ନୂଆଦିଲ୍ଲୀ: ବିଜେପିର ଅସନ୍ତୁଷ୍ଟ ନେତା ତଥା ପାଟଣା ସାହିବ ସାଂସଦ ଶତ୍ରୁଘ୍ନ ସିହ୍ନା ମାର୍ଚ୍ଚ ୨୮ରେ କଂଗ୍ରେସରେ ଯୋଗଦେବେ। ବହୁ ପୂର୍ବରୁ ସେ କଂଗ୍ରେସରେ ଯୋଗଦେବା ନେଇ ଚର୍ଚ୍ଚା ହେଉଥିଲେ ମଧ୍ୟ ଏବେ ସେଥିରେ କଂଗ୍ରେସ ମୋହର ମାରିଛି। ବିହାର କଂଗ୍ରେସ ଅଭିଯାନ ସମିତି ଅଧ୍ୟକ୍ଷ ତଥା ରାଜ୍ୟସଭା ସାଂସଦ ଅଖିଳେଶ ଯାଦବ ସମ୍ବାଦଦାତାମାନଙ୍କ ସହ ଆଲୋଚନା ସମୟରେ ସ୍ପଷ୍ଟ କରିଛନ୍ତି ଯେ ଶତ୍ରୁଘ୍ନ ସିହ୍ନା କଂଗ୍ରେସରେ ସାମିଲ ହେବେ। ସିହ୍ନା ବିଜେପିରେ ରହି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ସରକାରଙ୍କୁ ଲଗାତାର ସମାଲୋଚନା କରିଆସୁଥିଲେ। ଶତ୍ରୁଘ୍ନଙ୍କ ସ୍ଥାନରେ ପାଟଣା ସାହିବରେ କେନ୍ଦ୍ର ମନ୍ତ୍ରୀ ରବିଶଙ୍କର ପ୍ରସାଦଙ୍କୁ ଟିକେଟ ମିଳିଛି। ଉଭୟ ରବିଶଙ୍କର ଓ ଶତ୍ରୁଘ୍ନ କାୟସ୍ଥ ବର୍ଗର ଓ ସେହି ସିଟରେ କାୟସ୍ଥ ବର୍ଗର ଅଧିକ ଭୋଟର ଅଛନ୍ତି। ଶତ୍ରୁଘ୍ନ ଟ୍ୱିଟ କରିଛନ୍ତି ଯେ କଂଗ୍ରେସଯୁକ୍ତ ଭାରତ ପାଇଁ ସମୟ ଆସିଗଲାଣି।
