ପାକ ଅଧିକୃତ କାଶ୍ମୀରରେ କ୍ଷେପଣାସ୍ତ୍ର ପ୍ରତିରକ୍ଷା ବ୍ୟବସ୍ଥା ସ୍ଥାପନ କରୁଛି ଚୀନ

ନୂଆଦିଲ୍ଲୀ: ଗତବର୍ଷ ଭାରତ ସହିତ ଲଦାଖ ଓ ଅରୁଣାଚଳ ପ୍ରଦେଶ ସୀମାନ୍ତରେ ବିବାଦ ସୃଷ୍ଟି ହେବା ପରଠାରୁ ଚୀନ ଏହି ଅଞ୍ଚଳରେ ଥିବା ପ୍ରକୃତ ନିୟନ୍ତ୍ରଣ ରେଖାରେ ତାହାର ସାମରିକ ଉପସ୍ଥିତିକୁ ଅଧିକ ବ୍ୟାପକ କରିବାରେ ଲାଗିଛି । ଇତିମଧ୍ୟରେ ଏହା ପ୍ରକୃତ ନିୟନ୍ତ୍ରଣ ରେଖା ନିକଟରେ ନୂଆ ବିମାନ ଘାଟି, ରନୱେ ଏବଂ ହେଲିପୋର୍ଟ ଆଦି ନିର୍ମାଣ କରିସାରିଛି । ଏଥିସହିତ ଭାରତକୁ ଲାଗିଥିବା ସୀମାନ୍ତରେ ଏହାର ବହୁସଂଖ୍ୟକ ଯବାନ ଏବଂ ଅସ୍ତ୍ରଶସ୍ତ୍ର ମୁତୟନ କରାଯାଇସାରିଛି । ତାହାସହିତ ଏହା ପାକିସ୍ତାନକୁ ମଧ୍ୟ ସାମରିକ ସହାୟତା ଯଥେଷ୍ଟ ବୃଦ୍ଧି କରିଛି । ତାହାସହିତ ତାଳଦେଇ ଭାରତ ମଧ୍ୟ ସୀମାନ୍ତରେ ନିଜର ସାମରିକ ଉପସ୍ଥିତି ଓ ଶକ୍ତିରେ ଯଥେଷ୍ଟ ବୃଦ୍ଧି ଘଟାଇଛି ।
ମିଳିଥିବା ଏକ ସୂଚନା ମୁତାବକ ଚୀନର ବାୟୁସେନା ପାକିସ୍ତାନ ଅଧିକୃତ କାଶ୍ୱୀରରେ ନିଜର କାର୍ଯ୍ୟକଳାପ ଯଥେଷ୍ଟ ବୃଦ୍ଧି ଘଟାଇଛି । ଗତ କିଛିମାସ ମଧ୍ୟରେ ଚୀନ ଓ ପାକିସ୍ତାନ ଦୁଇଦେଶର ସାମରିକ ବାହିନୀ ସ୍ତରରେ ସହଯୋଗ ଯଥେଷ୍ଟ ବୃଦ୍ଧିପାଇଛି । ଏପରିକି ଏହା ପାକିସ୍ତାନ ଅଧିକୃତ କାଶ୍ମୀରରେ କ୍ଷେପଣାସ୍ତ ପ୍ରତିରକ୍ଷା ବ୍ୟବସ୍ଥା ସ୍ଥାପନ କରିଥିବା ରିପୋର୍ଟ ମଧ୍ୟ ହସ୍ତଗତ ହୋଇଛି । ଚୀନର ବାୟୁସେନା ବିମାନଗୁଡିକ ଇନ୍ଧନ ଭର୍ତ୍ତି କରିବାକୁ ପାକ ଅଧିକୃତ କାଶ୍ମୀରରେ ଥିବା ସ୍କର୍ଡୁ ବିମାନ ଘାଟୀକୁ ବ୍ୟବହାର କରୁଥିବା ମଧ୍ୟ ଜଣାଯାଇଛି । ଭାରତର ଲେହ ଠାରୁ ପ୍ରାୟ ୧୦୦ କିଲୋମିଟର ଦୂରରେ ସ୍କର୍ଡୁ ଅବସ୍ଥିତ ।