ମୁମ୍ବଇ: ବଲିଉଡ଼ ଭାଇଜାନ୍ ସଲମାନ ଖାନ ତାଙ୍କ ଆଗାମୀ ଚଳଚ୍ଚିତ୍ର ‘ଟାଇଗର-୩’କୁ ନେଇ ରର୍ଚ୍ଚାରେ। କିଛିଦିନ ତଳେ ଫିଲ୍ମର ପୋଷ୍ଟର ରିଲିଜ୍ ହୋଇଥିବା ବେଳେ ବୁଧବାର ସାମ୍ନାକୁ ଆସିଛି ‘ଟାଇଗର-୩’ର ଟିଜର। ଶେୟାର କରାଯାଇଥିବା ଭିଡିଓରେ ପୁଣି ଥରେ ସଲମାନ କଡ଼ା ମିଜାଜ୍ରେ ନଜର ଆସିଛନ୍ତି। ଏହି ଭିଡିଓକୁ ଟିଜର କିମ୍ବା ଟ୍ରେଲର ନାଁ ଦିଆଯାଇନାହିଁ, ବରଂ ଏହାକୁ ‘ଟାଇଗର୍ର ମେସେଜ୍’ ବୋଲି କୁହାଯାଇଛି।
ଫିଲ୍ମରେ ସଲମାନଙ୍କ ବିପକ୍ଷରେ ନାୟିକା ସାଜିଛନ୍ତି କ୍ୟାଟ୍ରିନା କୈଫ୍। ଟିଜର୍ ଭିଡିଓରେ ମଧ୍ୟ ଅଭିନେତ୍ରୀଙ୍କ ଝଲକ୍ ଦେଖିବାକୁ ମିଳିଛି। ସଲମାନ ଖାନ ନିଜ ଇନ୍ଷ୍ଟାଗ୍ରାମ ଆକାଉଣ୍ଟରୁ ପୋଷ୍ଟ କରି ପ୍ରଶଂସକଙ୍କୁ ଟିଜର୍ ବିଷୟରେ ସୂଚନା ଦେଇଛନ୍ତି। ଏଥିସହ ଲେଖିଛନ୍ତି ‘‘ଯେପର୍ଯ୍ୟନ୍ତ ଟାଇଗର ମରିନାହିଁ, ସେପର୍ଯ୍ୟନ୍ତ ଟାଇଗର ହାରିନାହିଁ।’’ ଭିଡିଓକୁ ହିନ୍ଦୀ, ତାମିଲ ଓ ତେଲୁଗୁ ଭାଷାରେ ରିଲିଜ୍ କରାଯାଇଛି। ଏଥିସହ ସୂଚନା ଦିଆଯାଇଛି ଯେ, ଫିଲ୍ମ ଚଳିତ ବର୍ଷ ଦୀପାବଳି ଅବସରରେ ମୁକ୍ତିଲାଭ କରିବ। ‘ଟାଇଗର-୩’ରେ ଇମ୍ରାନ ହାଶମୀଙ୍କୁ ଖଳନାୟକ ଭାବେ ଅଭିନୟ କରିଛନ୍ତି। ଫିଲ୍ମରେ ସଲମାନଙ୍କ ସହ ତାଙ୍କ ଲଢେଇ ଦେଖିବାକୁ ମିଳିବ।
ସୂଚନାଯୋଗ୍ୟ, ଆଜି ୟଶରାଜ ଫିଲ୍ମ୍ସର ପ୍ରତିଷ୍ଠା ଦିବସ ତଥା ଦିବଂଗତ ଚଳଚ୍ଚିତ୍ର ନିର୍ମାତା ୟଶ ଚୋପ୍ରାଙ୍କର ଜନ୍ମ ବାର୍ଷିକୀ। ଏହି ଅବସରରେ ‘ଟାଇଗର-୩’ର ଭିଡିଓ ଶେୟାର କରି ଚଳଚ୍ଚିତ୍ରର ପ୍ରମୋଶନ ଆରମ୍ଭ କରାଯାଇଛି।
