ବ୍ରହ୍ମପୁର: ବ୍ରହ୍ମପୁର ସହରରେ ଗୋଟିଏ ରାତିରେ ଦୁଇଟି ଶୋ’ରୁମ ତଥା ବଡ ଦୋକାନର କ୍ୟାସ କାଉଣ୍ଟରରୁ ୧୬ ଲକ୍ଷ ଟଙ୍କା ଚୋରି ହୋଇଛି । ଚୋର ଦଳ ଦୋକାନର ପଛପଟ କବାଟ ଭାଙ୍ଗି ଭିତରକୁ ପଶି କଳାକନା ବୁଲାଇବାରେ ସକ୍ଷମ ହୋଇଛନ୍ତି । ଖବର ପାଇ ବୈଦ୍ୟନାଥପୁର ଥାନା ପୁଲିସ ସାଇଣ୍ଟିଫିକ ଟିମ ସହ ଉଭୟ ଘଟଣାସ୍ଥଳରେ ପହଞ୍ଚି ଖୋଲତାଡ଼ ଆରମ୍ଭ କରିଛି।
ଗେଟବଜାର-ନୂଆ ବସଷ୍ଟାଣ୍ଡ ରୋଡ଼ ଶିବ ମନ୍ଦିର ସମ୍ମୁଖରେ ଥିବା ଏସିଆନ ସୁପର ବଜାର ତଥା ଫୁଟୱେର ନାମକ ଶୋ’ରୁମ ଭିତରେ ଥିବା ୩ ଟି କାଉଣ୍ଟରରୁ ୮ଲକ୍ଷ ୪ ହଜାର ଟଙ୍କା ଚୋରି ହୋଇଥବା ପୁଲିସ ନିକଟରେ ଅଭିଯୋଗ ହୋଇଛି । ଶୋ’ରୁମ ମାଲିକ ମହମ୍ମଦ ଇରଫାନ ସକାଳୁ ଚାବି ଖୋଲି ଭିତରକୁ ପଶିବା ପରେ ଚୋରି ହୋଇଥିବା ଜାଣି ପୁଲିସକୁ ଜଣାଇଥିଲେ । ସେହି ଶୋ’ରୁମର ଉପର ମହଲାର ପଛପଟ ଓ ସମ୍ମୁଖ କବାଟ ଭାଙ୍ଗି ଚୋରଦଳ ତଳ ମହଲାକୁ ଆସି ଟଙ୍କା ନେଇଥିବା ସ୍ପଷ୍ଟ ହୋଇଛି । ସେଠାରେ ଏଏସଆଇ ନାରାୟଣ ସ୍ୱାଇଁ ତଦନ୍ତ ଚଳାଇଛନ୍ତି । ସେହିପରି ଏହି ଥାନା ଅନ୍ତର୍ଗତ ବ୍ରହ୍ମପୁର ତହସିଲ କାର୍ଯ୍ୟାଳୟ ସମ୍ମୁଖରେ ଥିବା ପାର୍ଥି ପ୍ଲାଏଉଡ଼ ଆଣ୍ଡ ଇଲେକ୍ଟ୍ରିକାଲ ଦୋକାନର କ୍ୟାସ କାଉଣ୍ଟରରୁ ପ୍ରାୟ ୮ ଲକ୍ଷ ଟଙ୍କା ଚୋରି ହୋଇଥିବା ଏହାର ମାଲିକ ରବି କିରନ ଅଭିଯୋଗ କରିଛନ୍ତି । ସେଠାରେ ଏସଆଇ ବିଭୁତି ସେଠି ଓ ସାଇଣ୍ଟିଫିକ ଟିମ ତଦନ୍ତ ଚଳାଇଛନ୍ତି ।
