ନୂଆଦିଲ୍ଲୀ : ମଦ ପିଇବା ଅଭ୍ୟାସକୁ ନେଇ ଜଣେ ଅଧିକାରୀଙ୍କୁ ଦୁଇ ମାସରୁ ଅଧିକ ଦିନ ଏକ ମନୋରୋଗ ୱାର୍ଡରେ ରଖାଯିବା ଘଟଣାକୁ ନେଇ ଦିଲ୍ଲୀ ହାଇକୋର୍ଟ ଭାରତୀୟ ବାୟୁ ସେନାକୁ ଭର୍ତ୍ସନା କରିଛନ୍ତି। ବିଚାରପତି ଏସ୍ ମୂରଲୀଧର ଏବଂ ବିନୋଦ ଗୋଏଲଙ୍କ ଖଣ୍ଡପୀଠ ବାୟୁସେନାର ଏଭଳି ନିଷ୍ପତ୍ତି ଉପରେ ପ୍ରଶ୍ନ କରିଥିଲେ। ମଦ ପିଇବା ଅଭ୍ୟାସ କମିଛି କି ନାହିଁ ପରୀକ୍ଷା କରିଥିଲ କି ଓ ଏହା ଏକ ମାନସିକ ରୋଗ ବୋଲି କେଉଁ ଆଧାରରେ ଜାଣିଲ ବୋଲି ଖଣ୍ଡପୀଠ ପ୍ରଶ୍ନ କରିଥିଲେ। କୌଣସି ବ୍ୟକ୍ତିର ସହମ୍ମତି ବିନା ଜବରଦସ୍ତ ତାର ଚିକିତ୍ସା କରାଯାଇ ହେବ ନାହିଁ ବୋଲି ମାନସିକ ସ୍ୱାସ୍ଥ୍ୟ ଅଧିନିୟମ ସ୍ପଷ୍ଟ କରୁଥିବାରୁ ଭାରତୀୟ ବାୟୁ ସେନା କ’ଣ ଆଇନରୁ ଊର୍ଦ୍ଧ୍ବରେ ବୋଲି ଖଣ୍ଡପୀଠ କହିଥିଲେ। ବାୟୁ ସେନାର ଆଚରଣକୁ ଖଣ୍ଡପୀଠ ଦାୟିତ୍ୱହୀନ ବୋଲି ଦର୍ଶାଇଥିଲେ। ଅନ୍ୟପକ୍ଷରେ ବାୟୁ ସେନା ପକ୍ଷରୁ କୁହାଯାଇଥିଲା ଯେ ଅଧିକାରୀଙ୍କ ପତ୍ନୀଙ୍କ କହିବା ଅନୁସାରେ ଏହି ନିଷ୍ପତ୍ତି ନିଆଯାଇଥିଲା। ମଦ ପିଇବା ପରେ ଅଧିକାରୀ ଜଣକ ହିଂସକ ହୋଇପଡ଼ନ୍ତି ବୋଲି ତାଙ୍କ ପତ୍ନୀ କହିଥିଲେ। ଏହାକୁ ଆଧାର କରି ଅଧିକାରୀଙ୍କୁ ମନୋରୋଗ ୱାର୍ଡରେ ରଖାଯାଇଥିଲା ବୋଲି ବାୟୁ ସେନା ପକ୍ଷରୁ କୁହାଯାଇଛି।
