ବଲାଙ୍ଗିର : ବଲାଙ୍ଗିର ସରସ୍ୱତୀ ଶିଶୁ ବିଦ୍ୟା ଜ୍ଞାନମନ୍ଦିରରୁ ୨୦୧୪ ମସିହାରେ ମାଟ୍ରିକ ପାସ୍ କରିଛନ୍ତି ସରିତା ବାଗଙ୍କ ଝିଅ ପ୍ରିୟଦର୍ଶନୀ ବାଗ। ତେବେ ତାଙ୍କ ବୋର୍ଡ ପକ୍ଷରୁ ଦିଆଯାଇଥିବା ପ୍ରମାଣପତ୍ରରେ ଜନ୍ମ ତାରିଖ ୧୯୯୯ ଜାନୁଆରୀ ୫ ତାରିଖ ଉଲ୍ଲେଖ ରହିଛି। ମାଟ୍ରିକ ପରେ ଯୁକ୍ତ ଦୁଇ, ଯୁକ୍ତ ତିନି ଆଉ ଏବେ ରମାଦେବୀ ମହିଳା ବିଶ୍ୱବିଦ୍ୟାଳୟରେ ସେ ପିଜି ଶିକ୍ଷା ଲାଭ କରୁଛନ୍ତି। କିନ୍ତୁ ଜନ୍ମ ତାରିଖ ଭୁଲ ଥିବା ଯୋଗୁଁ ତାଙ୍କୁ ବିଭିନ୍ନ ହଇରାଣ ହେବାକୁ ପଡୁଛି। ଏସଂପର୍କରେ ବୋର୍ଡକୁ ଲିଖିତ ଭାବେ ଅଭିଯୋଗ କରିବା ସହ ସ୍କୁଲ ପକ୍ଷରୁ ମଧ୍ୟ ସ୍ପଷ୍ଟିକରଣ ଦିଆଯାଇଥିଲା ଯେ, ସୁଶ୍ରୀ ପ୍ରିୟଦର୍ଶନୀଙ୍କ ଜନ୍ମ ତାରିଖ ୧୯୯୭ ଅଗଷ୍ଟ ମାସ ୯ ତାରିଖରେ । କିନ୍ତୁ ଏହାକୁ ଗ୍ରହଣ କରିବାକୁ ରାଜି ନାହିଁ ବୋର୍ଡ କର୍ତ୍ତୃପକ୍ଷ। ସଂଶୋଧନ କରି ସୁଶ୍ରୀ ବାଗଙ୍କୁ ଦିଆଯାଇଥିବା ପ୍ରମାଣପତ୍ରରେ ପୁଣିଥରେ ଭୁଲ ଜନ୍ମ ତଥ୍ୟ ଦିଆଯାଇଥିବାରୁ ଅନେକ ମାନସିକ ଦୁଶ୍ଚିନ୍ତାରେ ରହୁଛନ୍ତି ସୁଶ୍ରୀ ବାଗ। ଏଭଳି ହେଲେ ଭବିଷ୍ୟତରେ ସମସ୍ୟା ହେବ। ସୁଶ୍ରୀ ବାଗଙ୍କ ମାଆ ସରିତା ବାଗ ଓ ବାପା ଗୋଲାପ ବାଗ ବାରମ୍ବାର ବୋର୍ଡକୁ ଦୌଡି ଜନ୍ମ ତାରିଖ ସଂଶୋଧନ କରିବାକୁ ଲିଖିତ ଭାବେ ଜଣାଇଥିଲେ ବି କୌଣସି ସମାଧାନ ହେଉ ନାହିଁ। ତେଣୁ ଏଥିପ୍ରତି ବୋର୍ଡ କର୍ତ୍ତୃପକ୍ଷ ଦୃଷ୍ଟି ଦେବା ସହ ଛାତ୍ରୀଙ୍କ ଜନ୍ମ ତାରିଖ ସଂଶୋଧନ କରିବାକୁ ଦାବି ହେଉଛି। କେବଳ ଏହି ଛାତ୍ରୀଜଣଙ୍କ ନୁହେଁ, କିଛି ମାସ ତଳେ ବୁଡି ଅଞ୍ଚଳର ଜଣେ ଯୁବକ ମଧ୍ୟ ମାଟ୍ରିକ ପରୀକ୍ଷା ଦେଇଥିଲେ ବି ତାଙ୍କୁ ୬ ବର୍ଷ ଲାଗି ଯାଇଥିଲା ବୋର୍ଡ ପ୍ରମାଣପତ୍ର ପାଇବା ପାଇଁ। ‘ସମାଜ’ର ଖବର ପ୍ରକାଶ ପରେ ଡିଇଓ ନିଜ ଉଦ୍ୟମରେ ଛାତ୍ରଙ୍କୁ ବୋର୍ଡ ପ୍ରମାଣପତ୍ର ଦେଇଥିଲେ। ସେହି ଦୃଷ୍ଟିରୁ ଏହି ଛାତ୍ରୀଙ୍କ ସମସ୍ୟା ସମାଧାନ କରିବାକୁ ଦାବି ହେଉଛି।
