ପ୍ରଧାନ ବିଚାରପତିଙ୍କ ନେତୃତ୍ୱାଧୀନ କଲେଜିୟମ ଦ୍ୱାରା ସୁପାରିଶ ସମସ୍ତ ୯ ଜଣ ସୁପ୍ରିମକୋର୍ଟ ବିଚାରପତି ଭାବେ ନିଯୁକ୍ତି ପାଇବେ

ନୂଆଦିଲ୍ଲୀ: ଦେଶର ସର୍ବୋଚ୍ଚ ନ୍ୟାୟାଳୟରେ ବିଚାରପତି ପଦରେ ନିଯୁକ୍ତି ନିମନ୍ତେ ଦେଶର ପ୍ରଧାନ ବିଚାରପତିଙ୍କ ନେତୃତ୍ୱାଧୀନ କଲେଜିୟମ ସୁପାରିଶ କରିଥିବା ସମସ୍ତ ୯ ଜଣଙ୍କ ନାମକୁ କେନ୍ଦ୍ର ସରକାର ଅନୁମୋଦନ କରିଛନ୍ତି। ଫଳରେ ଉକ୍ତ ୯ ଜଣ ସୁପ୍ରିମକୋର୍ଟ ବିଚାରପତି ଭାବେ ନିଯୁକ୍ତ ହେବା ପଥ ପରିଷ୍କାର ହୋଇଯାଇଛି। ପ୍ରଧାନ ବିଚାରପତି ଜଷ୍ଟିସ ଏନ ଭି ରମନାଙ୍କ ନେତୃତ୍ୱରେ ଗଠିତ କଲେଜିୟମ ପକ୍ଷରୁ ସୁପାରିଶ କରାଯାଇଥିବା ୯ ଜଣଙ୍କ ନାମ ଅନୁମୋଦନ ଲାଭ କରିବା ପରେ ତାହାକୁ ପରବର୍ତ୍ତୀ ଆନୁଷଙ୍ଗିକ କାର୍ଯ୍ୟ ଚୂଡାନ୍ତ କରି ନିଯୁକ୍ତି ପତ୍ର ଜାରି କରିବାକୁ ରାଷ୍ଟ୍ରପତିଙ୍କ ନିକଟକୁ ପଠାଇ ଦିଆଯାଇଛି। ସେମାନଙ୍କ ମଧ୍ୟରେ ତିନିଜଣ ମହିଳାଙ୍କ ନାମ ରହିଛି। ସବୁକିଛି ଧାର୍ଯ୍ୟ ସମୟରେ ଚାଲିଲେ ଆସନ୍ତା ସପ୍ତାହରେ ସୁପ୍ରିମକୋର୍ଟରେ ୯ ଜଣ ନୂତନ ବିଚାରପତି ଦାୟିତ୍ୱ ଗ୍ରହଣ କରିବେ। ସଂପ୍ରତି ସୁପ୍ରିମ କୋର୍ଟରେ ଦଶଟି ବିଚାରପତି ପଦ ଖାଲି ପଡିଛି ଏବଂ ୨୪ ଜଣ ବିଚାରପତିଙ୍କୁ ନେଇ ଦେଶର ସର୍ବୋଚ୍ଚ ନ୍ୟାୟାଳୟ କାର୍ଯ୍ୟ କରୁଛି। ଏକ ସମୟରେ ୯ ଜଣ ବିଚାରପତିଙ୍କ ନାମକୁ ସରକାର ଅନୁମୋଦନ କରିବା ଦେଶର ନ୍ୟାୟପାଳିକା ଇତିହାସରେ ଅଭୂତପୂର୍ବ ବୋଲି କୁହାଯାଉଛି। ଏହି ବ୍ୟକ୍ତିବିଶେଷଙ୍କ ମଧ୍ୟରେ ୮ ଜଣ ବିଚାରପତି ଏବଂ ଜଣେ ବରିଷ୍ଠ ଆଇନଜୀବୀ ଏବଂ ପୂର୍ବତନ ଅତିରିକ୍ତ ସଲିସିଟର ଜେନେରାଲ ପି ଏସ ନରସିଂହାଙ୍କ ନାମ ରହିଛି। ଆଇନଜୀବୀଙ୍କୁ ସୁପ୍ରିମକୋର୍ଟ ବାର୍‍ ରୁ ସିଧାସଳଖ ସୁପ୍ରିମକୋର୍ଟରେ ନିଯୁକ୍ତି ଦିଆଯିବ, ଯାହା ଇତିହାସରେ ପ୍ରଥମ।