କଲକାତା: ପଶ୍ଚିମବଙ୍ଗରେ ରାଜ୍ୟପାଳ ଜଗଦୀପ ଧନଖଡ଼ ଏବଂ ମୁଖ୍ୟମନ୍ତ୍ରୀ ମମତା ବାନାର୍ଜୀ ମୁହାଁମୁହିଁ ହେବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି। ଉଭୟଙ୍କ ମଧ୍ୟରେ ରାଜନୈତିକ ଯୁଦ୍ଧ ଦିନକୁ ଦିନ ବଢ଼ିବାରେ ଲାଗିଛି। ରାଜ୍ୟପାଳଙ୍କ ଉତ୍ତର ୨୪ ପ୍ରଗଣା ଗସ୍ତକୁ ନେଇ ଏହି ବିବାଦ ଉପୁଜିଛି। ରାଜ୍ୟପାଳ ମଙ୍ଗଳବାର ଉତ୍ତର ୨୪ ପ୍ରଗଣା ଗସ୍ତରେ ଅଛନ୍ତି। କିନ୍ତୁ ତାଙ୍କ ସହିତ କୌଣସି ଜିଲାସ୍ତରୀୟ ଅଧିକାରୀ ସାମିଲ ହୋଇନାହାନ୍ତି।
ରାଜ୍ୟପାଳ ୨୨ ତାରିଖରେ ଉତ୍ତର ୨୪ ପ୍ରଗଣା ଗସ୍ତ କରିବେ ବୋଲି ତାଙ୍କ କାର୍ଯ୍ୟାଳୟ ପକ୍ଷରୁ ଗତ ୧୭ ତାରିଖରେ ଜିଲା ମାଜିଷ୍ଟ୍ରେଟଙ୍କୁ ଅବଗତ କରାଯାଇଥିଲା। ନିୟମ ଅନୁସାରେ ଜିଲା ମାଜିଷ୍ଟ୍ରେଟ ରାଜ୍ୟପାଳଙ୍କୁ ନିମନ୍ତ୍ରଣ କରିବା କଥା। କିନ୍ତୁ ଉତ୍ତର ୨୪ ପ୍ରଗଣାର ଜିଲା ଅଧିକାରୀ ଏକ ଚିଠି ଲେଖି ଉତ୍ତର ଦେଇଥିଲେ ଯେ, ରାଜ୍ୟ ସରକାରଙ୍କ ଅନୁମତି ନ ମିଳିବା ପର୍ଯ୍ୟନ୍ତ କାହାକୁ ବି ନିମନ୍ତ୍ରଣ ପଠାଯିବ ନାହିଁ। ଏହା ସହିତ ରାଜ୍ୟପାଳଙ୍କ ବୈଠକରେ ଅଧିକାରୀମାନେ ସାମିଲ ହୋଇପାରିବେ ନାହିଁ, ସମସ୍ତ ବରିଷ୍ଠ ଅଧିକାରୀ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉତ୍ତର ବଙ୍ଗଳା ଗସ୍ତ ପାଇଁ ସାଥୀରେ ଯାଇଛନ୍ତି।
ଜିଲା ଅଧିକାରୀଙ୍କ ଏପରି ଚିଠି ମିଳିବା ପରେ ରାଜ୍ୟପାଳ କହିଛନ୍ତି, ମୋତେ ଏଭଳି ଲାଗୁଛି ଯେ ପଶ୍ଚିମବଙ୍ଗରେ କୌଣସି ପ୍ରକାର ସେନସରଶିପ ରହିଛି। ଏହା ସମ୍ପୂର୍ଣ୍ଣ ଅସମ୍ବିଧାନିକ। ଅଧିକାରୀମାନଙ୍କ ଏପରି ବ୍ୟବହାରକୁ ନେଇ ରାଜ୍ୟପାଳ ଆହୁରି କହିଛନ୍ତି ଯେ, ଯଦି ତାଙ୍କୁ କାହା ସାଥୀରେ କଥାବର୍ତ୍ତା କରିବାର ଅଛି, ତା’ହେଲେ ରାଜ୍ୟ ସରକାରଙ୍କ ଅନୁମତି ନେବାର କ’ଣ ଆବଶ୍ୟକତା ରହିଛି?
