ଭୁବନେଶ୍ୱର : ସାରା ଦେଶରେ ତାଲାବନ୍ଦ ଜାରିହେବା ପରେ ଗରିବ ଓ ଉଠା ଦୋକାନୀମାନେ ନନା ସମସ୍ୟା ମଧ୍ୟ ଦେଇ ଗତି କରୁଛନ୍ତି। ତେଣୁ ସେମାନଙ୍କୁ ସହାୟତା କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶନିବାର ଆଉ ଏକ ଘୋଷଣା କରିଛନ୍ତି। ଷ୍ଟ୍ରିଟ ଭେଣ୍ଡର ବା ଉଠା ଦୋକାନୀଙ୍କୁ ତିନି ହଜାର ଟଙ୍କା ଏବଂ ୧୦ ଲକ୍ଷ ଗରିବ ଓ ନିରାଶ୍ରୟଙ୍କୁ ରନ୍ଧାଖାଦ୍ୟ ଯୋଗାଇ ଦିଆଯିବ।
ଲକଡାଉନରେ ଗରିବ ଲୋକଙ୍କୁ ଖାଦ୍ୟ ଯୋଗାଇବା ପାଇଁ ମୁଖ୍ୟମନ୍ତ୍ରୀ ଶ୍ରୀ @Naveen_Odisha ପ୍ରତି ପଞ୍ଚାୟତରେ ରନ୍ଧା ଖାଦ୍ୟର ବ୍ୟବସ୍ଥା କରୁଛନ୍ତି। ଏଥିସହ ସହରାଞ୍ଚଳର ଉଠା ଦୋକାନୀମାନଙ୍କୁ ୩୦୦୦ ଟଙ୍କା ଲେଖାଏଁ ପ୍ରଦାନ କରାଯିବ। ଏହି ସମୟରେ ବାହାରକୁ ନ ବାହାରି ଘରେ ରହି କରୋନାକୁ ହରାଇବାକୁ ସେ ଆହ୍ୱାନ କରିଛନ୍ତି। #OdishaFightsCorona pic.twitter.com/waszqBvnxb
— Biju Janata Dal (@bjd_odisha) March 28, 2020
ରାଜ୍ୟର ୧୧୪ଟି ପୌର ସଂସ୍ଥାରେ ପଞ୍ଜିକୃତ ୬୫,୦୦୦ ଷ୍ଟ୍ରିଟ ଭେଣ୍ଡର ବା ଉଠା ଦୋକାନୀ ଏହା ଦ୍ବାରା ଉପକୃତ ହୋଇ ପାରିବେ। ସେହିପରି ପ୍ରତି ପଞ୍ଚାୟତରେ ସ୍ବୟଂ ସହାୟକ ଗୋଷ୍ଠୀ ଜରିଆରେ ୧୦୦ରୁ ୨୦୦ ଗରିବ ଓ ନିରାଶ୍ରୟ ଲୋକଙ୍କୁ ରନ୍ଧାଖାଦ୍ୟ ଯୋଗାଇଦେବା ପାଇଁ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ଏହାଦ୍ବାରା ୧୦ ଲକ୍ଷ ଗରିବ ଓ ନିରାଶ୍ରୟ ଲୋକ ଉପକୃତ ହୋଇ ପାରିବେ। ସେମାନେ ରନ୍ଧା ଖାଦ୍ୟ ଘରକୁ ନେଇ ଖାଇ ପାରିବେ।
ତେବେ କରୋନା ବିରୁଦ୍ଧରେ ସଂଗ୍ରାମ ପାଇଁ ଘରେ ରୁହନ୍ତୁ, ସାବୁନରେ ହାତ ଧୁଅନ୍ତୁ ଏବଂ କରୋନାକୁ ହରାନ୍ତୁ ବୋଲି ମୁଖ୍ୟମନ୍ତ୍ରୀ ନିବେଦନ କରିଛନ୍ତି।
