ଗୁରୁଡିଝାଟିଆ : ରାସ୍ତାର ପ୍ରଶସ୍ତିକରଣ ପାଇଁ ପିଚୁ ହେବା ତ ଦୂରକଥା। ଏବେସୁଦ୍ଧା ଅନେକ ସ୍ଥାନରେ ରାସ୍ତା ଉଚ୍ଚା ପାଇଁ ମାଟି ବିଛାଯିବା କାର୍ଯ୍ୟ ଚାଲିଛି। ଦକ୍ଷୀଣ-ପଶ୍ଚିମ ମୌସୁମୀ ବାୟୁ ହାତ ପାହାନ୍ତାରେ। ଦକ୍ଷିଣ ଓଡିଶାରେ ମୌସୁମୀବାୟୁ ସକ୍ରିୟ ହେଲାଣି। ରାସ୍ତା କାର୍ଯ୍ୟ ସଂପୂର୍ଣ୍ଣ ହୋଇନଥିବାରୁ କଖଡି କଲେଜଛକ ଠାରୁ ବ୍ରାହ୍ମଣବସ୍ତ ଦେଇ ୫୫ ନଂ ଜାତୀୟ ରାଜପଥକୁ ସଂଯୋଗ କରୁଥିବା ପୂର୍ତ୍ତ ଓ କୋଠାବାଡି ବିଭାଗ ରାସ୍ତାର ଏଭଳି ଚିତ୍ର ଦେଖିବାକୁ ମିଳେ। ପ୍ରକାଶଯୋଗ୍ୟ ଏହି ରାସ୍ତାଟିର ସଂପ୍ରସାରଣ ଓ ଉନ୍ନତିକରଣ କରିବା ନିମନ୍ତେ ବିଭାଗ ପକ୍ଷରୁ ଠିକାଦାରଙ୍କୁ ଦିଆଯାଇଛି କାର୍ଯ୍ୟାଦେଶ। ରାସ୍ତାଟି ମହାନଦୀର ବନ୍ୟାରେ ବୁଡିଯାଇଥାଏ।
ସେଥିପାଇଁ ବ୍ରାହ୍ମଣବସ୍ତ, ବିଷ୍ଣୁପୁର ,ରାମଶ୍ୟାମପୁର ଆଦି ଗାଁର ଜନସାଧାରଣଙ୍କ ସହିତ କଖଡିର ସଂଯୋଗ ବିଚ୍ଛିନ୍ନ ହୋଇଥାଏ। ଏହାକୁ ଦୃଷ୍ଟିରେ ରଖି ବିଭାଗ ପକ୍ଷରୁ ପ୍ରଶସ୍ତିକରଣ ସହିତ ରାସ୍ତାକୁ ଉଚ୍ଚା କରାଯାଉଛି। ରାସ୍ତା କାର୍ଯ୍ୟର କଚ୍ଛପ ଗତି ଯୋଗୁଁ କଖଡି ହାଇସ୍କୁଲ ଠାରୁ ବିଷ୍ଣୁପୁର ପର୍ଯ୍ୟନ୍ତ ମାଟିକାର୍ଯ୍ୟ ସଂପୂର୍ଣ୍ଣ ହୋଇପାରୁନାହିଁ। ଦିନେ ଦୁଇଦିନ ଭିତରେ ମୌସୁମୀ ବାୟୁ ଯୋଗୁଁ ବର୍ଷା ଆରମ୍ଭ ହୋଇଯିବ।
ଏହା ହେଲେ ରାସ୍ତାରେ ଯାତାୟାତ ସଂପୁର୍ଣ୍ଣ ଠପ ହୋଇଯିବ। ତୁରନ୍ତ ଏଂହି କାର୍ଯ୍ୟକୁ ସମାପନ କରିବା ପାଇଁ ବିଭାଗୀୟ ଯନ୍ତ୍ରୀ କଣ ପାଇଁ ଠିକାଦାରଙ୍କୁ ନିର୍ଦ୍ଦେଶ ଦେଉନାହାନ୍ତି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି? ତୁରନ୍ତ ରାସ୍ତାକାର୍ଯ୍ୟ ସମାପନ କରିବା ପାଇଁ ସ୍ଥାନୀୟ ଜନସାଧାରଣ ଦାବି କରିଛନ୍ତି।
Comments are closed.