ଭୁବନେଶ୍ୱର: ରାଜରାସ୍ତାରେ ଶିକ୍ଷକ, ସ୍କୁଲରେ ତାଲା, ବିଦ୍ୟାଳୟର ଅବ୍ୟବସ୍ଥା ଏବଂ ଶିକ୍ଷା ବ୍ୟବସ୍ଥା ବିପର୍ଯ୍ୟୟ ନେଇ ବିରୋଧୀଦଳ ମୁଖ୍ୟ ସଚେତକ ତାରା ପ୍ରସାଦ ବାହିନୀପତି ଆଣିଥିବା ମୁଲତବି ପ୍ରସ୍ତାବ ଓ ଶାସକଦଳ ସଭ୍ୟ ସମୀର ରଞ୍ଜନ ଦାସଙ୍କ ସହିତ ଅନ୍ୟ ସଦସ୍ୟଙ୍କ ପକ୍ଷରୁ ଆସିଥିବା ଦୃଷ୍ଟି ଆକର୍ଷଣକାରୀ ପ୍ରସ୍ତାବ ଆଲୋଚନାବେଳେ ମଙ୍ଗଳବାର ବିଧାନସଭାରେ ବିରୋଧୀଙ୍କ ପ୍ରବଳ ବିରୋଧ ଯୋଗୁଁ ହୁଲ୍ସ୍ତୁଲ ହୋଇ ଉଠିଥିଲା। ପୂର୍ବାହ୍ନ ସାଢ଼େ ୧୧ଟାରୁ ଅପରାହ୍ନ ୧୨ଟା ୫୪ ପର୍ଯ୍ୟନ୍ତ ପ୍ରବଳ ହଟ୍ଟଗୋଳ ମଧ୍ୟରେ ମୁଲତବି ପ୍ରସ୍ତାବ ଆଲୋଚନା ବେଳେ ବିରୋଧୀ ଗୃହ ମଧ୍ୟଭାଗକୁ ଆସି ରୁଲିଂ ଦାବି କରିଥିଲେ। ଗୃହ କାର୍ଯ୍ୟ ବାଧାପ୍ରାପ୍ତ ହୋଇଥିଲା। ମାତ୍ର ବାଚସ୍ପତି ପ୍ରଦୀପ କୁମାର ଅମାତ ଏହି ପ୍ରସଙ୍ଗ ଉପରେ ରୁଲିଂ ଦେବେନାହିଁ ବୋଲି ରୋକ୍ଠୋକ୍ ମନା କରି ଦେଇଥିଲେ।
ମାତ୍ର ଅପରାହ୍ନ ୩ଟାରେ ବିଜେପି ବିଧାୟକ ଦଳ ନେତା କନକ ବର୍ଦ୍ଧନ ସିଂହଦେଓ ପୁନଶ୍ଚ ଶିକ୍ଷକଙ୍କ ଦାବି ସମ୍ପର୍କରେ ସର୍ବଦଳୀୟ ବୈଠକ ଡାକିବାକୁ ବାଚସ୍ପତି ଶ୍ରୀ ଅମାତଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ
ଶ୍ରୀ ବାହିନୀପତି ସିଧାସଳଖ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରି କହିଥିଲେ, ଯେପର୍ଯ୍ୟନ୍ତ ଶିକ୍ଷକଙ୍କ ସମସ୍ୟା ସମାଧାନ ହୋଇନାହିଁ ସେପର୍ଯ୍ୟନ୍ତ ଗୃହ ଚଳାଇ ଦିଆଯିବ ନାହିଁ। ବାଚସ୍ପତି ଗୃହ ସ୍ୱାଭାବିକ କରିବା ପାଇଁ ସଦସ୍ୟଙ୍କ ସହଯୋଗ ଲୋଡିଥିଲେ ବି ତାହା ସମ୍ଭବ ହୋଇନଥିଲା। ତିନୋଟି ପର୍ଯ୍ୟାୟରେ ଗୃହକୁ ଦେଢ଼ଘଣ୍ଟା ମୁଲତବି କରାଯିବା ପରେ ସହ ସର୍ବଦଳୀୟ ବୈଠକ ଡକାଯାଇଥିଲା। ବୈଠକ ପରେ ଆନ୍ଦୋଳନରତ ଶିକ୍ଷକଙ୍କ ସହିତ ସରକାର ଆଲୋଚନା କରିବାକୁ ବାଚସ୍ପତି ଶ୍ରୀ ଅମାତ ରୁଲିଂ ଦେଇଥିଲେ। ଅପରାହ୍ନ ୪ଟା ୩୮ବେଳକୁ ଗୃହ ସ୍ୱାଭାବିକ ହୋଇଥିଲା।
ପୂର୍ବାହ୍ନରେ ଶିକ୍ଷକଙ୍କ ସମସ୍ୟା ଆଗତ ମୁଲତବି ପ୍ରସ୍ତାବ ଉପରେ ଆଲୋଚନାରେ ଭାଗନେଇ ବିରୋଧୀଦଳ ନେତା ନରସିଂହ ମିଶ୍ର କହିଥିଲେ ଯେ ଓଡ଼ିଶାରେ ଶିକ୍ଷା ଅଧିକାର ନିୟମ କାର୍ଯ୍ୟକାରୀ ହେଉନାହିଁ। ଶିକ୍ଷା କହିଲେ ଉତ୍ତମ ଶିକ୍ଷାକୁ ବୁଝାଏ। ଉତ୍ତମ ଶିକ୍ଷା ସେତିକି ବେଳେ ସମ୍ଭବ ଯେତେବେଳେ ଶିକ୍ଷକଙ୍କୁ ଉପଯୁକ୍ତ ଦରମା ମିଳିବ। ମାତ୍ର ଓଡ଼ିଶାରେ ଶିକ୍ଷା ସହାୟକ, ଜିଲା ପରିଷଦ ଶିକ୍ଷକ, ଠିକା ଶିକ୍ଷକଙ୍କ ଭଳି ବହୁ ପ୍ରକାର ଶିକ୍ଷକ ତିଆରି ହୋଇଛନ୍ତି। ତେବେ ଶିକ୍ଷକମାନେ ନିଜର ମୌଳିକ ଅଧିକାର କ’ଣ ବୁଝନ୍ତି ନାହିଁ କି ଛାତ୍ରଛାତ୍ରୀଙ୍କ ଅଧିକାର କ’ଣ ଜାଣନ୍ତି ନାହିଁ। ବିନା ଶିକ୍ଷାରେ ରାଜ୍ୟର ବିକାଶ ପରିକଳ୍ପନା କରିବା ଅସମ୍ଭବ। ରାଜ୍ୟ ସରକାର ବିଭିନ୍ନ ଯୋଜନାରେ ବିପୁଳ ଅର୍ଥ ଖର୍ଚ୍ଚ କରୁଥିବାବେଳେ ଶିକ୍ଷକଙ୍କ ସମସ୍ୟା ସମାଧାନ ନେଇ କାହିଁକି ପଦକ୍ଷେପ ଗ୍ରହଣ କରୁନାହାନ୍ତି ବୋଲି ଶ୍ରୀ ମିଶ୍ର ପ୍ରଶ୍ନ କରିବା ସହିତ ରୁଲିଂ ଦାବି କରିଥିଲେ। ଏହି ଆଲୋଚନାରେ ସଦସ୍ୟ ଅଂଶୁମାନ ମହାନ୍ତି, ବିଭୂତି ଭୂଷଣ ହରିଚନ୍ଦନ, ଡ. ପ୍ରଫୁଲ୍ଲ ମାଝୀ, ରବିନାରାୟଣ ନାୟକ, ପ୍ରଦୀପ ପୁରୋହିତ ଏବଂ ସମୀର ରଞ୍ଜନ ଦାସଙ୍କ ସହିତ ମହେଶ ସାହୁ, କ୍ୟାପଟେନ୍ ଦିବ୍ୟଶଙ୍କର ମିଶ୍ର ପ୍ରମୁଖ ଭାଗ ନେଇଥିଲେ।
ଆନ୍ଦୋଳନରତ ଶିକ୍ଷକଙ୍କୁ ମନ୍ତ୍ରୀଙ୍କ ପରାମର୍ଶ: ରାଜରାସ୍ତାକୁ ଯାଅ ନାହିଁ
ଭୁବନେଶ୍ୱର: ଶିକ୍ଷକମାନଙ୍କ ସମସ୍ୟାର ସମାଧାନ ଲାଗି ସରକାର ସବୁବେଳେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି। ମାତ୍ର ଶିକ୍ଷକମାନେ ଆଲୋଚନାକୁ ନଆସି ବାରମ୍ବାର ରାଜରାସ୍ତାକୁ ବାଛୁଛନ୍ତି। ଏହାଦ୍ୱାରା ବିଦ୍ୟାଳୟରେ ଶୈକ୍ଷିକ ବାତାବରଣରେ ଘୋର ବାଧା ସୃଷ୍ଟି ହେଉଛି, ଛାତ୍ରଛାତ୍ରୀମାନେ ଶିକ୍ଷାଦାନରୁ ବଞ୍ଚିତ ହେଉଛନ୍ତି ବୋଲି ବିଦ୍ୟାଳୟ ଓ ଗଣଶିକ୍ଷାମନ୍ତ୍ରୀ ବଦ୍ରିନାରାୟଣ ପାତ୍ର କହିଛନ୍ତି।
ବିଧାନସଭାରେ ଶିକ୍ଷକଙ୍କ ସମସ୍ୟା ନେଇ ଆସିଥିବା ମୁଲତବି ପ୍ରସ୍ତାବର ଆଲୋଚନା କାଳରେ ମନ୍ତ୍ରୀ ଶ୍ରୀ ପାତ୍ର କହିଛନ୍ତି ଯେ ରାଜ୍ୟର ଆର୍ଥିକ ଅବସ୍ଥା ଯେତେବେଳେ ଲାଗି ରହିଥିଲା ସେତେବେଳରୁ ଏପର୍ଯ୍ୟନ୍ତ ସରକାର ସବୁବେଳେ ଶିକ୍ଷକଙ୍କ ଦାବି ପୂରଣ ଲାଗି ପଦକ୍ଷେପ ଗ୍ରହଣ କରିଛନ୍ତି। ତେବେ ଶିକ୍ଷା ବ୍ୟବସ୍ଥାକୁ
ଶାଣିତ ଓ ଶିକ୍ଷକ କର୍ମଚାରୀଙ୍କ ପାଇଁ ଏକ ବୈପ୍ଲବିକ ପରିବର୍ତ୍ତନ ଆଣିଥିଲେ ବିଜୁ ପଟ୍ଟନାୟକ। ତାଙ୍କ ମନ୍ତ୍ରିତ୍ୱକାଳରେ ସରକାର ୧୯୯୧ରେ ବେସରକାରୀ ଅନୁଦାନପ୍ରାପ୍ତ ୫୦୨୦ଟି ମଧ୍ୟ ଇଂରାଜୀ ବିଦ୍ୟାଳୟ ଏବଂ୨୯୨୯ଟି ହାଇସ୍କୁଲକୁ ସରକାରୀ କରାଯାଇଥିଲା। ଯାହାକି ଶିକ୍ଷା ଇତିହାସରେ ସ୍ୱର୍ଣ୍ଣାକ୍ଷରରେ ଲିପିବଦ୍ଧ ହୋଇ ରହିଛି। ଏହାବ୍ୟତୀତ ଶିକ୍ଷା ବ୍ୟବସ୍ଥାକୁ ଶୃଙ୍ଖଳିତ କରିବାପାଇଁ ରାଜ୍ୟ ସରକାରଙ୍କ ପକ୍ଷରୁ ବ୍ଲକ ଗ୍ରାଣ୍ଟ ଉଚ୍ଛେଦ କରି ନୂତନ ଗ୍ରାଣ୍ଟ ଇନ୍ ଏଡ ବ୍ୟବସ୍ଥା କାର୍ଯ୍ୟକାରୀ କରିଛନ୍ତି। ଏହାଦ୍ୱାରା ୧୦୦ ପ୍ରତିଶତ ଅନୁଦାନ ପାଉଥିବା କର୍ମଚାରୀମାନେ ଦରମା ସହିତ ଗ୍ରେଡ ପେ ଏବଂ ଅନ୍ୟାନ୍ୟ ଆନୁଷଙ୍ଗିକ ଭତ୍ତା ପାଇପାରିବେ। ଏହାସହିତ ଯୋଗ୍ୟତା ଦିନଠାରୁ ନୋସନାଲ ଫିକ୍ସେସନ୍, ୱାଲ ନୋଟିସ୍ ସମ୍ପର୍କରେ ବିହୀତ ଆଦେଶ ନିର୍ଗମନ ଓ ଇପିଏଫ୍ ସାଙ୍ଗକୁ ଏକ୍ସଗ୍ରାସିଆ ସୁବିଧା ପ୍ରଦାନ କରାଯାଇଛି। ଏସବୁ ସତ୍ତ୍ବେ ଯଦି ଶିକ୍ଷକମାନେ ସରକାରଙ୍କ ପାଇଁ ଅଡୁଆ ପରିସ୍ଥିତି ସୃଷ୍ଟି କରିବେ ରାଜରାସ୍ତାକୁ ବାଛିବେ ତେବେ କ’ଣ କରାଯାଇ ପାରିବ ବୋଲି ମନ୍ତ୍ରୀ ଶ୍ରୀ ପାତ୍ର ଉତ୍ତରରେ କହିଥିଲେ। ବିଧାନସଭାରେ ମନ୍ତ୍ରୀ ଶ୍ରୀ ପାତ୍ର ଉତ୍ତର ପଢ଼ିବାବେଳେ ବିରୋଧୀମାନେ ପ୍ରବଳ ହଟ୍ଟଗୋଳ କରୁଥିବା ଦେଖିବାକୁ ମିଳିଥିଲା।
