ରେଞ୍ଜରଙ୍କ ସମେତ ୪ବିଭାଗୀୟ କର୍ମଚାରୀ ନିଲମ୍ବିତ, ୬ ଅଭିଯୁକ୍ତ ଗିରଫ

ବଡ଼ମ୍ବା :  ଏସଟିଏଫ୍ ଦ୍ୱାରା ବଡ଼ମ୍ବା ବନାଞ୍ଚଳରେ ଦୁଇଟି ହାତୀ ମୃତ୍ୟୁ ଘଟଣାର ପର୍ଦ୍ଦାଫାସ ପରେ ବିଭାଗୀୟ କାର୍ଯ୍ୟାନୁଷ୍ଠାନରେ ତତ୍ପରତା ପ୍ରକାଶ ପାଇଛି। ଏହି ଘଟଣାରେ କର୍ତ୍ତବ୍ୟରେ ଅବହେଳା ଲାଗି ଇତିମଧ୍ୟରେ ବଡ଼ମ୍ବା ବନାଞ୍ଚଳ ଅଧିକାରୀ(ରେଞ୍ଜର)ଙ୍କ ସମେତ ୪ଜଣ ବିଭାଗୀୟ କର୍ମଚାରୀଙ୍କୁ ନିଲମ୍ବନ କରାଯାଇଥିବା ବେଳେ ଘଟଣାରେ ସଂପୃକ୍ତ ୬ଜଣ ବ୍ୟକ୍ତିଙ୍କୁ ଗିରଫ କରାଯାଇ ଶୁକ୍ରବାର ଜେଲ ହାଜତକୁ ପଠାଯାଇଥିବା ଜଣାଯାଇଛି । ନିଲମ୍ବିତ କର୍ମଚାରୀମାନେ ହେଲେ ବଡ଼ମ୍ବା ବନାଞ୍ଚଳ ଅଧିକାରୀ ସୁରେଶ କୁମାର ଷଡ଼ଙ୍ଗୀ, ମାଣିଆବନ୍ଧ ବନପାଳ ମନୋଜ ଦାସ, ଗୋପପୁର ବନପାଳ ପ୍ରଦୀପ ପରିଡ଼ା, ଜାନିପଦର ବନରକ୍ଷୀ ନରେନ୍ଦ୍ର ଦେହୁରୀ, ଛାଞ୍ଚୁଣିଆ ବନରକ୍ଷୀ ତନ୍ମୟ ବେହେରା। ସେହିଭଳି ଏହି ସଙ୍ଗଠିତ ଘଟଣାରେ ଗିରଫ ହୋଇ କୋର୍ଟ ଚାଲାଣ କରାଯାଇଥିବା ୬ଜଣ ଅଭିଯୁକ୍ତ ହେଲେ ବିରଞ୍ଚି ବେହେରା, ବ୍ରଜ ବେହେରା, ଅଶୋକ ବେହେରା, ଆକୁଳ ବେହେରା, ଗାଣ୍ଡୁ ବେହେରା ଏବଂ ନିଲମ୍ବିତ ବନରକ୍ଷୀ ନରେନ୍ଦ୍ର ଦେହୁରୀ।

ପ୍ରକାଶଥାଉକି ପ୍ରାୟ ମାସକ ତଳର ଦୁଇଟି ହାତୀ ଅପମୃତ୍ୟୁ ଘଟଣା ସମ୍ପର୍କରେ ଏସଟିଏଫ୍ କୌଣସି ବିଶେଷ ସୂତ୍ରରୁ ଖବର ପାଇ ଗତ ୨ ତାରିଖରେ ବଡ଼ମ୍ବା ବନାଞ୍ଚଳରେ ଚଢାଉ କରିଥିଲେ । ସେଥି ମଧ୍ୟରୁ ବନାଞ୍ଚଳ ଅନ୍ତର୍ଗତ ଚନ୍ଦ୍ରଗିରୀ ଜଙ୍ଗଲ ନିକଟରୁ ପ୍ରଥମେ ଏକ ଦନ୍ତାହାତୀ କଙ୍କାଳ ଏବଂ ପରଦିନ ଅର୍ଥାତ ୩ ତାରିଖରେ ଏହାର ଅନତି ଦୂର ମହତାବନ୍ଧ ଗ୍ରାମ ନିକଟରୁ ଅନ୍ୟଏକ ମାଈ ହାତୀର କଙ୍କାଳ ମାଟି ତଳେ ପୋତା ଯାଇଥିବା ଅବସ୍ଥାରେ ଉଦ୍ଧାର କରି କରିଥିଲେ। ଏହି ଦୁଇଟି ଘଟଣା ସମ୍ପର୍କରେ ସମ୍ପୂର୍ଣ୍ଣ ଅଜ୍ଞ ଥିବା ଆଠଗଡ଼ ବନଖଣ୍ଡର ଅପାରଗତାକୁ ନେଇ ବୁଦ୍ଧିଜୀବୀ ମହଲରେ ଆଶ୍ଚର୍ଯ୍ୟ ପ୍ରକାଶପାଇଥିଲା। ଏପରିକି ହାତୀ ହତ୍ୟା ଘଟଣା ହେଉ କି ଅପମୃତ୍ୟୁ ଘଟଣା ଛପାଇଦେବା ପାଇଁ ଏଭଳି ଉଦ୍ୟମ କରାଯାଇଥିବା ତଦନ୍ତରୁ ସ୍ପଷ୍ଟ ହୋଇଥିଲା। ତେବେ ଏନେଇ ଉଚ୍ଚସ୍ତରୀୟ ତଦନ୍ତ ଜାରି ରହିଥିବା ବେଳେ ଏଥିରେ ସଂପୃକ୍ତ ଅଭିଯୁକ୍ତଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି । ଅପରପକ୍ଷରେ ଏଭଳି ସଙ୍ଗୀନ ଘଟଣାରେ ସମ୍ପୂର୍ଣ୍ଣ ବନଖଣ୍ଡର ଅବହେଳା ଏକପ୍ରକାର ପ୍ରମାଣିତ ହୋଇଥିବା ବେଳେ କେବଳ ତଳିଆ କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନକୁ ନେଇ ସାଧାରଣରେ ନାପସନ୍ଦ କରାଯାଇଛି। ଅନ୍ୟପକ୍ଷରେ ଉପରିସ୍ଥ ଅଧିକାରୀଙ୍କ ଉପରେ ବିଭାଗୀୟ କାର୍ଯ୍ୟାନୁଷ୍ଠାନ ହେବା ଜରୁରୀ ବୋଲି ସାଧାରଣରେ ଦାବି ହେଉଛି।