ଚେନ୍ନାଇ: ତାମିଲନାଡ଼ୁର ଡିଏମ୍କେ ସୁପ୍ରିମୋ ଭାବେ ଏମ୍ କେ ଷ୍ଟାଲିନ୍ ଆଜି ବିଧିବଦ୍ଧ ଭାବେ ଦାୟିତ୍ୱ ଗ୍ରହଣ କରିଛନ୍ତି। ଏମ୍ କରୁଣାନିଧି ଅସୁସ୍ଥ ହେବା ପରେ ଗତ ୧ ବର୍ଷ ଧରି ଷ୍ଟାଲିନ୍ ଅସ୍ଥାୟୀ ଭାବେ ଦଳୀୟ କାର୍ଯ୍ୟଭାର ସମ୍ଭାଳି ଆସୁଥିଲେ। କରୁଣାନିଧିଙ୍କ ଦେହାନ୍ତ ପରେ ପାର୍ଟି ସୁପ୍ରିମୋ ପାଇଁ ନିର୍ବାଚନ ପ୍ରକ୍ରିୟା ଆରମ୍ଭ ହୋଇଥିଲା। ମୃତ୍ୟୁର ବହୁ ଦିନ ପୂର୍ବରୁ କରୁଣାନିଧି ଷ୍ଟାଲିନ୍ଙ୍କୁ ତାଙ୍କ ଉତ୍ତରାଧିକାରୀ ଭାବେ ଘୋଷଣା କରିଥିଲେ। କିନ୍ତୁ ଏହି ପଦରେ ଅଧିଷ୍ଠିତ ହେବାକୁ ଚାହୁଁଥିବା କରୁଣାନିଧିଙ୍କ ବଡ଼ପୁଅ ଏମ ଆଲାଗିରି ବାପାଙ୍କ ନିଷ୍ପତ୍ତିର ପ୍ରତିବାଦ କରିଥିଲେ। ଫଳରେ ଦଳ ବିରୋଧୀ କାର୍ଯ୍ୟକଳାପ ଅଭିଯୋଗରେ ଆଲାଗିରିଙ୍କୁ ଡିଏମକେରୁ ବହିଷ୍କାର କରାଯାଇଥିଲା। କିନ୍ତୁ କରୁଣାନିଧିଙ୍କ ମୃତ୍ୟୁ ପରେ ଆଲାଗିରି ପୁଣି ଥରେ ଡିଏମ୍କେରେ ଥିବା ତାଙ୍କ ସମର୍ଥକଙ୍କ ଜରିଆରେ ଦଳ ଭିତରେ ପ୍ରବେଶ କରିବେ ବୋଲି ଆଲୋଚନା ଜୋର ଧରିଥିଲା। ଏହାପରେ ଡିଏମ୍କେ ସୁପ୍ରିମୋ ପଦ ପାଇଁ ପ୍ରତିଦ୍ୱନ୍ଦ୍ୱିତା ଜୋରଦାର ହେବ ବୋଲି କୁହାଯାଉଥିଲା। କିନ୍ତୁ ଜଣେ ମାତ୍ର ପ୍ରାର୍ଥୀ ଭାବେ ଷ୍ଟାଲିନ୍ ପ୍ରାର୍ଥିପତ୍ର ଦାଖଲ କରିଥିବାରୁ ଦଳୀୟ ସୁପ୍ରିମୋ କିଏ ହେବ ତାହା ସ୍ପଷ୍ଟ ହୋଇଯାଇଥିଲା। ମଙ୍ଗଳବାର ଏ ସମ୍ପର୍କରେ ବିଧିବଦ୍ଧ ଘୋଷଣା କରାଯିବା ପରେ ଷ୍ଟାଲିନ୍ ଆଜି ଚେନ୍ନାଇ ସ୍ଥିତ ଦଳର ମୁଖ୍ୟ କାର୍ଯ୍ୟାଳୟ ଆନ୍ନା ଆରିଭାଲାୟାମ୍ରେ ଏକ ବର୍ଣ୍ଣାଢ଼୍ୟ ଉତ୍ସବରେ ଦାୟିତ୍ୱ ଗ୍ରହଣ କରିଛନ୍ତି। ୬୫ ବର୍ଷ ବୟସ୍କ ଏମ୍ ଷ୍ଟାଲିନ୍ କର୍ଣ୍ଣାଟକର ଦୁଇ ଦୁଇଥର ମେୟର ପଦବୀରେ ରହିବା ସହିତ ଥରେ ଉପମୁଖ୍ୟମନ୍ତ୍ରୀ ଦାୟିତ୍ୱ ନିର୍ବାହ କରିଛନ୍ତି।
Popular Categories
Previous article
Next article