ଭୁବନେଶ୍ବର : ରାଜ୍ୟ ସମବାୟ ବିଭାଗ ଅଧିନସ୍ଥ ସମସ୍ତ ପ୍ରାଥମିକ କୃଷି ସମବାୟ ସମିତି ଓ ବୃହଦାକାର ବହୁମୁଖୀ ସମବାୟ ସମିତି( ଲାମ୍ପ୍ସ )ରେ କାର୍ଯ୍ୟରତ କର୍ମଚାରୀ ମାନଙ୍କ ନିମନ୍ତେ ଖୁସି ଖବର । ମାନ୍ୟବର ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ଏହି କର୍ମଚାରୀ ମାନଙ୍କର ମହଙ୍ଗାଭତ୍ତାରେ ୬୬ ପ୍ରତିଶତ ବୃଦ୍ଧିକରାଯାଇ ୨୩୦ ପ୍ରତିଶତ କରାଯାଇଛି । ସେମାନେ ୧୬୪ ପ୍ରତିଶତ ହାରରେ ଡି.ଏ ପାଉଥିଲେ । ଏହି ବର୍ଦ୍ଧିତ ଡି.ଏ ଆସନ୍ତା ଅପ୍ରେଲ ପହିଲାରୁ (୦୧,୦୪,୨୦୨୪ ) ଲାଗୁ କରାଯିବ । ଏହା ଦ୍ୱାରା ୨୭୧୧ ସମିତିର କର୍ମଚାରୀ ଉପକୃତ ହେବେ I ଏ ନେଇ ରାଜ୍ୟ ସମବାୟ ନିବନ୍ଧକଙ୍କ ତରଫରୁ ନିର୍ଦ୍ଦେଶନାମା ପ୍ରକାଶ ପାଇଛି ।
ପାକ୍ସ ଏବଂ ଲାମ୍ପ୍ସ କର୍ମଚାରୀ ସଂଘର କର୍ମକର୍ତ୍ତାମାନେ ଗତକାଲି ସମବାୟ ମନ୍ତ୍ରୀ ଅତନୁ ସବ୍ୟସାଚୀ ନାୟକଙ୍କୁ ଭେଟି ସେମାନଙ୍କର ବିଭିନ୍ନ ଦାବି ସଂପର୍କରେ ଆଲୋଚନା କରିଥିଲେ । ସେଥିରେ ମହଙ୍ଗାଭତ୍ତା ବୃଦ୍ଧି କରାଯିବା ଏକ ପ୍ରମୁଖ ଦାବି ଥିଲା । ଏହି ଦାବି ପୁରଣ ହୋଇଥିବାରୁ ସେମାନେ ମାନ୍ୟବର ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇବା ସହିତ ମନ୍ତ୍ରୀ ଶ୍ରୀ ନାୟକଙ୍କୁ ମଧ୍ୟ ଧନ୍ୟବାଦ ଓ କୃତଜ୍ଞତା ଜଣାଇଛନ୍ତି ।
