ନିର୍ଦ୍ଧାରିତ ସମୟ ପୂର୍ବରୁ ଭିନ୍ନକ୍ଷମଙ୍କ ଖାତା ଛଡ଼ାଇ ନେଲେ ଅଧ୍ୟାପକ, ଦାବିପତ୍ର ଦେଲେ ଅଭିଭାବକ

କାମାକ୍ଷାନଗର: କାମାକ୍ଷାନଗର ବ୍ଲକ ଅନ୍ତର୍ଗତ କୋଟଗରା ପଞ୍ଚାୟତର ପରିମାଳ ଉଚ୍ଚ ମାଧ୍ୟମିକ ବିଦ୍ୟାଳୟରେ ପରୀକ୍ଷା ଚାଲିଥିଲାବେଳେ ଧାର୍ଯ୍ୟ ସମୟର ଘଣ୍ଟାଏ ପୂର୍ବରୁ ଅଧ୍ୟାପକ ଭିନ୍ନକ୍ଷମ ପରୀକ୍ଷାର୍ଥୀଙ୍କ ଖାତା ଛଡ଼ାଇ ନେଇଛନ୍ତି। ପ୍ରତିବାଦରେ କାମାକ୍ଷାନଗର ଉପଜିଲ୍ଲାପାଳଙ୍କୁ ଭେଟି କଲେଜ ଅଧ୍ୟକ୍ଷାଙ୍କ ବିରୁଦ୍ଧରେ ଦାବିପତ୍ର ଦେଇଛନ୍ତି ଅଭିଭାବକ। କାମାକ୍ଷାନଗର ବ୍ଲକ କଦଳୀପାଳ ଗ୍ରାମର ବିନୋଦ ବିହାରୀ ମହାଭୋଇଙ୍କ ପୁଅ ଦିବ୍ୟରଞ୍ଜନ ମହାଭୋଇ ପଣ୍ଡୁଆସ୍ଥିତ ପାରିମାଳ ମାଧ୍ୟମିକ ବିଦ୍ୟାଳୟରେ +୨ ଭୋକେସନାଲ ପରୀକ୍ଷା ଦେଉଛନ୍ତି। ଦିବ୍ୟରଞ୍ଜନ ଜଣେ ଶତ ପ୍ରତିଶତ ଭିନ୍ନକ୍ଷମ ହୋଇଥିବାବେଳେ ସେ ପରୀକ୍ଷା ଦେବା ସମୟରେ ଜଣେ ସାହାଯ୍ୟକାରୀଙ୍କ ସହାୟତାରେ ପରୀକ୍ଷା ଦେଉଛନ୍ତି। ତେବେ ଗତ ୨୪ ତାରିଖରେ ଦିବ୍ୟରଞ୍ଜନ ନିଜ ସାହାଯ୍ୟକାରୀଙ୍କ ସହ ପାରିମାଳ ମହାବିଦ୍ୟାଳୟଠାରେ ବିଜ୍‌ନେସ ମ୍ୟାନେଜମେଣ୍ଟ ବିଷୟରେ ପରୀକ୍ଷା ଦେଉଥିଲେ। ତାଙ୍କ ପାଇଁ ହୋଇଥିବା ନିର୍ଦ୍ଧାରିତ ସମୟର ପ୍ରାୟ ଘଣ୍ଟାଏ ପୂର୍ବରୁ ପରୀକ୍ଷା ପରିଚାଳନା କରୁଥିବା ଅଧ୍ୟାପକ ନିର୍ମଳ କୁମାର ସାହୁ ଦିବ୍ୟରଞ୍ଜନଙ୍କ ସାହାଯ୍ୟକାରୀଭାବେ ଖାତାରେ ଲେଖୁଥିବା ଜନୈକା ଛାତ୍ରୀଙ୍କଠାରୁ ଖାତା ଛଡାଇ ଆଣିଥିଲେ। ଜଣେ ଶତ ପ୍ରତିଶତ ଭିନ୍ନକ୍ଷମ ପିଲା, ନିଜ ଭବିଷ୍ୟତ ପାଇଁ ସରକାରୀ ନିୟମ ଅନୁସାରେ ସାହାଯ୍ୟକାରୀଙ୍କ ସହାୟତାରେ ପରୀକ୍ଷା ଦେଉଥିବାବେଳେ କାହିଁକି ଧାର୍ଯ୍ୟ ସମୟ ପୂର୍ବରୁ ତାଙ୍କ ପରୀକ୍ଷା ଖାତା ଛଡାଇ ନିଆଗଲା, ସେହି ପ୍ରତିବାଦରେ ଦିବ୍ୟରଞ୍ଜନଙ୍କ ବାପା ବିନୋଦ ବିହାରୀ ମହାଭୋଇ କାମାକ୍ଷାନଗର ଉପଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରିଛନ୍ତି। ଯଦି ପୁଅ ଭବିଷ୍ୟତରେ ପାସ୍ ନକରି ଫେଲ୍ ହୁଏ ତାହାଲେ ସମ୍ପୃକ୍ତ ମହାବିଦ୍ୟାଳୟର ଅଧ୍ୟକ୍ଷା ଓ ଅଧ୍ୟାପକ ଦାୟୀ ରହିବେ ବୋଲି ସେ କହିଛନ୍ତି। ତେବେ କାମାକ୍ଷାନଗର ଉପଜିଲ୍ଲାପାଳଙ୍କ ଅନୁପସ୍ଥିତରେ ସହକାରୀ ଜିଲ୍ଲାପାଳ ଦୀପକ କୁମାର ମିଶ୍ର ଅଭିଯୋଗକୁ ଗ୍ରହଣ କରି ତ୍ୱରିତ ପଦକ୍ଷେପ ଗ୍ରହଣ କରିବା ପାଇଁ ପ୍ରତିଶ୍ରୁତି ଦେଇଛନ୍ତି। ଜଣେ ଶତ ପ୍ରତିଶତ ଭିନ୍ନକ୍ଷମ ପିଲାକୁ ଏପରି ନିର୍ଦ୍ଧାରିତ ସମୟ ପୂର୍ବରୁ ଖାତା ଛଡାଇନେବା ମାମଲାରେ ପାରିମାଳ ମହାବିଦ୍ୟାଳୟର ଅଧ୍ୟକ୍ଷାଙ୍କ ପ୍ରତିକ୍ରିୟା ମିଳିପାରିନାହିଁ।