ସମ୍ବଲପୁର : ମା’ ସମଲେଶ୍ୱରୀଙ୍କ ମହିମା ପ୍ରଚାର ସହିତ ସମ୍ବଲପୁରୀ ସଂସ୍କୃତି ଓ କଳାର ପ୍ରଚାର ପ୍ରସାର ନିମନ୍ତେ ସଂସ୍କୃତି ପ୍ରେମୀମାନେ ସେମାନଙ୍କ ଉଦ୍ୟମ ଜାରି ରଖିଥିବାବେଳେ ଏଥିରେ ଶନିବାର ଏକ ନୂତନ ଅଧ୍ୟାୟ ଯୋଡି ହୋଇଯାଇଛି। ସମ୍ବଲପୁରର ସେଙ୍କି ଜ୍ୱେଲର୍ସ ତରଫରୁ ଶନିବାର ମା’ ସମଲେଶ୍ୱରୀଙ୍କ ଫଟୋ ଚିତ୍ର ଅଙ୍କିତ ୧୦ ଗ୍ରାମ ଓଜନର ମିରର ଫିନିସ ରୂପା କଏନ ବଜାରରେ ଲଞ୍ଚ କରାଯାଇଛି।
ଏ ସର୍ମ୍ପକରେ ସେଙ୍କି ଜ୍ୱେଲର୍ସର ମାଲିକ ସେଙ୍କି ଓ ତନୁ କହିଛନ୍ତି ଯେ, ଆମେ ଗହଣା ବ୍ୟବସାୟ ବହୁ ଦିନରୁ କରୁଥିବାବେଳେ ମା’ ସମଲେଶ୍ୱରୀଙ୍କ ମହିମା ପ୍ରଚାର ସହିତ ସମ୍ବଲପୁରୀ କଳା ଓ ସଂସ୍କୃତିର ପ୍ରଚାର ପ୍ରସାର ନିମନ୍ତେ ଉଦ୍ୟମ ଜାରି ରଖିଛୁ। ପ୍ରଥମରୁ ରୂପା କଏନ୍ ଗୁଡିକରେ ଶ୍ରୀ ଗଣେଶ ଓ ମା’ ଲକ୍ଷ୍ମୀଙ୍କ ପ୍ରତିକୃତି ଅଙ୍କିତ ରହିଥିବାର ଉପଲବ୍ଧ ଅଛି। କିନ୍ତୁ ମା’ ସମଲେଶ୍ୱରୀଙ୍କ ପ୍ରତିକୃତି ଅଙ୍କିତ ଥିବା ରୂପା କଏନ୍ ଉପଲବ୍ଧ ନ ଥିବାରୁ ପ୍ରଥମ ଥର ପାଇଁ ନୂଆଦିଲ୍ଲୀର ଏକ କମ୍ପାନୀର ସହାୟତାରେ ରଙ୍ଗୀନ ପ୍ରତିକୃତି ରହିଥିବା ରୂପା କଏନ ନିର୍ମାଣ କରାଯାଇଛି। ପ୍ରଥମ ପର୍ଯ୍ୟାୟରେ ୯୯.୯୯ ପ୍ରତିଶତ ଶୁଦ୍ଧ ରୂପରେ ୨ ଶହଟି କଏନ ନିର୍ମାଣ କରାଯାଇଥିବାବେଳେ ଇତି ମଧ୍ୟରେ ପୁନଃ ୨ ଶହଟି ନୂତନ କଏନ୍ ପାଇଁ ଅର୍ଡର ଦିଆସରିଛି। ଆଗାମୀ ଦିନରେ ବଜାରର ଚାହିଦାକୁ ଦେଖି ପ୍ରାୟ ୧ ଲକ୍ଷ କଏନ୍ ନିର୍ମାଣ କରାଯିବାର ଲକ୍ଷ୍ୟ ରଖାଯାଇଛି। ଏହି ରୂପା କଏନ୍ ନିର୍ମିତ ହେବା ପରେ ୫ଟି ରୂପା କଏନ୍ ପ୍ରଥମେ ମା’ ସମଲେଶ୍ୱରୀଙ୍କୁ ମନ୍ଦିର ଟ୍ରଷ୍ଟ ବୋର୍ଡ ଜରିଆରେ ପ୍ରଦାନ କରାଯାଇଛି। ଆଗାମୀ ଦିନରେ ସମ୍ବଲପୁରୀ ବାନ୍ଧକଳା ସମେତ ଅନ୍ୟାନ୍ୟ କଳା ଓ ସଂସ୍କୃତି ଚିତ୍ରିତ ଅଳଙ୍କାର ମଧ୍ୟ ବଜାରରେ ପ୍ରବେଶ କରାଇବାର ଯୋଜନା ରଖିଛୁ ବୋଲି ସେଙ୍କି ଜ୍ୱେଲର୍ସ ତରଫରୁ କୁହାଯାଇଛି।
Comments are closed.