ଆସନ୍ତା ୪ ସପ୍ତାହ ମଧ୍ୟରେ ଭାରତରେ ପହଞ୍ଚିବ ଦ୍ବିତୀୟ ପର୍ଯ୍ୟାୟରେ ୪ ରାଫାଲ ବିମାନ । ଏହି ବିମାନକୁ ଆଣିବା ନିମନ୍ତେ ଭାରତୀୟ ବାୟୁସେନା ଦଳ ଫ୍ରାନ୍ସରେ ପହଞ୍ଚିଛି । ଏହି ବାୟୁସେନା ପ୍ରତିନିଧି ଦଳ ବିମାନ ଅଣାଯିବା ନେଇ ଲଜିଷ୍ଟିକ ବିଷୟକୁ ଅନୁଧ୍ୟାନ କରିବ । ଏହା ସହ ପୂର୍ବରୁ ଫ୍ରାନ୍ସର ସେଣ୍ଟ ଡ଼ିସିଅର ବାୟୁସେନା କେନ୍ଦ୍ରରେ ତାଲିମ ନେଉଥିବା ପାଇଲଟମାନଙ୍କ ପ୍ରଶିକ୍ଷଣ ସମ୍ପର୍କରେ ମଧ୍ୟ ସମୀକ୍ଷା କରିବା ସହ ବିମାନ ଅଣାଯିବାକୁ ବ୍ୟବସ୍ଥା କରିବ । ପ୍ରଥମ ପର୍ଯ୍ୟାୟରେ ୫ଟି ରାଫାଲ ବିମାନ ଜୁଲାଇ ୨୯ରେ ଭାରତରେ ପହଞ୍ଚିଥିଲା । ପ୍ରାୟ ଚାରି ବର୍ଷ ପୂର୍ବେ ୩୬ ଟି ରାଫାଲେ ବିମାନ କିଣିବା ପାଇଁ ଭାରତ ଫ୍ରାନ୍ସ ସହିତ ଏକ ଚୁକ୍ତି କରିଛି।
ବାୟୁସେନା ପକ୍ଷରୁ କୁହାଯାଇଛି ଯେ ରାଫାଲ ପ୍ରକଳ୍ପର ଅଗ୍ରଗତି ଉପରେ ଯାଞ୍ଚ ରଖିବା ପାଇଁ ଜାନୁଆରୀରୁ ଅନେକ ବାୟୁସେନା ଦଳ ଫ୍ରାନ୍ସ ଗସ୍ତ କରିଛନ୍ତି। ବାୟୁସେନାର ରାଫେଲ ପ୍ରୋଜେକ୍ଟ ମ୍ୟାନେଜମେଣ୍ଟ ଟିମର ପ୍ୟାରିସରେ ଏକ କାର୍ଯ୍ୟାଳୟ ଅଛି ଯାହା ଗ୍ରୁପ୍ କ୍ୟାପଟେନ ପଦବୀର ଜଣେ ଅଧିକାରୀଙ୍କ ଦ୍ୱାରା ପରିଚାଳିତ | ଆସିଷ୍ଟାଣ୍ଟ ଚିଫ୍ ଏୟାର ଷ୍ଟାଫ୍ (ପ୍ରୋଜେକ୍ଟ) ଙ୍କ ନେତୃତ୍ୱରେ ଏକ ବିଶେଷଜ୍ଞ ଦଳ ଏହି ସପ୍ତାହ ପୂର୍ବରୁ ଫ୍ରାନ୍ସରେ ପହଞ୍ଚିଥିଲେ। ରାଫେଲ ବିମାନର ପ୍ରଥମ ବ୍ୟାଚ୍ ୧୦ ସେପ୍ଟେମ୍ବରରେ ବାୟୁସେନାରେ ଭର୍ତ୍ତି କରାଯାଇଥିଲା । ସେହିପରି ଖୁବ୍ ଶୀଘ୍ର ଆଉ ୪ ବିମାନ ଭାରତରେ ପହଞ୍ଚିବ ବୋଲି ସେ ସୂଚନା ଦେଇଛନ୍ତି ।
