ମାଲକାନଗିରି: ମାଓବାଦୀଙ୍କ ପ୍ରଜାକୋର୍ଟରେ ୨ ଆଦିବାସୀଙ୍କୁ ମିଳିଛି ଫାଶୀଦଣ୍ଡ। ସେମାନଙ୍କୁ ହତ୍ୟା କରିବା ପରେ ମୃତଦେହକୁ ମାଓବାଦୀମାନେ ଗାଁ ନିକଟରେ ଗଛରେ ଟଙ୍ଗାଇ ପଳାଇଛନ୍ତି। ମାଓବାଦୀଙ୍କ ଏଭଳି ବର୍ବରତା ଦେଖିବାକୁ ମିଳିଛି ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ ବିଜାପୁର ଜିଲ୍ଲାରେ। ଘଟଣା ପରେ ସ୍ଥାନୀୟ ଗ୍ରାମବାସୀଙ୍କ ମଧ୍ୟରେ ଭୟର ବାତାବରଣ ଖେଳିଯାଇଛି। ତେବେ ଅନ୍ୟ ଜଣେ ଛାତ୍ରଙ୍କୁ ମାଓବାଦୀମାନେ ଛାଡ଼ିଦେଇଛନ୍ତି। ଛାତ୍ର ଜଣକ ମାଓବାଦୀଙ୍କ କବଳରୁ ମୁକୁଳି ଆସିବା ପରେ ପୂରା ଘଟଣା ସାମ୍ନାକୁ ଆସିଛି।
ପୁଲିସ ଇନଫର୍ମର ସନ୍ଦେହରେ ମାଓବାଦୀମାନେ ବିଜାପୁର ଜିଲା ବୈରମଗଡ଼ ଥାନା ଅନ୍ତର୍ଗତ କାପମେର୍କା ଗ୍ରାମର ୩ ଜଣଙ୍କୁ ଅପହରଣ କରିନେଇଥିଲେ। ସେମାନଙ୍କ ମଧ୍ୟରୁ ୨ ଜଣଙ୍କୁ ସେମାନେ ଫାଶୀରେ ଝୁଲାଇ ହତ୍ୟା କରିଥିବାବେଳେ ଅନ୍ୟ ଜଣେ ଛାତ୍ରକୁ ଛାଡ଼ି ଦେଇଥିଲେ। ହତ୍ୟାର ଶିକାର ହୋଇଥିବା ୨ ଗ୍ରାମବାସୀ ହେଲେ ମାଡଭି ସୁନା ଓ ପୋଡିୟମ କୋସା। ମାଓବାଦୀ ସଂଗଠନର ବୈରମଗଡ ଏରିଆ କମିଟି ଏହି ଜଘନ୍ୟ ହତ୍ୟାକାଣ୍ଡ ପାଇଁ ନିଜକୁ ଦାୟୀ କରି ମୃତଦେହରେ ପୋଷ୍ଟର ଲଗାଇଛି।
