ନୂଆଦିଲ୍ଲୀ: ରାଜ୍ୟରେ କ୍ରମାଗତ ଭାବେ ଚାଷୀ ଆତ୍ମହତ୍ୟା ଘଟଣାରେ ବୃଦ୍ଧିକୁ ରୋକିବାରେ ପ୍ରଶାସନିକ ବିଫଳତାକୁ ଦାୟୀ କରି ଆଗତ ମାମଲାର ବିଚାର କରି ଜାତୀୟ ମାନବାଧିକାର ଆୟୋଗ କେନ୍ଦ୍ର କୃଷକ ଓ କୃଷକ କଲ୍ୟାଣ ମନ୍ତ୍ରାଣାଳୟର ସଚିବ ଓ ମହାନିର୍ଦେଶକ, ଓଡ଼ିଶା ସରକାରଙ୍କ ମୁଖ୍ୟ ସଚିବଙ୍କୁ ନୋଟିସ ଜାରି କରିଛନ୍ତି। ଏନଏଚଆରସିଙ୍କ ଆଦେଶ ଅନୁଯାୟୀ ରାଜ୍ୟରେ ଚାଷୀ ମୃତ୍ୟୁ ଭଳି ସମ୍ବେଦନଶୀଳ ଘଟଣାରେ ଛଅ ସପ୍ତାହ ମଧ୍ୟରେ କାର୍ଯ୍ୟାନୁଷ୍ଠାନ ରିପୋର୍ଟ ଦାଖଲ କରିବେ। ଏଥିସହ ମୃତକଙ୍କ ନିକଟ ପରିଜନଙ୍କୁ ମିଳିଥିବା ଆର୍ଥିକ ସହାୟତା ବିଷୟରେ ସବିଶେଷ ତଥ୍ୟ ଜଣାଇବେ।
ଆୟୋଗରେ ମାନବାଧିକାର କର୍ମୀ ତଥା ଆଇନଜୀବୀ ରାଧାକାନ୍ତ ତ୍ରିପାଠୀଙ୍କ ଅଭିଯୋଗ ଅନୁଯାୟୀ ଅଧିକ ସୁଧହାର ଏବଂ ଅଦିନିଆ ବର୍ଷାରେ ଫସଲ କ୍ଷୟକ୍ଷତି ଯୋଗୁଁଁ ୨୫ ଡିସେମ୍ବେରରୁ ୪ ଜାନୁଆରୀ ମଧ୍ୟରେ ରାଜ୍ୟର ୧୦ ଜଣ ଚାଷୀ ଆତ୍ମହତ୍ୟା କରିଛନ୍ତି। ଚାଷୀ ଆତ୍ମହତ୍ୟା ପାଇଁ ବିଳମ୍ବରେ ଫସଲ କ୍ଷୟକ୍ଷତି ଆକଳନ ଏବଂ ବୀମାରାଶି ପ୍ରଦାନ ଭଳି କାରଣକୁ ଶ୍ରୀ ତ୍ରିପାଠୀ ଦାୟୀ କରିଛନ୍ତି। ଭବିଷ୍ୟତରେ ଏଭଳି ଘଟଣାକୁ ଏଡ଼ାଇବା ପାଇଁ ଓଡ଼ିଶା ରିଲିଫ କୋର୍ଡର ସଂଶୋଧନ, କୃଷକ କଲ୍ୟାଣ ଯୋଜନା ଗୁଡ଼ିକର ତ୍ୱରିତ ରୂପାୟନ, ଏମଏସପି ବ୍ୟବସ୍ଥା ଏବଂ ଚାଷୀଙ୍କୁ କାଉନସେଲିଂ ବ୍ୟବସ୍ଥା ଉପଲବ୍ଧ କରାଇବାକୁ ଶ୍ରୀ ତ୍ରିପାଠୀ ଆୟୋଗଙ୍କ ଦୃଷ୍ଟି ଆକର୍ଷଣ କରିଛନ୍ତି।
