ନୂଆଦିଲ୍ଲୀ : ମଙ୍ଗଳବାରଠାରୁ ଦ୍ବିତୀୟ ପର୍ଯ୍ୟାୟ ମାଲବାର ସମରାଭ୍ୟାସ ଆରମ୍ଭ ହୋଇଛି। ଭାରତ ସହିତ ଆମେରିକା, ଜାପାନ ଓ ଅଷ୍ଟ୍ରେଲିଆକୁ ନେଇ ଆରବ ସାଗରରେ ଏହି ସମରାଭ୍ୟାସ ଆରମ୍ଭ ହୋଇଛି। ଏହି ସମରାଭ୍ୟାସରେ ଭାରତ ନୌସେନାର ଯୁଦ୍ଧବିମାନ ବହନକାରୀ ଯୁଦ୍ଧଜାହାଜ ଆଇଏନଏସ୍ ବିକ୍ରମାଦିତ୍ୟ ସାମିଲ ହୋଇଛି। ଏହା ସହିତ ଆମେରିକାର ଯୁଦ୍ଧବିମାନ ବହନକାରୀ ଯୁଦ୍ଧଜାହାଜ ୟୁଏସଏସ୍ ନିମିଜ୍, ଅଷ୍ଟ୍ରେଲିଆ ନୌସେନାର ହାମସ୍ ବାଲାରାଟ ଓ ଜାପାନର ଜେଏସ୍ ମୁରାସାମେ ସାମିଲ ହୋଇଛି।
ବିକ୍ରମାଦିତ୍ୟରୁ ମିଗ୍-୨୯କେ ଯୁଦ୍ଧବିମାନ ଉଡାଣ କରି ନିମିଜ୍ରେ ଅବତରଣ କରିଥିଲା। ସେହିପରି ନିମିଜ୍ରୁ ଏଫ-୧୮ ଓ ଇ୨ସି ହଉକେରୁ ଉଡାଣ କରି ବିକ୍ରମାଦିତ୍ୟରେ ଅବତରଣ କରିଥିଲା। ଏହି ସମରାଭ୍ୟାସ ନଭେମ୍ବର ୨୦ ତାରିଖ ପର୍ଯ୍ୟନ୍ତ ଚାଲିବ। ପ୍ରଥମ ପର୍ଯ୍ୟାୟ ମାଲବାର ସମରାଭ୍ୟାସ ନଭେମ୍ବର ୩ରୁ ୬ ପର୍ଯ୍ୟନ୍ତ ବଙ୍ଗୋପସାଗରରେ ଚାଲିଥିଲା। ଏଥିରେ ବୁଡାଜାହାଜ ଓ ଯୁଦ୍ଧବିମାନ ଧ୍ବଂସର ରଣକୌଶଳ ପ୍ରଦର୍ଶନ କରାଯାଇଥିଲା। ପୂର୍ବ ଲଦାଖରେ ଭାରତ-ଚୀନ ସେନା ମୁହାଁମୁହିଁ ଅବସ୍ଥାରେ ଥିବାବେଳେ ଏହି ସମରାଭ୍ୟାସ ବେଜିଂକୁ ବିଚଳିତ କରିଛି।
Comments are closed.