ରାଜ୍ୟରେ କରୋନା ସଂକ୍ରମଣରେ ପୀଡିତ ହୋଇ ଚିକିତ୍ସିତ ହେଉଥିବା ଗୁରୁତର ରୋଗୀଙ୍କ ପାଇଁ ପ୍ଲାଜମା ଥେରାପି ବଡ଼ ସମ୍ଭାବନା ସୃଷ୍ଟି କରିଛି। ବର୍ତ୍ତମାନ ପ୍ଲାଜମା ଥେରାପି ମାଧ୍ୟମରେ ଚିକିତ୍ସିତ ହୋଇଥିବା ୬ ଜଣ ଗୁରୁତର ରୋଗୀଙ୍କ ମଧ୍ୟରୁ ୪ ଜଣ ଭଲ ପ୍ରତିକ୍ରିୟା ପ୍ରକାଶ କରୁଛନ୍ତି ଓ ସେମାନେ ଅକ୍ସିଜେନ ସହାୟତା ଆବଶ୍ୟକ କରୁନାହାଁନ୍ତି। ସେମାନଙ୍କୁ ଖୁବ ଶୀଘ୍ର ହସ୍ପିଟାଲରୁ ଡିସଚାର୍ଜ କରାଯିବ ବୋଲି ଜଣାପଡିଛି। ଅନ୍ୟ ପକ୍ଷରେ ପ୍ଲାଜମା ଥେରାପି ନେଇଥିବା ଅନ୍ୟ ଦୁଇ ଜଣ ରୋଗୀଙ୍କ ସ୍ୱାସ୍ଥ୍ୟ ଅବସ୍ଥା ସ୍ଥିର ରହିଛି ଏବଂ ସେମାନେ ବିପଦ ମୁକ୍ତ ହେବା ଆଶା କରାଯାଉଛି।
ଆଜି ସୁଦ୍ଧା ୪ ଜଣଙ୍କ ଠାରୁ ୮ ୟୁନିଟ୍ ପ୍ଲାଜମା ସଂଗ୍ରହ କରାଯାଇଥିବା ବେଳେ ୬ଟି ୟୁନିଟ ବ୍ୟବହାର କରାଯାଇଛି। ସମ କୋଭିଡ ଡାକ୍ତରଖାନାର ୪ ଜଣ ରୋଗୀ ଏବଂ ଅଶ୍ୱିନୀ କୋଭିଡ ହସ୍ପିଟାଲର ୨ ଜଣ ରୋଗୀଙ୍କୁ ଏହି ପ୍ଲାଜମା ଥେରାପି ଦିଆଯାଇଥିଲା।
ସୂଚନା ଯୋଗ୍ୟ ରାଜ୍ୟରେ ପ୍ଲାଜମା ଥେରାପି ଆରମ୍ଭ କରିବା ଉଦ୍ଦେଶ୍ୟରେ ଗତ ସପ୍ତାହରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଟକ ଏସସିବି ମେଡିକାଲ କଲେଜ କଟକଠାରେ ଏହି ବ୍ୟବସ୍ଥାର ଶୁଭାରଂଭ କରିଥିଲେ। ପ୍ଲାଜମା ଦାନ ପାଇଁ କରୋନା ଆରୋଗ୍ୟଙ୍କୁ ମୁଖ୍ୟମନ୍ତ୍ରୀଙ୍କ ନିବେଦନ କରିବା ପରେ ଅଧିକରୁ ଅଧିକ ଲୋକ ଏହି ମିଶନରେ ଯୋଗଦେବାକୁ ଆଗେଇ ଆସୁଛନ୍ତି। ଭୁବନେଶ୍ୱରର କିମସ୍ ହସ୍ପିଟାଲରେ ଖୁବ ଶୀଘ୍ର ପ୍ଲାଜମା ଥେରାପି ଆରମ୍ଭ ହେବା ବୋଲି ସୂଚନା ମିଳିଛି।
