କେରଳର କୋଝିକୋଡ଼ ବିମାନବନ୍ଦରରେ ହୋଇଥିବା ଦୁର୍ଘଟଣାକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ଏଥିରେ କୁହାଯାଇଛି ଯେ ବିମାନ ଦୁର୍ଘଟଣାଗ୍ରସ୍ତ ହୋଇଥିଲେ ହେଁ ଅନୁଭବୀ ପାଇଲଟ୍ ଦୀପକ ସାଠେ ଯାତ୍ରୀମାନଙ୍କ ଜୀବନ ରକ୍ଷା ଲାଗି ନିଜ ଜୀବନ ବଳି ଦେଇଛନ୍ତି । ବିମାନ ଚଳାଚଳରେ ତାଙ୍କର ୩୬ବର୍ଷର ଅନୁଭବ ତାଙ୍କୁ ଏପରି କରିବାକୁ ପ୍ରେରଣା ଯୋଗାଇଛି। ଭାରତୀୟ ବାୟୁ ସେନାର ଅବସରପ୍ରାପ୍ତ ପାଇଲଟ୍ ଦୀପକ ସାଠେ ୬ ବର୍ଷ ତଳେ ଏୟାର ଇଣ୍ଡିଆରେ ଯୋଗ ଦେଇଥିଲେ । ବିମାନ ଚଳାଚଳ ନେଇ ତାଙ୍କର ପ୍ରଚଣ୍ଡ ଅନୁଭବ ରହିଥିଲା ।
ପ୍ରତ୍ୟକ୍ଷ ଦର୍ଶୀଙ୍କ ସୂତ୍ରରୁ ମିଳିଥିବା ସୂଚନା ଅନୁସାରେ ବିମାନ କୋଝିକୋଡ଼ରେ ଅବତରଣ କରିବା ପୂର୍ବରୁ ତିନିଥର ଚକ୍କର କାଟିଥିଲା । ଯାହା ଫଳରେ ବିମାନରେ ଥିବା ଇନ୍ଧନ ଶେଷ ହୋଇଥିଲା । ପାଇଲଟ୍ ଦୀପକ ପିଚ୍ଛିଳ ରନୱେର ଆକଳନ କରି ସାରିଥିଲେ ଓ ଦୁର୍ଘଟଣା ପୂର୍ବରୁ ଇଞ୍ଜିନ ଅଫ୍ କରି ଦେଇଥିଲେ । ଯାହା ଫଳରେ ଦୁର୍ଘଟଣାଗ୍ରସ୍ତ ହେଲେ ମଧ୍ୟ ବିମାନରେ ନିଆଁ ଲାଗିବ ନାହିଁ । ଯାହା ଫଳରେ ବିମାନ ଦୁର୍ଘଟଣାରେ ୧୮ ଜଣଙ୍କ ମୃତ୍ୟୁ ଘଟିଥିଲେ ହେଁ ଅନ୍ୟମାନଙ୍କ ଜୀବନ ବଞ୍ଚି ପାରିଥିଲା।
ଦୀପକ ସାଠେ ଭାରତୀୟ ବାୟୁ ସେନାରେ ୨୧ ବର୍ଷ କାମ କରିଥିଲେ । ତାଙ୍କର ବିମାନ ଚାଳନା ଅଭିଜ୍ଞତାରୁ ସେ ଏହି କାର୍ଯ୍ୟ କରିଥିଲେ । ଯଦି ବିମାନରୁ ଇନ୍ଧନ ଶେଷ ହୋଇ ନ ଥାନ୍ତା କିମ୍ବା ସେ ଇଞ୍ଜିନ ବନ୍ଦ କରି ନ ଥାନ୍ତେ ତେବେ ପରିସ୍ଥିତି ଆହୁରି ଗୁରୁତର ହୋଇଥାଆନ୍ତା ଓ ମୃତ୍ୟୁ ସଂଖ୍ୟା ଶତାଧିକ ହୋଇଥାଆନ୍ତା ବୋଲି ଦୀପକଙ୍କର ଜଣେ ବନ୍ଧୁ ନୀଲେଶ ସାଠେ ଫେସବୁକ୍ ପୋଷ୍ଟରେ ଉଲ୍ଲେଖ କରିଛନ୍ତି । ଦୀପକ ଜଣେ ଏନଡ଼ିଏ ପାସଆଉଟ ଥିଲେ ଓ ବାୟୁସେନାରେ ତାଙ୍କର ଉତ୍ତମ ସେବା ନିମନ୍ତେ ତାଙ୍କୁ ସ୍ବାର୍ଡ଼ ଅଫ୍ ଅନର ପୁରସ୍କାର ପ୍ରଦାନ କରାଯାଇଥିଲା ।
