ସମାଜ ଡିଜିଟାଲ ଡେସ୍କ: ବିବାହ ସାରି ଫେରୁଥିଲେ। ହେଲେ ପହଞ୍ଚି ପାରିଲେନି ଘରେ। ବାଟରେ ଶେଷ ହୋଇଗଲା ବିବାହର ଖୁସି। ଦୁର୍ଘଟଣାରେ ପ୍ରାଣ ହରାଇଲେ ବର-କନ୍ୟା ସମେତ ପରିବାରର ୭ ସଦସ୍ୟ। ଶୁକ୍ରବାର ବିଳମ୍ବିତ ରାତିରେ ଏଭଳି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ଉତ୍ତରପ୍ରଦେଶର ବିଜନୌର ଅଞ୍ଚଳରେ। ଗୁରୁତର ଆହତ ହୋଇଥିବା ଦୁଇ ଜଣଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ବିଜନୌର ଜିଲା ଧାମପୁର ଥାନା ଅନ୍ତର୍ଗତ ହରିଦ୍ଵାର-କାଶୀପୁର ଜାତୀୟ ରାଜପଥର ଅଗ୍ନିଶମ କେନ୍ଦ୍ର ନିକଟରେ ଶୁକ୍ରବାର ରାତି ପ୍ରାୟ ୨ଟାରେ ଏହି ଦୁର୍ଘଟଣା ଘଟିଛି।
ଧାମପୁର ଥାନା ତିବଡ଼ି ଗ୍ରାମର ଖୁର୍ଶିଦ ଅନସାରୀଙ୍କ ପୁଅ ବିଶାଲର ବିବାହ ବିହାରର ଖୁସି ନାମ୍ନୀ ଯୁବତୀ ସହ ହୋଇଥିଲା। ବିବାହ ପରେ ବର-କନ୍ୟା ସମେତ ପୁଅ ଘରର ୭ ସଦସ୍ୟ ଉତ୍ତରପ୍ରଦେଶର ମୁରାଦାବାଦ ଫେରିଥିଲେ। ସେମାନେ ସେଠାରୁ ଅଟୋ ଭଡ଼ା କରି ଗାଁକୁ ଯାଉଥିଲେ। ଜାତୀୟ ରାଜପଥର ଅଗ୍ନିଶମ କେନ୍ଦ୍ର ନିକଟରେ ଅଟୋକୁ ଦ୍ରୁତଗତିରେ ଆସୁଥିବା ଏକ କାର ଧକ୍କା ଦେଇଥିଲା। ଘନ କୁହୁଡ଼ି ଯୋଗୁ ଏହି ଦୁର୍ଘଟଣା ଘଟିଥିଲା। ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
