ଲକ୍ଷ୍ମୌ . – ଉତ୍ତର ପ୍ରଦେଶର ଲକ୍ଷ୍ମୀପୁର ଖିରି ଜିଲାରେ ଏକ ବଘୁଣୀକୁ ଟ୍ରାକ୍ଟର ଚଢାଇ ହତ୍ୟା କରାଯାଇଥିବା ଅଭିଯୋଗ ହୋଇଛି ।
ଏହି ବାଘୁଣୀଟି ଜଣେ ଲୋକଙ୍କୁ ଆକ୍ରମଣ କରିବାରୁ ସେ ଗୁରୁତର ହୋଇଥିଲେ । ଚିକିତ୍ସାଧୀନ ଅବସ୍ଥାରେ ଏହି ବ୍ୟକ୍ତିଙ୍କର ମୃତ୍ୟୁ ହେବାପରେ ଉତ୍ୟକ୍ତ ଗ୍ରାମବାସୀମାନେ ଦୁଧବାର ବାଘ୍ର ସଂରକ୍ଷଣ ଜଙ୍ଗଲ ମଧ୍ୟରେ ପ୍ରବେଶ କରିବା ସହ ସେଠାରେ ଥିବା ବନ କର୍ମଚାରୀମାନଙ୍କୁ ମାଡ ମାରିଥିଲେ । ଏହାପରେ ବନ ବିଭାଗର ଟ୍ରାକ୍ଟର ନେଇଯିବା ସହ ବାଘୁଣୀକୁ ଖୋଜିଥିଲେ । ୧୦ ବର୍ଷୀୟ ବାଘୁଣୀକୁ ଦେଖିବା ମାତ୍ରେ ତାକୁ ଟ୍ରାକ୍ଟର ଚଢାଇ ଦେଇଥିଲେ। ଏହାପରେ ତାକୁ ପିଟି ପିଟି ହତ୍ୟା କରିଥିଲେ ।
ଏମାନେ ସମସ୍ତେ ବାଘ୍ର ସଂରକ୍ଷଣ ନିକଟରେ ଥିବା ଏକ ଗ୍ରାମର ଲୋକ । ଗତ ୧୦ ବର୍ଷ ମଧ୍ୟରେ ଏହି ବାଘୁଣୀ କୌଣସି ଲୋକଙ୍କୁ ଆକ୍ରମଣ କରି ନଥିବା ବନ ବିଭାଗ ଅଧିକାରୀ କହିଛନ୍ତି । ବନ ବିଭାଗ ଅଭିଯୋଗ ପରେ ପୁଲିସ ଗ୍ରାମବାସୀମାନଙ୍କୁ ଗିରଫ କରିବା ପାଇଁ ଉଦ୍ୟମ ଆରମ୍ଭ କରିଛି ।
ବାଘୁଣୀଟି ଗତ କିଛି ସପ୍ତାହ ହେଲା କିଛି ଗୃହ ପାଳିତ ପଶୁଙ୍କୁ ଆକ୍ରମଣ କରିଥିଲା । ବନ ବିଭାଗକୁ ଅଭିଯୋଗ କରିବାପରେ କୌଣସି କାର୍ଯ୍ୟାନୁଷ୍ଠାନ ହୋଇ ନଥିଲା । ଏହାପରେ ବାଘୁଣୀଟୁ ଜଣେ ଲୋକଙ୍କୁ ମାରି ପକାଇବାରୁ ବାଧ୍ୟ ହୋଇ ଆଇନକୁ ହାତକୁ ନେଇଥିବା ଗ୍ରାମବାସୀମାନେ ଅଭିଯୋଗ କରିଛନ୍ତି । ଗତ କିଛି ଦିନ ତଳେ ମହାରାଷ୍ଟ୍ରର ଏକ ବାଘକୁ ମଣିଷ ମାରିବା ଅଭିଯୋଗରେ ଗୁଳି କରି ହତ୍ୟା କରାଯାଇଥିଲା ।
