ଭୁବନେଶ୍ବର: ଜୀବନଦାତା ସାଜିଲେ ଆରପିଏଫ୍ କନେଷ୍ଟବଳ ଆଉ ଚଳନ୍ତା ଟ୍ରେନ୍ ତଳୁ ବଞ୍ଚାଇଲେ ମହିଳାଙ୍କ ଜୀବନ। ଏଭଳି ଏକ ଘଟଣା ଦେଖିବାକୁ ମିଳିଛି ରାଜ୍ୟ ରାଜଧାନୀ ଭୁବନେଶ୍ବର ରେଳ ଷ୍ଟେସନରେ । ଶୁକ୍ରବାର ସନ୍ଧ୍ୟା ୫.୨୦ ମିନିଟ ସମୟର ଘଟଣା, ଭୁବନେଶ୍ବର ରେଳ ଷ୍ଟେସନରେ ପୁରୀ-ସମ୍ବଲପୁର ଏକ୍ସପ୍ରେସରେ ଚଢୁଥିଲେ ରମାଦେବୀ ବିଶ୍ବବିଦ୍ୟାଳୟର ଆଇ.ଟି ଅଧ୍ୟ୍ୟାପିକା ନିବେଦିତା ସାହୁ। ଅଧ୍ୟ୍ୟାପିକା ଟ୍ରେନରେ ଚଢିବା ସମୟରେ ଟ୍ରେନଟି ଚଳନ୍ତା ଅବସ୍ଥାରେ ଥିଲା। ଚଳନ୍ତା ଟ୍ରେନରେ ଚଢିବା ସମୟରେ ଅସାବଧାନତା ହେତୁ ତାଙ୍କ ଗୋଡ ଖସି ଯାଇଥିଲା। ଯାହା ଫଳରେ ସେ ଟ୍ରେନ୍ ତଳକୁ ଗଳି ପଡୁଥିଲେ। ଏହି ସମୟରେ ପ୍ଲାଟଫର୍ମରେ ମୁତୟନ ଥିବା ଆରପିଏଫ୍ କନେଷ୍ଟବଳ ସୁବ୍ରତ କୁମାର ମହାରଣା ଏବଂ ଅନ୍ୟ ଦୁଇ ବ୍ୟକ୍ତି ଅଧ୍ୟ୍ୟାପିକା ନିବେଦିତା ସାହୁଙ୍କୁ ଟାଣି ଆଣିଥିଲେ। ଯାହା ଫଳରେ ନିବେଦିତାଙ୍କ ଜୀବନ ବଞ୍ଚିଯାଇଛି।
ଏଭଳି ଘଟଣା ଦେଖି ପ୍ଲାଟଫର୍ମରେ ଉପସ୍ଥିତ ଥିବା ଜନତା ସ୍ତବ୍ଧ ହୋଇଯାଇଥିଲେ। ମରଣ ମୁହଁରୁ ବଞ୍ଚିଥିବା ନିବେଦିତା ବି ହତବାକ୍ ହୋଇଯାଇଥିଲେ। ତାଙ୍କୁ ଉଦ୍ଧାର କରିଥିବା ଆରପିଏଫ୍ କନେଷ୍ଟବଳ ଏବଂ ଅନ୍ୟ ଦୁଇ ବ୍ୟକ୍ତିଙ୍କୁ ପ୍ରଶଂସା କରିବା ସହ ତାଙ୍କ ଜୀବନ ବଞ୍ଚାଇଥିବାରୁ ସେମାନଙ୍କ ପାଖରେ ଚୀର ଋଣି ହୋଇ ରହିବେ ବୋଲି କହିଛନ୍ତି ନିବେଦିତା।
