁ କଡ଼ାକଡ଼ି କରିବା ପାଇଁ ସମସ୍ତ ପଦକ୍ଷେପ ଗ୍ରହଣ କରାଯାଇଛି ଓ ସନ୍ଧ୍ୟା ୬ଟା ସୁଦ୍ଧା ଏହି ଅଞ୍ଚଳରେ ପ୍ରଚାର କାର୍ଯ୍ୟରେ ଥିବା ସମସ୍ତ ଅଣ ଭୋଟରମାନଙ୍କୁ ନିର୍ବାଚନମଣ୍ଡଳୀ ଛାଡ଼ିବାକୁ ନିର୍ଦେଶ ଦିଆଯାଇଛି । ବାଲେଶ୍ଵରରେ ଭୋଟ ଲାଗି ୩୪୬ଟି, ତିର୍ତ୍ତୋଲରେ ୩୭୩ ପୁଲିଂ ପାର୍ଟିଙ୍କୁ ପ୍ରସ୍ତୁତ କରାଯାଇଛି । ଆସନ୍ତାକାଲି ସୁଦ୍ଧା ସେମାନେ ଭୋଟଦାନ କେନ୍ଦ୍ରରେ ପହଞ୍ଚିବେ । ଅନ୍ୟପକ୍ଷରେ ଭୋଟରେ ସହାୟତା ଦେବା ନିମନ୍ତେ ୮ଶହ ସ୍ଵେଚ୍ଛାସେବୀ ଓ ୮ଶହ ଆଶା କର୍ମୀଙ୍କ ସହାୟତା ନିଆଯିବ ବୋଲି ମଧ୍ୟ ସେ ସୂଚନା ଦେଇଛନ୍ତି ।
