କାମାକ୍ଷାନଗର: କାମାକ୍ଷାନଗର ଥାନା ଅନ୍ତର୍ଗତ ବାଲିଗୋରଡ ପଞ୍ଚାୟତର ଖଟଖୁରା ଏବଂ କାନପୁରା ପଞ୍ଚାୟତର ପଲ୍ଲୀ ଶାନ୍ତରାପୁର ଗ୍ରାମରେ ଗୁରୁବାର ବଜ୍ରପାତରେ ଦୁଇଜଣ ଗୁରୁତର ଭାବେ ଆହତ ହୋଇଛନ୍ତି। ଦୁଇ ଗୁରୁତରଙ୍କୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି। ଏଥିସହ ବଜ୍ରପାତରେ ୪ଟି ଛେଳିଙ୍କର ମୃତ୍ୟୁ ଘଟିଥିବା ଜଣାପଡ଼ିଛି। ବାଲିଗୋରଡ଼ ପଞ୍ଚାୟତର ଖଟଖୁରା ଗ୍ରାମ କଟାସାହିର ବିଦ୍ୟାଧର ବେହେରା ଛେଳି ଚରାଇବାକୁ ଯାଇଥିବା ବେଳେ ଅପରାହ୍ନରେ ବଜ୍ରପାତ ହୋଇଥିଲା। ଏଥିରେ ବିଦ୍ୟାଧର ଗୁରୁତର ଭାବେ ଆହତ ହୋଇଥିବା ବେଳେ ତାଙ୍କର ଚାରିଟି ଛେଳିଙ୍କ ମୃତ୍ୟୁ ହୋଇଛି।
ସେହିପରି କାନପୁରା ପଞ୍ଚାୟତର ପଲ୍ଲୀ ଶାନ୍ତରାପୁର ଗ୍ରାମର ଗୁରୁବାରୀ ନାୟକ ନିଜ ଘରେ ବସିଥିବା ବେଳେ ବଜ୍ରପାତ ହୋଇଥିଲା। ଫଳରେ ଘର ଜଳି ଯାଇଥିବା ବେଳେ ଗୁରୁବାରୀ ଗୁରୁତର ଭାବେ ଆହତ ହୋଇଛନ୍ତି। ତାଙ୍କୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି। ଉଭୟ ଗୁରୁତର ଏବେ ଚିକିତ୍ସାଧୀନ ଅଛନ୍ତି।
