ସମ୍ବଲପୁର:ସମ୍ବଲପୁର ପୁଲିସ ବିଭିନ୍ନ ସ୍ଥାନରେ ଚଢଉ କରି ୧୧୧୭ଟି ସିଲ କଫ ସିରଫ ଭର୍ତ୍ତି ବୋତଲ ଜବତ କରିଛି।ସମ୍ବଲପୁରର ସାହୁ କଲୋନୀ ଓ ରିଙ୍ଗରୋଡ ଅଞ୍ଚଳରେ ପୁଲିସ ଚଢଉ କରି କଫ ସିରଫ ସହ ୫ ଜଣଙ୍କୁ ଗିରଫ କରିଛି। ପୁଲିସ ସାହୁ କଲୋନୀରେ ଚଢ଼ଉ କରି ୬୦୧ ବୋତଲ କଫ ସିରଫ ନଗଦ ଦୁଇ ହଜାର ଟଙ୍କା ଏକ ବାଇକ ସହ ରାଜେଶ ନାଗ ଓ ସୋମନାଥ ବେହେରା ଏବଂ ସତ୍ୟ ଭୋଇଙ୍କୁ ଗିରଫ କରିଥବା ଜଣାପଡିଛି। ସେହିପରି ରିଙ୍ଗରୋଡରେ ଥିବା ଶନି ମନ୍ଦିର ପଛପଟରୁ ପୁଲିସ ଚଢଉ କରି ୫୧୬ ବୋତଲ କଫ ସିରଫ ସହ ଦଲେଇପଡାର କାମେଶ ସାହା , ଶ୍ରଜାବତ ରାୟଙ୍କୁ ପୁଲିସ ଗିରଫ କରିଛି। ପୁଲିସର ସୂଚନାନୁଯାୟୀ, ଏହି ସମସ୍ତ କଫ ସିରଫ ଗୁଡିକୁ ଅଭିଯୁକ୍ତ ମାନେ ଜାଣିଶୁଣି ଅପରିତ୍ୟକ୍ତ ସ୍ଥାନରେ ପକାଇ ରଖିଥାନ୍ତି। ପରେ ଏହି କଫ ସିରଫ ଗୁଡିକୁ ଅପମିଶ୍ରିତ କରି ଉଚ୍ଚ ଦାମରେ ନିଶାଖୋର ମାନଙ୍କୁ ବିକ୍ରି କରିଥାନ୍ତି। ସେମାନେ ପ୍ରତି ୧୦୦ ମିଲି ବୋତଲକୁ ୮୦ ରୁ ୧୦୦ ଟଙ୍କାରେ କିଣି ଆଣୁଥିବା ବେଳେ ସେଗୁଡିକୁ ୨୦୦ ଶହ ଟଙ୍କା ପର୍ୟ୍ୟନ୍ତ ବିକ୍ରି କରିଥାନ୍ତି। ଏହା ସହିତ ନିଶା ବଟିକା ମିଶ୍ରଣ କରି ଖୋଲାରେ ବିକ୍ରି କରି ଏହି ଅଭିଯୁକ୍ତ ମାନେ ବହୁତ ଲାଭବାନ ହୁଅନ୍ତି ବୋଲି ପୁଲିସ କହିଛି। ସମ୍ବଲପୁର ଜିଲ୍ଲାରେ ବେଆଇନ ନିଶା କାରବାର ବିଶେଷ କରି କଫ ସିରଫ ଓ ନିଶା ବଟିକା କାରବାର ଖୋଲାଖୋଲି ଭାବରେ ଚାଲୁଛି। ଏହି ନିଶାଗୁଡିକରେ ଅଭ୍ୟସ୍ତ ହୋଇ ଯୁବପିଢ଼ି ପଥଭ୍ରଷ୍ଟ ହେଉଥିବା ବେଳେ ନିଶା ସେବନକାରୀ ମାନେ ସେମାନଙ୍କ ହିତାହିତ ଜ୍ଞାନ ଭୁଲି ଅପରାଧିକ କାଣ୍ଡ ମାନ ଭିଆଉଥିବା ଜଣାପଡିଛି।
Popular Categories
Previous article
Next article