ନୂଆଦିଲ୍ଲୀ : ଭାରତରେ ଏକ୍ସପ୍ରେସଓ୍ବେଜରେ ସର୍ବାଧିକ ସ୍ପିଡ୍ ୧୨୦ କିଲୋମିଟର ପ୍ରତି ଘଣ୍ଟା ନିର୍ଦ୍ଧାରିତ କରାଯାଇଛି । ଅନ୍ୟ ହାଇଓ୍ବେଜରେ ଏହି ସ୍ପିଡ୍ ୧୦୦ କିଲୋମିଟର ପ୍ରତି ଘଣ୍ଟା ପର୍ଯ୍ୟନ୍ତ ରହିଥାଏ । କିନ୍ତୁ ଆପଣ ଜାଣିଛନ୍ତି କି ଅନ୍ୟ ଦେଶର ରାସ୍ତାରେ ସର୍ବାଧିକ ସ୍ପିଡ୍ ଏହାଠୁ ବହୁତ ଅଧିକ । ବିଶ୍ବର ୨ଟି ହାଇଓ୍ବେ ଏମିତି ଅଛି ଯେଉଁଠି ସ୍ପିଡର କୌଣସି ସୀମା ନାହିଁ । ଆଜି ଆମେ ଆପଣଙ୍କୁ ଏମିତି ୫ ହାଇଓ୍ବେ ସମ୍ପର୍କରେ ଜଣାଇବୁ ଯେଉଁଠି ସବୁ ଗାଡି ନିଜର ସର୍ବାଧିକ ସ୍ପିଡରେ ଯାତାୟତ କରନ୍ତି ।
ଜର୍ମନ ଅଟୋବାନ୍
ଜର୍ମାନୀର ଏହି ରାସ୍ତା ବହୁତ ପ୍ରସିଦ୍ଧ । ଏହି ରାସ୍ତାରେ ସ୍ପିଡର କୌଣସି ସୀମା ନାହିଁ । ଏଠାରେ ଅନେକ ଭିଡିଓରେ ସାଧାରଣତଃ ଗାଡି ୨୦୦-୩୦୦ କିଲୋମିଟର ପ୍ରତି ଘଣ୍ଟା ସ୍ପିଡରେ ଗଡୁଥିବା ଦେଖିବାକୁ ମିଳେ । ଅଧିକ କ୍ଷମତା ବିଶିଷ୍ଟ ଗାଡି ୪୦୦ ସ୍ପିଡରେ ମଧ୍ୟ ଯାଇଥାଏ ।
ଆଇଲ ଅଫ୍ ମ୍ୟାନ୍
ଏହା ଆଇରିଶ୍ ସାଗରରେ ଥିବା ଏକ ଟାପୁ ଯାହା ବ୍ରିଟେନ ପାଖରେ ରହିଛି । ଏହା ୟୁକେ ଓ ଆୟରଲ୍ୟାଣ୍ଡ ମଧ୍ୟରେ ଏକ ସ୍ଥାନ । ଏଠାରେ ମଧ୍ୟ ରାସ୍ତାରେ ସ୍ପିଡର କୌଣସି ସୀମା ନାହିଁ । ତେବେ ଏଠାରେ ସଡକ ୨ ଲେନ୍ ବିଶିଷ୍ଟ ଥିବାରୁ ଅଧିକ ସ୍ପିଡରେ ଗାଡି ଯାତାୟତ କରନ୍ତିନି । ତେବେ ଏଠାରେ ଯଦି କୌଣସି ଗାଡି ନିଜ ସର୍ବାଧିକ ସ୍ପିଡରେ ଗତି କରେ ତେବେ ତାହା ବେଆଇନ ନୁହେଁ । କାରଣ ଏଠାରେ ଗତିର କୌଣସି ସୀମା ନାହିଁ ।
ପୋଲାଣ୍ଡ ଅଟୋଷ୍ଟ୍ରାଡା
ଏହା ରାସ୍ତା ପୋଲାଣ୍ଡରେ ଅଛି । ଏଠାରେ ଗାଡିର ସ୍ପିଡ୍ ୧୪୦ କିଲୋମିଟର ପ୍ରତି ଘଣ୍ଟା ପର୍ଯ୍ୟନ୍ତ ରହିଛି । ତେବେ ଗାଡି ଆହୁରି ସ୍ପିଡରେ ଯାତାୟତ କରିଥାଏ ।
ସ୍ଲୋଭାକିଆ ମୋଟରଓ୍ବେଜ୍
ସ୍ଲୋଭାକିଆ ମୋଟରଓ୍ବେଜର ରୋଡ୍ ନେଟଓ୍ବର୍କ ୟୁରୋପରେ ସବୁଠାରୁ ଅଧିକ ଗତି ବିଶିଷ୍ଟ ନେଟଓ୍ବର୍କ ମଧ୍ୟରୁ ଗୋଟିଏ । ଏହି ଦେଶର ଅଧିକାଂଶ ମୋଟରଓ୍ବେରେ ଗାଡିର ସର୍ବାଧିକ ଗତି ୧୩୦ କିଲୋମିଟର ପ୍ରତି ଘଣ୍ଟା । ଦେଶ ଏହାକୁ ୧୬୦କୁ ବଢାଇବାକୁ ଯୋଜନା କରୁଛି ।
କ୍ରୋଏଶିଆ ଅଟୋକ୍ରେଷ୍ଟା
କ୍ରୋଏଶିଆରେ ମୁଖ୍ୟ ରାସ୍ତାରେ ସର୍ବାଧିକ ଗତି ୧୩୦ କିଲୋମିଟର । ତେବେ ଏଠାରେ ୧୪୫ କିଲୋମିଟର ପ୍ରତି ଘଣ୍ଟା ସ୍ପିଡରେ ଗାଡି ଚଳାଇଲେ ମଧ୍ୟ ପୁଲିସ କୌଣସି କାର୍ଯ୍ୟାନୁଷ୍ଠାନ ନିଏନି ।
