ଗୁରୁଡିଝାଟିଆ: ଖୁଣ୍ଟୁଣୀ ଥାନା ଅନ୍ତର୍ଗତ ୫୫ ନଂ ଜାତୀୟ ରାଜପଥରେ ଦୁଇଟି ଗାଡି ମୁହାଁମୁହିଁ ଧକ୍କା ହେବା ଫଳରେ ଜଣକର ମୃତ୍ୟୁ ଘଟିଛି। ମୃତକଙ୍କ ନାମ ସଞ୍ଚିତ ସିଂ ହୋଇଥିବା ବେଳେ ବିହାର ମୁଜାଫରପୁର ଅଞ୍ଚଳର ବାସିନ୍ଦା ବୋଲି ପୁଲିସ ସୂତ୍ରରୁ ଜଣାପଡିଛି।
ପ୍ରକାଶଯୋଗ୍ୟ ଗତକାଲି ଖୁଣ୍ଟୁଣୀ ନର୍ସରୀ ଠାର ହୁଣ୍ଡାଇକାର ନେଇ ଆସୁଥିବା ଏକ କଣ୍ଟେନର କଟକ ଅଭିମୁଖେ ଆସୁଥିବା ବେଳେ ଚାଳକ ଭାରସାମ୍ୟ ହରାଇ ରାସ୍ତାରେ ଥିବା ଡିଭାଇଡରକୁ ଅତିକ୍ରାନ୍ତ କରି ରାସ୍ତାର ଅପରପାର୍ଶକୁ ଚାଲିଯାଇଥିଲା। ଏହି ସମୟରେ ବିପରୀତ ଦିଗରୁ ଢେଙ୍କାନାଳ ଅଭିମୁଖେ ଆସୁଥିବା ଏକ ମିନିଟ୍ରକ କଣ୍ଟେନରକୁ ମୁହାଁମୁହିଁ ଧକ୍କା କରିଥିଲା। ଫଳରେ ମିନିଟ୍ରକର ଚାଳକ ଗୁରୁତର ହୋଇପଡିଥିଲା।
ଘଟଣାସ୍ଥଳରେ ଖୁଣ୍ଟୁଣୀ ପୁଲିସ ପହଞ୍ଚି ଗୁରୁତର ଆହତ ହୋଇଥିବା ଚାଳକ ସଞ୍ଚିତ ସିଂଙ୍କୁ ଚିକିତ୍ସା ପାଇଁ କଟକ ଏସସିବି ମେଡ଼ିକାଲ ନେଉଥିବା ବେଳେ ବାଟରେ ତାଙ୍କର ମୃତ୍ୟୁ ହୋଇଥିଲା। କଣ୍ଟେନର ଚାଳକ ଓ ହେଲପର ଆହତ ହୋଇଥିବାରୁ ସେମାନଙ୍କୁ ଆଠଗଡ ଚିକିତ୍ସାଳୟରେ ରଖି ସେମାନଙ୍କ ଚିକିତ୍ସା ଜାରି ରହିଛି।
ରାସ୍ତା ଉପରେ ଦୁର୍ଘଟଣା ଘଟଣାଇଥିବା ଗାଡିଦୁଇଟିକୁ ପୁଲିସ ହଟାଇବା ପରେ ଜବତ କରିଛି। କଣ୍ଟେନର ଚାଳକ ମହମ୍ମଦ ଆର୍ସାଦ ଅନସାରୀ(୩୪) ଘର ଝାଡଖଣ୍ଡ ବୁଶଗି ତାରାନାଖୋ ବୋଲି ଜଣାପଡ଼ିଛି। ଆଜି ତାଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି।
Comments are closed.