ମୁଖୀଗୁଡା: ଅର୍ଥ ସାଜିଛି ବାଧକ। ଅର୍ଥ ଅଭାବ ଯୋଗୁଁ ଆଖିତଳେ ବଢୁଥିବା ମାଂସ ପିଣ୍ଡୁଳାର ଅପରେସନ କରି ପାରୁ ନାହାନ୍ତି ଖଗପତି ସାହୁ। ଆଖି ତଳେ ବଢୁଥିବା ମାଂସ ପିଣ୍ଡୁଳା ଯୋଗୁଁ ଗୋଟିଏ ଆଖି ଭଲ ଭାବରେ ଦେଖା ଯାଉନାହିଁ। କିଛି ସରକାରୀ ସାହାଯ୍ୟ ମିଳିଲେ ଭଲ ଡାକ୍ତର ଖାନାରେ ଚିକିତ୍ସା କରିପାରନ୍ତେ ବୋଲି ଖଗପତି ସାହୁ ଆଶା ରଖିଛନ୍ତି।
କଳାହାଣ୍ଡି ଜିଲ୍ଲା ଜୟପାଟଣା ବ୍ଳକ ମୁଖୀଗୁଡ଼ା ଗ୍ରାମପଞ୍ଚାୟତ ଅନ୍ତର୍ଗତ ତାଲଗୁଡ଼ ଗ୍ରାମର ଖଗପତି ସାହୁ(୫୮ ) ଙ୍କୁ ଯେତେବେଳେ ଆଠବର୍ଷ ହୋଇଥିଲା ସେତେବେଳେ ତାଙ୍କ ଗାଲରେ ଏକ ମାଂସ ପିଣ୍ଡୁଳା ବାହାରି ଥିଲା। ଧୀରେ ଧୀରେ ତାହା ବଢିବାକୁ ଲାଗିଲା। ପରିବାରର ଆର୍ଥିକ ସ୍ଥିତି ଭଲ ନ ଥିବାରୁ ଚିକିତ୍ସିତ ହୋଇପାରୁନ ଥିଲେ। ଗତ ୨୬ବର୍ଷ ତଳେ ନିଜେ କୁଲି ମଜୁରୀ କରି ସଞ୍ଚୟ କରିଥିବା ଟଙ୍କାରେ ଅପରେସନ କରିଥିଲେ। ହେଲେ ଅପରେସନର ଦୁଇ ବର୍ଷ ପରେ ଆଖି ତଳେ ପୁଣି ମାଂସ ବଢିବା ଆରମ୍ଭ ହେଲା। ସେ ପରିବାରର ମୁଖ୍ୟ ହୋଇଥିବା ବେଳେ ଆର୍ଥିକ ସ୍ଥିତି ଦୁର୍ବଳ ଥିବାରୁ ଆଉ ଚିକିତ୍ସିତ ହୋଇପାରି ନାହାନ୍ତି। ସରକାରୀ ସହାୟତା ପାଇଁ ଚେଷ୍ଟା କରି ମଧ୍ୟ ସେ ବିଫଳ ହେଲେ। ଯେଉଁ କୁଡ଼ିଆରେ ରହିଆସୁଥିଲେ ତାହା ମଧ୍ୟ ଭୁଶୁଡ଼ି ପଡ଼ିଲାପରେ ସେ ମୂଖୀଗୁଡ଼ା ସ୍ଥିତ ଏକ ଓଏଚପିସି କ୍ବାଟରରେ ରହୁଛନ୍ତି। ରାଜ୍ୟ ସରକାରଙ୍କ ପକ୍ଷରୁ ତାଙ୍କୁ ଆର୍ଥିକ ସହାୟତା ପ୍ରଦାନ କରାଯିବା ସାଙ୍ଗକୁ ସରକାରୀ ସ୍ତରରେ ଚିକିତ୍ସା ବ୍ୟବସ୍ଥା କରିବାକୁ ସେ ନିବେଦନ କରିଛନ୍ତି।
