ମନରେଗା ପ୍ରକଳ୍ପରେ ଜାଲିଆତି ଅଭିଯୋଗ

ବାସୁଦେବପୁର : ମନରେଗା ଯୋଜନାରେ ଗୋଟିଏ ପରେ ଗୋଟିଏ ଅଭିଯୋଗ । ଅଙ୍ଗନବାଡୀ ଦିଦି, ଘରୋଇ ଶିକ୍ଷାନୁଷ୍ଠାନର ଶିକ୍ଷୟତ୍ରୀ,ଛାତ୍ର ମନରେଗା ଯୋଜନାରେ ଜବକାର୍ଡ ହାତେଇ କାମ କରିଥିବା ବେଳେ ମୃତକଙ୍କ ନାମରେ ଜବକାର୍ଡ ଜରୀଆରେ ଟଙ୍କା ଉଠାଣ ହୋଇଥିବାକୁ ନେଇ ଆଜି ଅଭିଯୋଗ ଆସିଛି ବାସୁଦେବପୁର ବ୍ଲକ ଅଧିନ ସୁଦର୍ଶନପୁର ପଞ୍ଚାୟତରେ । ସୁଦର୍ଶନପୁର ପଞ୍ଚାୟତରେ ମୃତକ ସାବିତ୍ରୀ ସାହୁ ଅମୃତ ସରୋବର ରୋଳା ପୋଖରୀ ପ୍ରକଳ୍ପରେ କାମ କରିଥିବା ନେଇ ଟଙ୍କା ଉଠାଣ କରାଯାଇଥିବାକୁ ନେଇ ଅଭିଯୋଗ ଆସିବା ସହିତ ଇରମ କଲେଜର କର୍ମଚାରୀ ବିଦ୍ୟାଧର ପୁହାଣ ଜବକାର୍ଡ ଜରୀଆରେ ଏହି ପ୍ରକଳ୍ପରେ କାମ କରିଥିବା ଅଭିଯୋଗ ହୋଇଛି ।

ସେହିପରି ଜଗନ୍ନାଥୀ ଅଙ୍ଗନବାଡୀର କର୍ମଚାରୀ ଲକ୍ଷ୍ମୀପ୍ରିୟା ସାହୁ, ଘରୋଇ ଶିକ୍ଷାନୁଷ୍ଠାନରେ କାର୍ଯ୍ୟରତ ଶିକ୍ଷୟତ୍ରୀ ସବିତା ପଲାଇ ଓ ମୀନାକୁମାରୀ ଧଳ, ସିଆରପି ପ୍ରମିଳା ନାୟକ, ସୁଦର୍ଶନପୁର ପଞ୍ଚାୟତର ନୂତନ ସେବା ସମବାୟ ସମିତିର କର୍ମଚାରୀ ନିରଞ୍ଜନ ସାହୁ ମନରେଗା ଯୋଜନାରେ ଜବକାର୍ଡ ଜରୀଆରେ କାମ କରିଥିବା ଅଭିଯୋଗକାରୀ ତପନ କୁମାର ବାରିକ ଜଣାଇଛନ୍ତି । ତେବେ ଘରୋଇ ଶିକ୍ଷାନୁଷ୍ଠାନ ହେଉ ଅଥବା ସରକାରୀ ଦପ୍ତର, କାର୍ଯ୍ୟରତ କର୍ମଚାରୀମାନେ କିପରି ଭାବରେ ନିଜର କାର୍ଯ୍ୟସ୍ଥଳରେ ନରହି ମନରେଗା ଯୋଜନାରେ ଉପସ୍ଥିତ ରହି କାମ କରୁଥିଲେ । ତାହା ଏବେ ସଭିଙ୍କୁ ଚକିତ କରିଛି । ଏ ସଂକ୍ରାନ୍ତରେ ବିଡିଓ ସଞ୍ଜୀବ କୁମାର ସାହୁଙ୍କ ନିକଟରେ ଲିଖିତ ତପନ କୁମାର ବାରିକ ଅଭିଯୋଗ କରିଛନ୍ତି।

ପୂର୍ବରୁ ଏହି ପଞ୍ଚାୟତରେ ମନରେଗାର ବିଭିନ୍ନ ପ୍ରକଳ୍ପରେ ଜାଲିଆତି ଅଭିଯୋଗ ଆସିବା ପରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ସ୍ୱରୁପ ପ୍ରକଳ୍ପ ବାବଦକୁ ଉଠାଣ କରୋଯାଇଥିବା ଟଙ୍କାର ଫେରସ୍ତ କରାଯିବା ପାଇଁ ଆଦେଶ ହୋଇଥିଲା । ଆଜିର ଅଭିଯୋଗକୁ ଭିତ୍ତି କରି ଆଇନଗତ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଡିଓ ସଞ୍ଜିବକୁମାର ସାହୁ ସୂଚନା ଦେଇଛନ୍ତି।

Comments are closed.