ରେଙ୍ଗାଲି: ଗାଈଗୋରୁଙ୍କୁ ଗୋମାତା ଗୋରୁ ବିଷ୍ଣୁ ବୋଲି ଆଖ୍ୟାୟିତ କରଯାଇଛି। ହିନ୍ଦୁ ଧର୍ମରେ ଗାଈଗୋରୁଙ୍କୁ ବିଭିନ୍ନ ସମୟରେ ପୂଜା କରିବାର ବିଧି ରହିଛି। ତେବେ ଆଧୁନିକତାର ଚାକଚକ୍ୟ ଓ ପାଶ୍ଚାତ୍ୟ ସଭ୍ୟତାରେ ଆକ୍ରାନ୍ତ ଆମ ସମାଜରେ ଗୋପାଳକମାନେ ଗାଈଗୋରୁଙ୍କୁ ଗୁହାଳରେ ନରଖି ବୁଲିବା ପାଇଁ ଛାଡି ଦେଉଛନ୍ତି । ଦିନରାତି ବାରବୁଲା ହୋଇ ବୁଲୁଛନ୍ତି ଗାଈଗୋରୁ। ଏଭଳି ଅବସ୍ଥା ରେଙ୍ଗାଲିରେ ମଧ୍ୟ ଦେଖିବାକୁ ମିଳୁଛି। ଏଥିଯୋଗୁଁ ରେଙ୍ଗାଲିରେ ବିଭିନ୍ନ ସମୟରେ ଟ୍ରାଫିକ ସମସ୍ୟା ଦେଖାଦେଉଛି। ଗାଈଗୋରୁ ସମ୍ବଲପୁର-ରାଉରକେଲା ରାଜ୍ୟ ରାଜପଥର ବିଭିନ୍ନ ଛକ ଓ ରାସ୍ତାରେ ଗୋଠ ମାଡି ରହୁଥିବାର ଦେଖିବାକୁ ମିଳୁଛି । ଏଥିଯୋଗୁଁ ବିଗତ ଦିନରେ ଗାଡି ଧକ୍କାରେ ଅନେକ ଗାଈଗୋରୁ ମୃତ ଓ ଆହତ ହୋଇଥିବାର ଜଣାପଡିଛି। ସବୁଠାରୁ ପରିତାପ ଓ ବିଡମ୍ବନାର ବିଷୟ ଯେ, ଦୁର୍ଘଟଣାରେ ଗାଈଗୋରୁ ମୃତାହତ ହେଉଥିଲେ ମଧ୍ୟ ସେମାନଙ୍କୁ ପାଳନ କରିଥିବା ଗୋପାଳକଙ୍କ ଦେଖା ଦର୍ଶନ ମିଳୁନାହିଁ। ଗତ କିଛିଦିନ ତଳେ ଏଭଳି ଅଭାବନୀୟ ଘଟଣା ତହସିଲ ଛକ ଓ ରାମଚନ୍ଦ୍ର ନଗର ଛକରେ ଘଟିଥିବା ବେଳେ ଗୋପାଳକ ନ ଆସିବାରୁ ସ୍ଥାନୀୟ ସ୍ବେଚ୍ଛାସେବୀ ଅନୁଷ୍ଠାନ ସ୍ବାଧୀନ ଏକତା ସଙ୍ଗଠନର ସ୍ବେଚ୍ଛାସେବୀ ହରିଶ ସାହା ଓ ତାଙ୍କ ସହଯୋଗୀ ମୃତାହତ ଗୋରୁଙ୍କୁ ଉଦ୍ଧାର କରି ଆହତ ଗୋରୁଙ୍କ ଚିକିତ୍ସା ଓ ମୃତ ଗୋରୁଙ୍କ ବିଧିମତେ ସତ୍କାର କରିଥିବା ଜଣାପଡିଛି । ଗତ ୭ ଦିନ ମଧ୍ୟରେ ଗାଡି ଧକ୍କାରେ ରେଙ୍ଗାଲି ତହସିଲ ଛକରେ ଗୁରୁତର ଆହତ ହୋଇଥିବା ଦୁଇ ଗୋରୁଙ୍କୁ ହରିଶ ଏବଂ ତାଙ୍କ ସହଯୋଗୀ ଉଦ୍ଧାର କରି ଚିକିତ୍ସା କରାଇଥିବା ବେଳେ ରାମଚନ୍ଦ୍ରନଗର ଛକରେ ଦୁର୍ଘଟଣାରେ ମୃତ୍ୟୁ ଘଟିଥିବା ଏକ ଗୋରୁର ସତ୍କାର କରିଥିବା ଜଣାପଡିଛି।
Popular Categories
Previous article
Next article